సముద్రం ఎప్పుడూ ప్రశాంతంగానే కనిపిస్తుంది.. కానీ ఆ నీటి అడుగున శత్రు దేశాలు పన్నే కుట్రలు సామాన్యుడి భద్రతకు, దేశ ఆర్థిక వ్యవస్థకు పెను ముప్పుగా మారుతుంటాయి. ఆ ముప్పును కూకటివేళ్లతో పెకిలించి, మన దేశ సరిహద్దులను ఉక్కుకోటలా మార్చేందుకు భారత నౌకాదళ అమ్ములపొదిలోకి ఒక భయంకరమైన సముద్ర రాక్షసుడు దూసుకొచ్చాడు. అత్యాధునిక స్వదేశీ పరిజ్ఞానంతో తయారైన 'ఐఎన్ఎస్ తారాగిరి' (INS Taragiri) స్టెల్త్ ఫ్రిగేట్ యుద్ధ నౌక అఫీషియల్గా జలప్రవేశం చేసి శత్రువుల గుండెల్లో వణుకు పుట్టిస్తోంది. హిందూ మహాసముద్రంలో డ్రాగన్ కంట్రీ లాంటి దేశాలు వేస్తున్న ఎత్తుగడలకు చెక్ పెట్టేందుకు ఈ అత్యాధునిక అస్త్రం భారత నావికాదళానికి బ్రహ్మాస్త్రంలా మారబోతోంది.
జాతికి అంకితమైన సముద్రపు సింహం!
విశాఖపట్నం నేవల్ డాక్యార్డ్ వేదికగా శుక్రవారం ఈ చారిత్రక ఘట్టం ఆవిష్కృతమైంది. కేంద్ర రక్షణ శాఖ మంత్రి రాజ్నాథ్ సింగ్ చేతుల మీదుగా ఈ అత్యంత శక్తిమంతమైన యుద్ధ నౌకను అధికారికంగా జాతికి అంకితం చేశారు.
ఈ రోమాలు నిక్కబొడుచుకునే అద్భుత కార్యక్రమానికి త్రివిధ దళాల అధిపతి (సీడీఎస్) జనరల్ అనిల్ చౌహన్, నేవీ చీఫ్ దినేశ్ కె. త్రిపాఠితో పాటు పలువురు ఉన్నతాధికారులు హాజరై భారతీయ నౌకాదళ సత్తాను ప్రపంచానికి చాటారు.
శత్రువుల రాడార్లకు చిక్కని 'స్టెల్త్' మ్యాజిక్!
మహారాష్ట్ర ముంబయిలోని ప్రఖ్యాత 'మజగావ్ డాక్స్ లిమిటెడ్' (MDL) అత్యంత ప్రతిష్టాత్మకంగా ఈ యుద్ధ నౌకను నిర్మించింది. నీలగిరి శ్రేణి 17-ఏ (Project 17A) ప్రాజెక్టులో ఇది నాలుగో నౌక కావడం విశేషం.
ఆత్మనిర్భర్ భారత్ లక్ష్యంగా ఏకంగా 75 శాతానికి పైగా స్వదేశీ పరిజ్ఞానంతో మన పారిశ్రామిక రక్షణ ఉత్పత్తుల తయారీ సంస్థలు దీనిని అద్భుతంగా తీర్చిదిద్దాయని నేవీ వర్గాలు సగర్వంగా ప్రకటించాయి. వాస్తవానికి గతేడాది (2025) నవంబరు 28వ తేదీనే ఈ నౌకను లాంఛనంగా నేవీకి అప్పగించారు.
నింగి, నేల, నీరు.. ఎక్కడైనా విధ్వంసమే!
శత్రు దేశాల రాడార్ల కళ్లుగప్పి, అత్యంత రహస్యంగా చొచ్చుకుపోయి మరణశాసనం లిఖించడం ఐఎన్ఎస్ తారాగిరి అసలైన బలం. గాలిలో ఎగురుతున్న లక్ష్యాలతో పాటు, సముద్ర ఉపరితల స్థావరాలను, నీటి అడుగున నక్కిన జలాంతర్గాములను ఒకేసారి మట్టికరిపించే సత్తా దీని సొంతం.
ఈ నౌక అక్షరాలా 149 మీటర్ల పొడవు, 17.8 మీటర్ల వెడల్పుతో ఏకంగా 6,670 టన్నుల బరువు ఉంటుంది. కంబైన్డ్ డీజిల్ లేదా గ్యాస్ ఇంజిన్ల సాయంతో సముద్రపు అలలపై గంటకు 28 నాట్స్ వేగంతో రయ్ మని దూసుకుపోగలదు.
బ్రహ్మోస్, బరాక్-8 క్షిపణుల పవర్!
ఈ సముద్రపు బాహుబలి నిండా అత్యాధునిక టెక్నాలజీ, మారణాయుధాలు లోడ్ చేసి ఉన్నాయి. విమానాలను కూల్చేసే 'బరాక్-8' యాంటీ-ఎయిర్క్రాఫ్ట్ క్షిపణులతో పాటు, నౌకలను తుత్తునియలు చేసే బ్రహ్మోస్ లాంటి బ్రహ్మాస్త్రాలు ఇందులో సర్వం సిద్ధంగా ఉన్నాయి.
నీటి అడుగున శత్రువుల జలాంతర్గాములను వేటాడే యాంటీ-సబ్మెరైన్ వార్ఫేర్ సిస్టమ్, ప్రమాదం ఏ రూపంలో వచ్చినా ముందే పసిగట్టే అత్యాధునిక ఎర్లీ వార్నింగ్ రాడార్ వ్యవస్థలు దీనికి అదనపు బలాన్ని ఇస్తున్నాయి.
పాత తారాగిరి వారసత్వం.. నయా ఇండియా సత్తా!
నిజానికి 'తారాగిరి' అనే పేరుకు భారత నావికాదళ చరిత్రలో ఓ ప్రత్యేక స్థానం, గౌరవం ఉన్నాయి. 1980 నుంచి 2013 వరకు సుదీర్ఘకాలం పాటు దేశానికి విశేష సేవలందించిన పాతతరం ఐఎన్ఎస్ తారాగిరి వారసత్వాన్ని ఈ సరికొత్త నౌక సగర్వంగా కొనసాగించబోతోంది.
శత్రువుల కళ్లుగప్పే స్టెల్త్ టెక్నాలజీ, ఆటోమేషన్, అద్భుతమైన పోరాట పటిమ కలయికగా రూపుదిద్దుకున్న ఈ నౌక భారత రక్షణ ఉత్పాదక సామర్థ్యాన్ని ప్రపంచానికి సగర్వంగా చాటుతోందని షిప్ కమాండింగ్ ఆఫీసర్ హేమంత్ గోపాల్ ప్రశంసించారు.
హిందూ మహాసముద్రంలో పొరుగు దేశాల కుతంత్రాలు, భౌగోళిక రాజకీయాలు శరవేగంగా మారుతున్న ఈ తరుణంలో.. ఐఎన్ఎస్ తారాగిరి జలప్రవేశం భారత రక్షణ రంగానికి కొండంత అండ. భవిష్యత్తులో సముద్ర జలాల్లో ఏ దేశమైనా మన వైపు కన్నెత్తి చూస్తే.. తారాగిరి క్షిపణుల మోతతో వాళ్ల నౌకలు జలసమాధి అవ్వడం పక్కా! ఇది స్వయం సమృద్ధి దిశగా ఆత్మనిర్భర్ భారత్ సాధించిన మరో మహా విజయం.
