సుప్రీం లీడర్ గా బాధ్యతలు చేపట్టి ఇన్ని రోజులవుతున్నా.. ఇరాన్ కొత్త బాస్ మొజ్తబా ఖమేనీ కనీసం ఒక్క వీడియోలో కూడా ఎందుకు కనిపించలేదు? చావుబతుకుల మధ్య బంకర్ లో ఉన్నాడన్న వార్తల్లో నిజమెంత? ఈ ప్రశ్నలన్నింటికీ అమెరికా అధ్యక్షుడు డొనాల్డ్ ట్రంప్ తాజాగా ఒక క్లారిటీ ఇచ్చారు. "అతడు ఏదో ఒక రూపంలో బతికే ఉన్నాడు.. కానీ తీవ్రంగా డ్యామేజ్ అయ్యాడు" అంటూ ఫాక్స్ న్యూస్ కి ఇచ్చిన ఇంటర్వ్యూలో ట్రంప్ చేసిన వ్యాఖ్యలు ఇప్పుడు పశ్చిమాసియాలో కాక రేపుతున్నాయి. కనీసం మాట్లాడలేని స్థితిలో ఉన్న ఒక నాయకుడు ఇరాన్ను ఎలా నడిపిస్తున్నాడు? ఫిబ్రవరి 28 దాడిలో అసలేం జరిగిందో ఇప్పుడు డీటెయిల్డ్గా చూద్దాం.
"ఏదో ఒక రూపంలో బతికే ఉన్నాడు".. ట్రంప్ కామెంట్స్
ఇరాన్ అగ్ర నాయకత్వంపై ఇజ్రాయెల్, అమెరికా చేస్తున్న దాడులతో టెహ్రాన్ వణికిపోతోంది. ఈ క్రమంలో ఇరాన్ కొత్త సుప్రీం లీడర్ మొజ్తబా ఖమేనీ పరిస్థితిపై డొనాల్డ్ ట్రంప్ కీలక వ్యాఖ్యలు చేశారు.
ఫాక్స్ న్యూస్ రేడియోకు ఇచ్చిన తాజా ఇంటర్వ్యూలో ట్రంప్ మాట్లాడుతూ.. "మొజ్తబా బహుశా బతికే ఉన్నాడని నేను అనుకుంటున్నాను. ఏదో ఒక రూపంలో అతడు ప్రాణాలతోనే ఉన్నాడు. కానీ ఆ దాడిలో అతడికి చాలా తీవ్రమైన నష్టం జరిగింది" అని కుండబద్దలు కొట్టారు. మొజ్తబా కోమాలో ఉన్నాడన్న వార్తలకు ట్రంప్ వ్యాఖ్యలు మరింత బలం చేకూరుస్తున్నాయి.
ఫిబ్రవరి 28న ఆ అధ్యక్ష భవనంలో ఏం జరిగింది?
గత నెల (ఫిబ్రవరి 28న) టెహ్రాన్లోని అధ్యక్ష కాంపౌండ్పై అమెరికా, ఇజ్రాయెల్ సంయుక్తంగా జరిపిన భీకర క్షిపణి దాడి ఇరాన్ చరిత్రనే మార్చేసింది. ఆ దాడిలో అప్పటి సుప్రీం నేత (మొజ్తబా తండ్రి) అలీ ఖమేనీతో పాటు, మొజ్తబా భార్య, సోదరి, మేనకోడలు అక్కడికక్కడే ప్రాణాలు కోల్పోయారు.
అదే దాడిలో మొజ్తబా చేతులు, కాళ్లు కోల్పోయి తీవ్రంగా గాయపడ్డాడని.. అందుకే రహస్య ప్రదేశంలో చికిత్స పొందుతున్నాడని ఇరాన్ రాయబారి అలీరెజా సలారియన్ కూడా ఇటీవలే ధ్రువీకరించారు. కనీసం మాట్లాడే స్థితిలో కూడా మొజ్తబా లేడని ఆయన చెప్పడం ఈ అనుమానాలకు తావిచ్చింది.
వీడియో లేదు.. కేవలం ఆడియో, టెక్స్ట్ మాత్రమే!
సుప్రీం నేతగా ఎన్నికైన తర్వాత మొజ్తబా ఖమేనీ పేరుతో తొలిసారిగా ఒక అధికారిక ప్రకటన వెలువడింది. "మా అమరవీరుల రక్తం వృధా పోనివ్వం, అమెరికాపై ప్రతీకారం తీర్చుకుంటాం. హార్మూజ్ జలసంధిని మూసివేస్తాం" అని అందులో హెచ్చరించారు.
కానీ, ఇంత పెద్ద ప్రకటనను కూడా ఆయన వీడియో ద్వారా ప్రజల ముందుకు వచ్చి చెప్పలేకపోయారు. కేవలం ఆడియో, రాతపూర్వక సందేశాన్ని మాత్రమే టీవీ యాంకర్ల ద్వారా చదివించారు. ఇవన్నీ గమనిస్తుంటే.. మొజ్తబా ఖమేనీ బహిరంగంగా కనపడలేని దయనీయ స్థితిలో ఉన్నట్లు స్పష్టమవుతోంది.
కనీసం టీవీ ముందుకు వచ్చి తన దేశ ప్రజలకు ధైర్యం చెప్పలేని స్థితిలో ఉన్న ఒక నాయకుడు.. హార్మూజ్ జలసంధిని మూసివేస్తాం అని వార్నింగ్ ఇవ్వడం వెనుక ఇరాన్ మిలిటరీ (IRGC) ఆడుతున్న మైండ్ గేమ్ స్పష్టంగా కనిపిస్తోంది. ట్రంప్ వ్యాఖ్యలు చూస్తుంటే, మొజ్తబా కేవలం పేరుకే నాయకుడని, అసలు కంట్రోల్ అంతా సైన్యం చేతుల్లో ఉందని అర్థమవుతోంది. ఇలాంటి నాయకత్వ లేమి వల్ల నిర్ణయాలు మరింత కఠినంగా మారి, సముద్ర మార్గాల్లో దాడులు పెరిగే ముప్పుంది. ఇది అంతర్జాతీయంగా చమురు ధరల పెరుగుదలకు, ద్రవ్యోల్బణానికి దారితీస్తుంది.
ఇది కూడా చదవండి (Also Read):
Middle East Crisis: రంగంలోకి ప్రధాని మోదీ.. ఇరాన్ అధ్యక్షుడితో ఫోన్ కాల్, మన గ్యాస్, పౌరుల సేఫ్టీపై బిగ్ అప్డేట్!Middle East War: అణు శాస్త్రవేత్తల మృతి.. ఇరాన్ బాస్పై ఇజ్రాయెల్ ప్రధాని సెటైర్లు!
Iran Supreme Leader Mojtaba: బయటకు రాని మొజ్తబా.. టీవీ యాంకర్ చదివిన వార్నింగ్తో భగ్గుమన్న క్రూడాయిల్ ధరలు!
Strait of Hormuz: ఇండియా నౌకలకు ఇరాన్ గ్రీన్ సిగ్నల్
