Failed US Iran Peace Talks Raise Fears Of World War And Global Oil Crisis : ప్రపంచం ఒక అగ్నిపర్వతం అంచున నిలబడి ఉంది! పాకిస్థాన్ వేదికగా శనివారం జరిగిన అమెరికా-ఇరాన్ శాంతి చర్చలు ఘోరంగా విఫలమవడంతో భూగోళం ఒక్కసారిగా ఉలిక్కిపడింది. అగ్రరాజ్యాల మధ్య ఏకంగా 21 గంటల పాటు ఉత్కంఠగా సాగిన దౌత్య మథనం ఎలాంటి ఒప్పందం లేకుండానే అర్ధాంతరంగా ముగియడం పెను ప్రకంపనలు సృష్టిస్తోంది. ముగింపు దశకు చేరుకున్న రెండు వారాల కాల్పుల విరమణ గడువు ఏ క్షణమైనా ముగియనుండటంతో, పశ్చిమాసియాలో మళ్లీ భీకర యుద్ధం రగులుకుంటుందనే భయం ప్రతి గుండెనూ ఉక్కిరిబిక్కిరి చేస్తోంది.
ట్రంప్ ఆగ్రహం.. పక్కా స్కెచ్తో అమెరికా, ఇజ్రాయెల్!
శాంతి చర్చల వైఫల్యంతో అగ్రరాజ్యం అమెరికా అధ్యక్షుడు డొనాల్డ్ ట్రంప్ తీవ్ర ఆగ్రహంతో రగిలిపోతున్నారు. ఇరాన్ తీరుపై ఇదివరకే మండిపడుతున్న ఆయన.. ఇప్పుడు ఎలాంటి సంచలన నిర్ణయం తీసుకుంటారోనన్న భయంతో ప్రపంచ దేశాలు వణికిపోతున్నాయి. ఒప్పందం కుదరకపోతే ఇరాన్పై భీకర దాడులకు దిగుతామని ట్రంప్ ముందే పవర్ ఫుల్ వార్నింగ్ ఇచ్చారు. ఇప్పుడు ఆ హెచ్చరికలు నిజం కాబోతున్నాయి.
ఇప్పటివరకు అమల్లో ఉన్న రెండు వారాల తాత్కాలిక కాల్పుల విరమణ ఒప్పందం ఇక గాల్లో కలిసినట్లేనని విశ్లేషకులు తేల్చి చెబుతున్నారు. ఇదే జరిగితే.. అమెరికా, ఇజ్రాయెల్ సైన్యాలు సంయుక్తంగా ఇరాన్పై ఊహించని స్థాయిలో మహా దాడులకు దిగడం ఖాయం. ముఖ్యంగా ఇరాన్ ఆర్థిక మూలాలైన చమురు కేంద్రాలతో పాటు, పౌర మరియు మౌలిక సదుపాయాలే లక్ష్యంగా నిప్పుల వర్షం కురిపించేందుకు అగ్రరాజ్యాలు వ్యూహాలు రచిస్తున్నాయి.
తగ్గేదే లే అంటున్న ఇరాన్.. గల్ఫ్ దేశాలకు పెనుముప్పు!
అమెరికా పెట్టిన కఠినమైన షరతులను నిర్మొహమాటంగా తిరస్కరించిన ఇరాన్ సైతం ఏమాత్రం తగ్గేదే లే అంటోంది. ఒకవేళ అమెరికా-ఇజ్రాయెల్ దాడులకు దిగితే, దానికి వంద రెట్లు భారీగా తిప్పికొట్టేందుకు సర్వసైన్యాలను సిద్ధం చేసుకుంటోంది.
ఇజ్రాయెల్తో పాటు పశ్చిమాసియాలో ఉన్న ఇతర చమురు క్షేత్రాలపై వందలాది క్షిపణులతో విరుచుకుపడేందుకు ఇరాన్ ప్రణాళికలు సిద్ధం చేసింది. ఇరాన్ గనక అదే నిర్ణయం తీసుకుంటే.. సౌదీ అరేబియా, బహ్రెయిన్, యూఏఈ, కువైట్ లాంటి గల్ఫ్ దేశాలు కనీవినీ ఎరుగని విధ్వంసాన్ని చవిచూడక తప్పదనే భయాలు సర్వత్రా వ్యక్తమవుతున్నాయి.
అమెరికా స్థావరాలే టార్గెట్.. రంగంలోకి హెజ్బొల్లా!
పశ్చిమాసియా రణరంగంలో ఇప్పుడు ఎక్కడ చూసినా నెత్తుటి ఛాయలే కనిపిస్తున్నాయి. ఇరాన్ చేయబోయే ఈ ప్రతీకార దాడుల్లో గల్ఫ్ దేశాల్లో ఉన్న అమెరికా మిలిటరీ స్థావరాలకు అత్యంత తీవ్రమైన ప్రమాదం పొంచి ఉంది.
