ఒకవైపు అమెరికా, ఇరాన్ల మధ్య శాంతి చర్చలకు ఆతిథ్యం ఇస్తూనే.. మరోవైపు తన మిత్రదేశమైన సౌదీ అరేబియాకు రహస్యంగా వేలాది మంది సైనికులను, యుద్ధ విమానాలను తరలించింది పాకిస్థాన్. తెర ముందు శాంతి జపం చేస్తూ, తెర వెనుక యుద్ధానికి సైన్యాన్ని మోహరిస్తున్న ఈ భయంకరమైన 'డబుల్ గేమ్' ఇప్పుడు ప్రపంచ దేశాల వెన్నులో వణుకు పుట్టిస్తోంది. మూడో ప్రపంచ యుద్ధానికి దారితీసే ఈ డేంజరస్ స్కెచ్ వెనుక ఉన్న మైండ్ బ్లాంక్ అయ్యే నిజాలు ఇవే!
ఆకాశంలో ఫైటర్ జెట్లు.. సౌదీకి పాక్ సైన్యం!
గత ఏడాది సెప్టెంబర్లో పాకిస్థాన్, సౌదీ అరేబియా మధ్య అత్యంత రహస్యంగా ఒక కీలకమైన రక్షణ ఒప్పందం జరిగిన సంగతి తెలిసిందే. ఇప్పుడు ఆ అగ్రిమెంట్ బలం బయటపడింది. ఈ ఒప్పందంలో భాగంగా పాకిస్థాన్ ఏకంగా 13 వేల మంది సైనికులను, సుమారు 10 నుంచి 18 వరకు భీకరమైన ఫైటర్ జెట్లను సౌదీ అరేబియాకు పంపించింది. ఈ భారీ సైనిక బలగాలను సౌదీ తూర్పు సెక్టార్లోని 'కింగ్ అబ్దులజిజ్ ఎయిర్ బేస్'లో పకడ్బందీగా మోహరించారు.
శనివారం నాడు పాకిస్థాన్ సైనిక బృందం, ఫైటర్ జెట్లు, అలాగే సహాయక ఎయిర్క్రాఫ్ట్లు తమ ఎయిర్ బేస్లో సురక్షితంగా ల్యాండ్ అయినట్లు సౌదీ అరేబియా రక్షణ శాఖ అధికారికంగా ప్రకటించింది. ఇరు దేశాల సైన్యాల మధ్య సమన్వయాన్ని మరింత పెంపొందించడానికి, ఆపరేషన్ల సన్నద్ధతను మెరుగుపరచడానికి, అలాగే భద్రత, స్థిరత్వాన్ని పటిష్టం చేయడానికే ఈ భారీ మోహరింపు చేపట్టినట్లు సౌదీ స్పష్టం చేసింది.
శాంతి ముసుగులో కత్తుల సాము.. ఇస్లామాబాద్ డ్రామా!
ఇక్కడే పాకిస్థాన్ ఆడుతున్న అసలు నాటకం బట్టబయలైంది. సరిగ్గా పాకిస్థాన్ యుద్ధ విమానాలు సౌదీలో దిగిన సమయంలోనే.. పాక్ రాజధాని ఇస్లామాబాద్ వేదికగా అమెరికా, ఇరాన్ మధ్య శాంతి చర్చలు జరుగుతుండటం గమనార్హం. పాక్ మధ్యవర్తిత్వంతోనే ఆ రెండు దేశాల ప్రతినిధులు ఒకే టేబుల్పైకి వచ్చారు.
ఒకవైపు పశ్చిమాసియా యుద్ధానికి ముగింపు పలకాలని శాంతి కపోతాలు ఎగరేస్తూనే.. మరోవైపు ఇరాన్కు బద్ధ శత్రువైన సౌదీకి ఏకంగా సైన్యాన్ని పంపించడం ఇప్పుడు అంతర్జాతీయ వర్గాల్లో తీవ్ర చర్చనీయాంశంగా మారింది. అయితే, పాక్ ఆధ్వర్యంలో జరిగిన ఈ ఇస్లామాబాద్ చర్చలు ఘోరంగా విఫలమైనట్లు ఆదివారం అమెరికా ఉపాధ్యక్షుడు జేడీ వాన్స్ ప్రకటించిన సంగతి తెలిసిందే.
పక్కా స్కెచ్.. ఇరాన్ యుద్ధం వేళ సైలెంట్ ఆపరేషన్!
సౌదీ అరేబియా ఈ సైనిక రాకను తాజాగా ప్రకటించినప్పటికీ.. పాకిస్థాన్ గత నెలలోనే ఈ ఎయిర్క్రాఫ్ట్లు, సైన్యాన్ని గుట్టుచప్పుడు కాకుండా సౌదీకి తరలించిందని రక్షణ విశ్లేషకులు కుండబద్దలు కొడుతున్నారు. ఇరాన్ భీకర యుద్ధ వాతావరణం నేపథ్యంలో, కేవలం సైనికులనే కాకుండా అత్యంత కీలకమైన 'క్షిపణి నిరోధక వ్యవస్థలను' కూడా పాకిస్థాన్ సౌదీకి పంపించినట్లు సమాచారం.
