ప్రపంచాన్ని గడగడలాడిస్తున్న ఇరాన్-అమెరికా యుద్ధంలో ఊహించని మలుపు చోటుచేసుకుంది. ఒకవైపు ట్రంప్ శాంతి వచనాలు పలుకుతుంటే, మరోవైపు ఇరాన్ అసలు చర్చలే జరగలేదని బాంబు పేల్చింది.. ఈ కన్ఫ్యూజన్ వెనుక అసలు కథేంటి? మన జేబుపై ఇది ఎలాంటి ప్రభావం చూపబోతోంది?
ట్రంప్ శాంతి మంత్రం.. తెరవెనుక అసలేం జరుగుతోంది?
అమెరికా, ఇజ్రాయెల్ దాడులతో అట్టుడుకుతున్న పశ్చిమాసియాలో అనూహ్య పరిణామం చోటుచేసుకుంది. ఇరాన్ కొత్త సుప్రీం లీడర్ మొజ్తాబా ఖమేనీ అమెరికాతో దౌత్యపరమైన చర్చలకు అంగీకరించారని ఇజ్రాయెల్ మీడియా సంచలన కథనం ప్రచురించింది. ఇరాన్ విదేశాంగ మంత్రి, అమెరికా ప్రతినిధి మధ్య రహస్య సంభాషణలు జరిగినట్లు ఆ నివేదిక స్పష్టం చేసింది.
హర్మూజ్ జలసంధిపై అమెరికా కన్ను
ఈ రహస్య చర్చల నేపథ్యంలోనే అమెరికా అధ్యక్షుడు డొనాల్డ్ ట్రంప్ సంచలన ప్రకటన చేశారు. ప్రపంచ చమురు రవాణాకు అత్యంత కీలకమైన హర్మూజ్ జలసంధిని త్వరలోనే అమెరికా, ఇరాన్ సంయుక్తంగా నియంత్రించబోతున్నాయని కుండబద్దలు కొట్టారు. అందుకే ఇరాన్ విద్యుత్, ఇంధన కేంద్రాలపై సైనిక దాడులకు ఐదు రోజుల పాటు బ్రేక్ వేస్తున్నట్లు ఆయన ప్రకటించారు.
ఇరాన్ రివర్స్ కౌంటర్.. ట్రంప్ వ్యాఖ్యలకు చెక్!
కానీ ఇక్కడే అసలైన ట్విస్ట్ ఎదురైంది. అమెరికాతో తాము ఎలాంటి ఒప్పందం చేసుకోలేదని ఇరాన్ విదేశాంగ శాఖ అధికారికంగా ప్రకటించింది. గత 24 గంటల్లో వాషింగ్టన్తో ఎలాంటి చర్చలు జరగలేదని, ట్రంప్ చెబుతున్నదంతా అబద్ధమేనని తేల్చిచెప్పింది. అకారణంగా తమపై యుద్ధం రుద్దుతున్న అమెరికాతో రాజీ పడే ప్రసక్తే లేదని స్పష్టం చేసింది.
బ్యారెల్ @ $100.. సామాన్యుడి జేబుకు చిల్లు
ఫిబ్రవరి 28న ఇజ్రాయెల్, అమెరికా దాడుల్లో మాజీ సుప్రీం లీడర్ అలీ ఖమేనీ ప్రాణాలు కోల్పోవడంతో ఈ ఘర్షణలు తారాస్థాయికి చేరుకున్నాయి. ప్రతీకారంతో రగిలిపోతున్న ఇరాన్ అమెరికా స్థావరాలపై దాడులు చేస్తోంది. ఈ భీకర యుద్ధం కారణంగా యుద్ధానికి ముందు 70 డాలర్లు ఉన్న బ్యారెల్ ముడి చమురు ధర, ఇప్పుడు ఏకంగా 100 డాలర్లు దాటేసింది.
గ్లోబల్ టెన్షన్.. మనకు పెట్రోల్ టెన్షన్!
ఒకవైపు దాడులకు విరామం అంటూనే, మరోవైపు ఆయిల్ మార్కెట్లను గుప్పిట్లో పెట్టుకునేందుకు అగ్రరాజ్యం ఆడుతున్న మైండ్ గేమ్ ఇది. ఇరాన్, అమెరికా మధ్య ఈ గందరగోళం ఇలాగే కొనసాగితే రాబోయే రోజుల్లో పెట్రోల్, డీజిల్ ధరలు మండిపోవడం ఖాయం. రవాణా ఖర్చులు పెరిగి నిత్యావసరాల ధరలు సామాన్యుడి నడ్డి విరగ్గొట్టకముందే, రాబోయే ఆర్థిక అనిశ్చితికి ప్రతి ఒక్కరూ సిద్ధంగా ఉండాల్సిన సమయం ఆసన్నమైంది. ఈ భౌగోళిక ఉద్రిక్తతలు నేరుగా మన వంటగది బడ్జెట్ను శాసించబోతున్నాయి.
Also Read:
ఎయిర్ క్వాలిటీ ఇండెక్స్ 2025: భారత్, పాకిస్థాన్, చైనాలకు వార్నింగ్ట్రంప్ సరికొత్త డ్రామా.. ఇరాన్ యుద్ధం నా ఐడియా కాదు!
ఖమేనీపై దాడికి 48 గంటల ముందు ఏం జరిగింది? ట్రంప్-నెతన్యాహు మాస్టర్ ప్లాన్!
Giorgia Meloni | ఇటలీ ప్రధాని జార్జియా మెలోనీకి భారీ షాక్.. అసలేం జరిగింది?
LaGuardia airport crash | విమాన ప్రమాదం: ATC చేసిన చిన్న తప్పు.. ఇద్దరు బలి!