కేవలం రెండు దేశాల మధ్య ఆగిపోకుండా.. ఈ మహా సంగ్రామం సిరియా, లెబనాన్ లాంటి ఇతర దేశాలకు కూడా వేగంగా విస్తరించే భయంకరమైన అవకాశాలు ఉన్నాయని రక్షణ నిపుణులు విశ్లేషిస్తున్నారు. ఇరాన్కు వెన్నుదన్నుగా నిలిచే హౌతీ రెబల్స్, హెజ్బొల్లా మిలిటెంట్లు సైతం తమ దాడుల తీవ్రతను ఏకకాలంలో ఉధృతం చేయనున్నారు.
అణుబాంబుకు రెడీ.. హర్మూజ్ జలసంధి దిగ్బంధం!
యుద్ధం గనక తారాస్థాయికి చేరితే, ఇరాన్ తన బ్రహ్మాస్త్రాన్ని బయటకు తీయడం ఖాయం. ఇందులో భాగంగా అంతర్జాతీయ చమురు రవాణాకు గుండెకాయ లాంటి 'హర్మూజ్ జలసంధి'పై తన పట్టుబిగించి, శాశ్వతంగా మూసివేసేందుకు ఇరాన్ పకడ్బందీగా పావులు కదుపుతోంది.
మరోవైపు తన అణ్వాయుధాల తయారీ కార్యక్రమానికి మరింత స్పీడ్ పెంచే అవకాశాలు స్పష్టంగా కనిపిస్తున్నాయి. ఇప్పటిదాకా కేవలం పౌర అవసరాల కోసమే యురేనియంను శుద్ధి చేస్తున్నామని చెబుతున్న ఇరాన్.. తాజా పరిణామాలతో నేరుగా అణుబాంబు తయారీ దిశగా భయంకరమైన అడుగులు వేయవచ్చని నిపుణులు కుండబద్దలు కొడుతున్నారు.
భారత్కు ప్రాణసంకటం.. కుప్పకూలనున్న ఎకానమీ!
ఈ యుద్ధం ఎక్కడో కదా జరుగుతోంది, మనకేంటి నష్టం అనుకుంటే పొరపాటే. హర్మూజ్ జలసంధి గనక మూసుకుపోతే మొత్తం ప్రపంచవ్యాప్తంగా చమురు సంక్షోభం తలెత్తి ప్రమాద ఘంటికలు మోగడం ఖాయం. క్రూడాయిల్ ధరలు ఊహించని రేంజ్లో భారీగా పెరిగిపోయి, మన భారత్ సహా అన్ని దేశాల్లో పెట్రోల్, డీజిల్ ధరలు ఆకాశాన్నంటుతాయి. ఇంధన ధరల మంటతో నిత్యావసర వస్తువుల రేట్లు సామాన్యుడికి అందనంత ఎత్తుకు వెళ్లిపోతాయి. ఈ దారుణ పరిణామాలన్నీ చివరకు ప్రపంచాన్ని ఒక భయంకరమైన ఆర్థిక మాంద్యంలోకి నెట్టేస్తాయని ఆర్థిక నిపుణులు తీవ్ర హెచ్చరికలు జారీ చేస్తున్నారు.
ముఖ్యంగా భారతదేశ చమురు రవాణాకు హర్మూజ్ జలసంధే అత్యంత కీలకం. ఒకవేళ అది మూసుకుపోతే మన దేశానికి గ్యాస్, క్రూడాయిల్ సరఫరా పూర్తిగా నిలిచిపోయి, భారత ఆర్థిక వ్యవస్థపై ఊహించని స్థాయిలో తీవ్రమైన ప్రభావాన్ని చూపిస్తుందనే భయాలు నెలకొన్నాయి.
ఆధిపత్యం కోసం అగ్రరాజ్యాలు ఆడుతున్న ఈ నెత్తుటి చదరంగంలో.. ఏ క్షణాన ఏ దేశం అణుబాంబు బటన్ నొక్కుతుందో తెలియని కత్తిమీద సాము లాంటి భయంకరమైన పరిస్థితుల్లో ప్రపంచం బిక్కుబిక్కుమంటూ బతుకుతోంది!
Also Read:
21 గంటల పాటు సాగిన చర్చలు.. అమెరికా-ఇరాన్ మధ్య అసలేం జరిగింది?US Iran Peace Talks : ఫైనల్ ఆఫర్ ఇచ్చేశాం.. తేల్చుకోవాల్సింది ఇరానే: జేడీ వాన్స్
US Iran Peace Talks: ఇస్లామాబాద్ చర్చలు విఫలం
వెనక్కి తగ్గేదే లే.. ఎక్స్ వేదికగా గర్జించిన ఇరాన్ అధ్యక్షుడు మసూద్!
US Iran Peace Talks: ఇస్లామాబాద్లో టెన్షన్ టెన్షన్
