Telangana Politics: రేవంత్ను నేను తీసుకొస్తా.. డ్రగ్స్ టెస్ట్పై మహేష్ గౌడ్ సవాల్!
తెలంగాణ శాసన మండలి వేదికగా డ్రగ్స్ వ్యవహారం రాజకీయ ప్రకంపనలు సృష్టిస్తోంది. రాష్ట్రంలో పెరిగిపోతున్న డ్రగ్స్ కల్చర్పై తెలంగాణ పీసీసీ (TPCC) చీఫ్, కాంగ్రెస్ ఎమ్మెల్సీ మహేష్ కుమార్ గౌడ్ తీవ్ర ఆందోళన వ్యక్తం చేయడంతో పాటు ప్రతిపక్ష బీఆర్ఎస్కు (BRS) బహిరంగ సవాల్ విసిరారు. గత పదేళ్ల పాలనలో గంజాయి, కొకైన్ వంటి మత్తు పదార్థాలు రాష్ట్రంలో విచ్చలవిడిగా విస్తరించాయని ఆరోపించిన ఆయన.. డ్రగ్స్ నిర్మూలనకు ప్రస్తుత కాంగ్రెస్ ప్రభుత్వం కఠిన చర్యలు తీసుకుంటోందని స్పష్టం చేశారు.
కేటీఆర్ డ్రగ్ టెస్ట్కు సిద్ధమా?
ప్రజాప్రతినిధులు ప్రజలకు ఆదర్శంగా ఉండాలని, అందుకోసం నాయకులందరూ ముందుగా డ్రగ్స్ టెస్టులు చేయించుకోవాలని మహేష్ గౌడ్ డిమాండ్ చేశారు. "డ్రగ్స్ టెస్టుకు మా ముఖ్యమంత్రి రేవంత్ రెడ్డిని తీసుకురావడానికి నేను సిద్ధం.. బీఆర్ఎస్ వర్కింగ్ ప్రెసిడెంట్ కేటీఆర్ సిద్ధమా?" అంటూ సవాల్ విసిరారు. యువతకు సరైన సందేశం ఇవ్వాల్సిన బాధ్యత అందరిపైనా ఉందన్నారు.
బీ-ఫామ్ ఇవ్వాలంటే డ్రగ్ టెస్ట్ మస్ట్!
డ్రగ్స్ కేసుల్లో ఎంతటి వారున్నా వదిలిపెట్టే ప్రసక్తే లేదని ఆయన హెచ్చరించారు. ఈ సందర్భంగా ఆయన పలు కీలక ప్రతిపాదనలు, ఆరోపణలు చేశారు:
- రాజకీయాల్లో డ్రగ్స్: రాజకీయ పార్టీలకు చెందిన అభ్యర్థులకు ఎన్నికల్లో 'బీ-ఫారమ్' (B-Form) ఇచ్చే ముందు తప్పనిసరిగా డ్రగ్స్ టెస్టులు చేయాలనే కొత్త నిబంధన తీసుకురావాలని సూచించారు.
- నేతల ప్రమేయం: కొందరు నాయకులు నేరుగా డ్రగ్స్ వ్యాపారంలో పాలుపంచుకుంటున్నారన్న ఆరోపణలు ఉన్నాయని ఆయన మండిపడ్డారు.
- బీఆర్ఎస్ నేత అరెస్ట్: ఇటీవల ఓ డ్రగ్స్ కేసులో బీఆర్ఎస్ నాయకుడు పట్టుబడితే.. ఆ పార్టీ అధిష్టానం ఆయనపై ఇప్పటివరకు ఎలాంటి చర్యలు తీసుకుందో చెప్పాలని నిలదీశారు.
- శ్వేతపత్రం: రాష్ట్రంలో డ్రగ్స్ కట్టడి, గత పదేళ్ల పరిస్థితిపై ప్రభుత్వం శ్వేతపత్రం (White Paper) విడుదల చేయాలని ఆయన కోరారు.
100 సీట్లతో మళ్లీ అధికారంలోకి..
కాంగ్రెస్ ప్రభుత్వం అధికారంలోకి వచ్చిన తర్వాత ఇప్పటికే ఐదు గ్యారంటీలను విజయవంతంగా అమలు చేసిందని మహేష్ గౌడ్ గుర్తుచేశారు. గాంధీ విగ్రహం ఏర్పాటుపై ప్రతిపక్షాలు అనవసర రాజకీయాలు చేస్తున్నాయని విమర్శించారు. మూసీ నది ప్రక్షాళన, అభివృద్ధి జరగకపోతే రాష్ట్రానికి పెట్టుబడులు ఎలా వస్తాయని ఆయన ప్రశ్నించారు. సోషల్ మీడియాలో ప్రభుత్వంపై జరుగుతున్న తప్పుడు ప్రచారం కేవలం తాత్కాలికమేనని, ప్రజలకు వాస్తవాలు తెలుసని స్పష్టం చేశారు. రాబోయే అసెంబ్లీ ఎన్నికల్లో కాంగ్రెస్ పార్టీ ఏకంగా 100 సీట్లు గెలుచుకుని మళ్లీ అధికారంలోకి రావడం ఖాయమని మహేష్ గౌడ్ ధీమా వ్యక్తం చేశారు.
