Assembly Elections 2026: ఐదు రాష్ట్రాల ఎన్నికల షెడ్యూల్ విడుదల.. బెంగాల్లో రెండు విడతలు, మే 4న ఫలితాలు!
కేంద్ర ఎన్నికల సంఘం (ECI) ఐదు రాష్ట్రాల అసెంబ్లీ ఎన్నికల నగారా మోగించింది. పశ్చిమ్ బెంగాల్, తమిళనాడు, కేరళ, అసోం రాష్ట్రాలతో పాటు పుదుచ్చేరి కేంద్ర పాలిత ప్రాంతానికి ఆదివారం ఎన్నికల షెడ్యూల్ను విడుదల చేసింది. ఈ ప్రకటనతో ఆయా రాష్ట్రాల్లో తక్షణమే ఎన్నికల కోడ్ (Model Code of Conduct) అమల్లోకి వచ్చింది. ప్రధాన ఎన్నికల కమిషనర్ జ్ఞానేష్ కుమార్ వెల్లడించిన ఈ షెడ్యూల్ వివరాలు, అలాగే ఆరు రాష్ట్రాల్లో జరగనున్న ఉప-ఎన్నికల విశేషాలు ఒకసారి చూద్దాం.
ఏ రాష్ట్రంలో ఎప్పుడు పోలింగ్ జరగనుందంటే..
మొత్తం ఐదు రాష్ట్రాల్లోని 824 అసెంబ్లీ స్థానాలకు గాను, పశ్చిమ్ బెంగాల్లో మినహా మిగతా అన్ని చోట్లా ఒకే విడతలో ఎన్నికలు పూర్తి కానున్నాయి.
- ఏప్రిల్ 9 (ఒకే దశలో): అసోం (126 స్థానాలు), కేరళ (140 స్థానాలు), పుదుచ్చేరి (30 స్థానాలు).
- ఏప్రిల్ 23 (ఒకే దశలో): తమిళనాడు (234 స్థానాలు).
- పశ్చిమ్ బెంగాల్ (రెండు దశల్లో): మొత్తం 294 స్థానాలకు గాను.. ఏప్రిల్ 23న తొలి దశలో 152 స్థానాలకు, ఏప్రిల్ 29న రెండో దశలో 142 స్థానాలకు పోలింగ్ జరగనుంది.
- ఓట్ల లెక్కింపు (ఫలితాలు): అన్ని రాష్ట్రాలకు ఒకేసారి మే 4న కౌంటింగ్ జరగనుంది.
17.4 కోట్ల మంది ఓటర్లు.. ఆసక్తికరంగా రాజకీయ ముఖచిత్రం
ఈ ఐదు రాష్ట్రాల్లో కలుపుకుని సుమారు 17.4 కోట్ల మంది ఓటర్లు తమ ఓటు హక్కును వినియోగించుకోనున్నారు. (పశ్చిమ్ బెంగాల్లో 6.44 కోట్లు, తమిళనాడులో 5.67 కోట్లు, కేరళలో 2.70 కోట్లు, అసోంలో 2.50 కోట్లు, పుదుచ్చేరిలో సుమారు 9.44 లక్షల మంది ఓటర్లు ఉన్నారు).
ప్రస్తుత రాజకీయ ముఖచిత్రం చూస్తే.. పశ్చిమ్ బెంగాల్లో తృణమూల్ కాంగ్రెస్ (TMC), తమిళనాడులో డీఎంకే, అసోంలో బీజేపీ, కేరళలో ఎల్డీఎఫ్, పుదుచ్చేరిలో ఎన్డీయే కూటమి అధికారంలో ఉన్నాయి. ముఖ్యంగా పశ్చిమ్ బెంగాల్లో ఈసారి పోరు రసవత్తరంగా మారనుంది. గత ఎన్నికల్లో 77 స్థానాలు గెలుచుకున్న బీజేపీ ఈసారి అధికార పీఠం దక్కించుకోవాలని ముమ్మర ప్రయత్నాలు చేస్తుండగా, మమతా బెనర్జీ నేతృత్వంలోని టీఎంసీ వరుసగా నాలుగోసారి గెలిచి రికార్డు సృష్టించాలని పట్టుదలగా ఉంది.
ఈ భారీ ప్రజాస్వామ్య ప్రక్రియను పరిశీలించడానికి, మన నుంచి నేర్చుకోవడానికి 20 దేశాల ఎన్నికల సంఘాల ప్రతినిధులు ఇండియాకు రానున్నారని సీఈసీ జ్ఞానేష్ కుమార్ వెల్లడించారు.
ఆరు రాష్ట్రాల్లో ఉప-ఎన్నికలు.. అజిత్ పవార్ స్థానానికి కూడా!
ఈ ఐదు రాష్ట్రాల అసెంబ్లీ ఎన్నికలతో పాటే.. దేశవ్యాప్తంగా ఆరు రాష్ట్రాల్లోని (గోవా, గుజరాత్, కర్ణాటక, మహారాష్ట్ర, త్రిపుర, నాగాలాండ్) 8 శాసనసభ స్థానాలకు ఉప-ఎన్నికలు కూడా జరగనున్నాయి. పలు కారణాలతో ఈ స్థానాలు ఖాళీ అయ్యాయి. ముఖ్యంగా, మహారాష్ట్రలో ఇటీవల జరిగిన ఘోర విమాన ప్రమాదంలో డిప్యూటీ సీఎం అజిత్ పవార్ మరణించిన దరిమిలా.. ఆయన ప్రాతినిధ్యం వహించిన స్థానానికి సైతం ఈ ఉప-ఎన్నికల్లోనే పోలింగ్ జరగనుంది.
ఎన్నికల షెడ్యూల్ రాకతో రాజకీయ పార్టీలన్నీ ప్రచారంలో స్పీడ్ పెంచనున్నాయి. ఈ ఎన్నికల సంగ్రామంలో పాత ప్రభుత్వాలే అధికారం నిలబెట్టుకుంటాయా, లేక కొత్త మార్పు వస్తుందా అనేది మే 4న తేలిపోనుంది.
