US vs Iran: బద్ధ శత్రువు చైనాను అడుక్కుంటున్న ట్రంప్.. అమెరికాపై ఇరాన్ సెటైర్ల వర్షం!
పశ్చిమాసియాలో ఆయుధాల మోతతో పాటే ఇప్పుడు మైండ్ గేమ్, మాటల యుద్ధం కూడా తారాస్థాయికి చేరింది. హార్మూజ్ జలసంధిలో ఇరాన్ సృష్టిస్తున్న ఆయిల్ టెన్షన్ను ఎలా ఎదుర్కోవాలో తెలియక అగ్రరాజ్యం అమెరికా తంటాలు పడుతోంది. తమ ఆయిల్ ట్యాంకర్లకు రక్షణగా యుద్ధనౌకలను పంపుకోవాలని సాక్షాత్తూ అమెరికా అధ్యక్షుడు డొనాల్డ్ ట్రంప్.. జపాన్, దక్షిణ కొరియా, ముఖ్యంగా చైనాను కోరడం గ్లోబల్ పాలిటిక్స్లో సంచలనంగా మారింది. బద్ధ శత్రువైన చైనాను సైతం ట్రంప్ బతిమిలాడుకుంటున్నారంటూ ఇరాన్ విదేశాంగ శాఖ ఏ రేంజ్లో వ్యంగ్యాస్త్రాలు సంధించిందో ఇప్పుడు డీటెయిల్డ్గా చూద్దాం.
ప్రపంచంలోనే పవర్ఫుల్ ఆర్మీ.. ఇప్పుడు యాచిస్తోంది!
హార్మూజ్ జలసంధి గుండా చమురు దిగుమతి చేసుకునే దేశాలు సొంతంగా రక్షణ ఏర్పాట్లు చేసుకోవాలని ట్రంప్ చేసిన విజ్ఞప్తిపై ఇరాన్ తీవ్ర స్థాయిలో ఎగతాళి చేసింది. ఇరాన్ విదేశాంగ శాఖ ఒక ఘాటైన ప్రకటన విడుదల చేస్తూ ట్రంప్ను టార్గెట్ చేసింది. "ప్రపంచంలోనే అత్యంత శక్తిమంతమైన ఆర్మీగా చెప్పుకునే అమెరికా.. ఇప్పుడు తన సొంత ఆయిల్ ట్యాంకర్ల రక్షణ కోసం ఇతర దేశాలను యాచిస్తోంది. చివరకు తన చిరకాల శత్రువైన చైనాను కూడా బతిమిలాడుకునే స్థాయికి ట్రంప్ దిగజారిపోయారు" అని ఇరాన్ ఎద్దేవా చేసింది. పశ్చిమాసియాలో పట్టు కోల్పోతున్న అమెరికా.. ఇప్పుడు గతిలేక మిత్రదేశాల చుట్టూ ప్రదక్షిణలు చేస్తోందని ఇరాన్ మీడియా సెటైర్లు వేసింది. హార్మూజ్ జలసంధి తమ కంట్రోల్లోనే ఉంటుందని, పరాయి దేశాల నౌకల గస్తీకి తాము ఎట్టి పరిస్థితుల్లోనూ అంగీకరించబోమని ఇరాన్ ఇస్లామిక్ రివల్యూషనరీ గార్డ్స్ కోర్ (IRGC) స్ట్రాంగ్ వార్నింగ్ ఇచ్చింది.
రష్యా ఆయిల్ వ్యవహారంలో కాళ్ల బేరానికి అమెరికా!
చైనాను సాయం అడగటమే కాకుండా, మార్కెట్లో ఆయిల్ కొరత రాకుండా ఉండేందుకు రష్యా నుంచి చమురు కొనుగోలుకు అమెరికా తాత్కాలికంగా అనుమతి ఇవ్వడంపైనా ఇరాన్ వ్యంగ్యంగా స్పందించింది. ఒకప్పుడు రష్యా నుంచి ఆయిల్ కొనొద్దని మన భారత్ సహా అనేక దేశాలపై తీవ్రమైన ఆంక్షల ఒత్తిడి తెచ్చిన అమెరికా.. ఈరోజు చమురు కొరతతో భయపడి అదే రష్యా దగ్గర కాళ్ల బేరానికి వచ్చిందని ఇరాన్ విదేశాంగ శాఖ మంత్రి సయ్యద్ అబ్బాస్ అరాగ్చీ ఎగతాళి చేశారు.
అగ్రనేత మరణించినా తగ్గని ఇరాన్ ప్రతిఘటన
ఈ యుద్ధం మొదలైన తొలి రోజే ఇరాన్ సుప్రీం లీడర్ ఆయతుల్లా అలీ ఖమేనీ అమెరికా దాడుల్లో మరణించారు. అగ్రనేత చనిపోవడంతో తాము యుద్ధం గెలిచేశామని అమెరికా-ఇజ్రాయెల్ సంబరపడిపోయాయి. కానీ, ఆ సంతోషం కొద్ది కాలమేనని ఇరాన్ తన ప్రతీకార చర్యలతో నిరూపించింది. యుద్ధం ప్రారంభమై రెండు వారాలు దాటుతున్నా ఇరాన్ ప్రతిఘటన ఏమాత్రం తగ్గకపోవడం అగ్రరాజ్యాలకే ఆశ్చర్యం కలిగిస్తోంది. ఒకవేళ ట్రంప్ మాట విని చైనా, జపాన్ దేశాల యుద్ధ నౌకలు గనుక హార్మూజ్ ప్రాంతంలోకి వస్తే పరిస్థితి మూడో ప్రపంచ యుద్ధానికి దారితీస్తుందని నిపుణులు హెచ్చరిస్తున్నారు.
అమెరికా ఎప్పుడైతే చైనాను సాయం అడిగిందో, గ్లోబల్ లీడర్గా తన పవర్ను పరోక్షంగా తగ్గించుకున్నట్లే లెక్క. ఇరాన్ ఆడుతున్న ఈ మైండ్ గేమ్తో అగ్రరాజ్యాల ఈగోలు దెబ్బతింటున్నాయి. ట్రంప్ విజ్ఞప్తికి చైనా, జపాన్ ఇంకా రెస్పాండ్ కాలేదు కానీ, ఒకవేళ ఆ దేశాల యుద్ధనౌకలు హార్మూజ్లో ఎంటర్ అయితే మాత్రం మంటలు మరింతగా రాజుకుంటాయి. ఆ దెబ్బకు ఇంటర్నేషనల్ ఆయిల్ మార్కెట్ కుప్పకూలిపోయి మన దగ్గర పెట్రోల్ ధరలు భగ్గుమనడం ఖాయం.