ఈ క్రమంలోనే అంతర్జాతీయ వ్యవహారాల నిపుణుడు మహ్మద్ మెహదీ ఈ మోహరింపుపై కీలక విషయాలు వెల్లడించారు. "కనీసం 13 వేల మంది పాకిస్థాన్ సైనికులు, 10 నుంచి 18 ఫైటర్ జెట్లు సౌదీలో ల్యాండ్ అయ్యాయి. ఇప్పటికే అక్కడ మరో 10 వేల మంది పాక్ సైనికులు ఉన్నారు. గత ఏడాది కుదిరిన రక్షణ ఒప్పందం ప్రకారమే ఈ భారీ ఏర్పాటు జరిగింది" అని ఆయన స్పష్టం చేశారు.
నాటో తరహా ఒప్పందం.. అణుబాంబు భరోసా!
వాస్తవానికి సౌదీ అరేబియా యువరాజు మహ్మద్ బిన్ సల్మాన్, పాకిస్థాన్ ప్రధాని షెహబాజ్ షరీఫ్ గత ఏడాదే ఈ రక్షణ డీల్పై సంతకాలు చేశారు. అచ్చం పాశ్చాత్య దేశాల కూటమి 'నాటో' (NATO) తరహాలో ఉండే ఈ ఒప్పందం ప్రకారం.. ఈ రెండు దేశాల్లో ఏ ఒక్క దేశంపై దాడి జరిగినా సరే, దాన్ని ఇద్దరిపై జరిగిన సంయుక్త దాడిగానే పరిగణిస్తారు.
పాకిస్థాన్ చేతిలో అణుబాంబు (అణ్వస్త్ర దేశం) ఉండటంతో.. ఈ ఒప్పందం ద్వారా సౌదీకి కొండంత అండ లభించినట్లయింది. ముప్పు తీవ్రతను బట్టి పాక్ నుంచి అన్ని రకాల రక్షణ, సైనిక సాయాన్ని పొందే పవర్ ఇప్పుడు సౌదీకి దక్కిందని విశ్లేషకులు భావిస్తున్నారు.
1960ల నుంచే ఈ రెండు దేశాల మధ్య బలమైన రక్షణ సంబంధాలున్నాయి. నాడు యెమెన్లో ఈజిప్టు యుద్ధం సమయంలో పాకిస్థాన్ తన బలగాలను సౌదీ రక్షణ కోసం పంపించింది. ఆ తర్వాత 1979లో ఇరాన్లో ఇస్లామిక్ విప్లవం వచ్చినప్పటి నుంచి వీళ్ల స్నేహం మరింత బలపడింది. ఇప్పుడు పశ్చిమాసియాలో ఇరాన్ యుద్ధంతో తీవ్ర ఉద్రిక్తతలు నెలకొన్న నేపథ్యంలో.. ప్రపంచ దేశాల దృష్ఠి అంతా ఈ పాక్-సౌదీ రక్షణ ఒప్పందం వైపే మళ్లింది.
శాంతి కోసం ఒకవైపు ముఖాముఖి చర్చలు.. యుద్ధం కోసం మరోవైపు సైన్యాల మోహరింపు.. ఇదీ పశ్చిమాసియాలో నడుస్తున్న అసలైన రాజకీయ చదరంగం! పాకిస్థాన్ అమెరికాకు మిత్రుడిలా నటిస్తూనే, ఇరాన్కు వ్యతిరేకంగా సౌదీని పూర్తిస్థాయిలో సన్నద్ధం చేస్తోంది. ఈ 'నాటో తరహా' ఒప్పందం పశ్చిమాసియా భౌగోళిక రాజకీయాలను శాశ్వతంగా మార్చేయబోతోంది. రాబోయే రోజుల్లో ఇరాన్ వర్సెస్ సౌదీ+పాక్ అనే కొత్త యుద్ధ ముఖచిత్రం తెరపైకి వస్తే, ప్రపంచం ఊహించని ఇంధన సంక్షోభాన్ని ఎదుర్కోవడం గ్యారెంటీ కాబట్టి, మన ఆర్థిక ప్రణాళికలను పకడ్బందీగా ఉంచుకోవడం ఉత్తమం!
Also Read:
శాంతి చర్చలు విఫలం.. మూడో ప్రపంచ యుద్ధానికి రెడీ అవుతున్న ఇరాన్!21 గంటల పాటు సాగిన చర్చలు.. అమెరికా-ఇరాన్ మధ్య అసలేం జరిగింది?
US Iran Peace Talks : ఫైనల్ ఆఫర్ ఇచ్చేశాం.. తేల్చుకోవాల్సింది ఇరానే: జేడీ వాన్స్
US Iran Peace Talks: ఇస్లామాబాద్ చర్చలు విఫలం
వెనక్కి తగ్గేదే లే.. ఎక్స్ వేదికగా గర్జించిన ఇరాన్ అధ్యక్షుడు మసూద్!
