ఖండాంతరాల్లో జరుగుతున్న యుద్ధం మనకెందుకులే అని నిర్లక్ష్యంగా ఉంటున్నారా? అగ్రరాజ్యం ఆడుతున్న ఆధిపత్య పోరు ఏ క్షణమైనా మూడో ప్రపంచ యుద్ధంగా మారి మన జేబులకు చిల్లులు పెట్టడం ఖాయం! ఒకవైపు పశ్చిమాసియాలో ఇరాన్తో యుద్ధం అమెరికా నెత్తిన ఊహించని ఆర్థిక భారాన్ని మోపుతుంటే.. మరోవైపు ఇదే అదనుగా తైవాన్ను మింగేయడానికి డ్రాగన్ కంట్రీ చైనా కాచుకుని కూర్చుంది. ప్రపంచ పోలీస్గా చెప్పుకునే అమెరికా.. తాను సృష్టించిన వలయంలో తానే ఎలా చిక్కుకుందో ప్రతి సామాన్యుడూ తెలుసుకోవాల్సిన భయంకరమైన వాస్తవమిది!
కరిగిపోతున్న ఆయుధాలు.. ముంచుకొస్తున్న చైనా ముప్పు!
అమెరికా (US) అంచనాలు పూర్తిగా తలకిందులయ్యాయి. ఇరాన్తో యుద్ధం వల్ల అగ్రరాజ్యానికి ఊహించిన దానికంటే అత్యంత భారీ నష్టమే వాటిల్లుతోంది. ఒకవైపు వారి అత్యాధునిక క్షిపణి నిల్వలు నీళ్లలా కరిగిపోతుంటే.. మరోవైపు ప్రపంచవ్యాప్తంగా మోహరించిన అమెరికా సైన్యాన్ని పశ్చిమాసియాకు తరలిస్తుండటం కొత్త ముప్పులకు దారితీస్తోంది.
ముఖ్యంగా తైవాన్ ఆక్రమణపై చైనా కన్నేసి కాచుకుని కూర్చున్న ఈ ప్రమాదకర సమయంలో.. ఇండో-పసిఫిక్ ప్రాంతం (Indo-Pacific Region)లోని తమ సైనిక సామర్థ్యాలను పశ్చిమాసియాలో వృథా చేయడంపై అమెరికా మిలిటరీలో తీవ్ర ఆందోళన వ్యక్తమవుతోంది. ఈ కఠోర వాస్తవాలను ఏకంగా అమెరికా ఇండో-పసిఫిక్ కమాండర్ అడ్మిరల్ శామ్యూల్ జె పాపారో స్వయంగా వెల్లడించడం గమనార్హం.
డ్రాగన్తో ఫైట్కు ఆయుధాలు ఏవి? కమాండర్ వార్నింగ్!
ఇటీవల జరిగిన యూఎస్ కాంగ్రెషనల్ ఆర్మ్డ్ సర్వీసెస్ కమిటీ విచారణకు హాజరైన శామ్యూల్.. పశ్చిమాసియాలో రగులుతున్న ఉద్రిక్తతలపై సంచలన వ్యాఖ్యలు చేశారు. పసిఫిక్ మహాసముద్రంలో చైనా (China) నుంచి పొంచిఉన్న పెను ముప్పు గురించి ఆయన తీవ్ర ఆందోళన వ్యక్తంచేశారు. భవిష్యత్తులో చైనాతో గనక యుద్ధమే వస్తే.. అమెరికాకు క్షిపణుల అవసరం చాలా ఎక్కువగా ఉంటుందని శామ్యూల్ తేల్చిచెప్పారు.
కానీ, ఇప్పుడు ఇరాన్ (Iran)తో జరుగుతున్న భీకర యుద్ధం కారణంగా ఆ క్షిపణి నిల్వలు అత్యంత వేగంగా కరిగిపోతున్నాయని ఆవేదన వ్యక్తం చేశారు. మరోవైపు చైనా వద్ద కళ్లు చెదిరే స్థాయిలో భారీ క్షిపణి నిల్వలు ఉన్నాయి. తైవాన్ విషయంలో అగ్రరాజ్యంతో ఉద్రిక్తతలు మరింత రాజుకుంటే.. ఆసియా-పసిఫిక్ ప్రాంతంలో ఉన్న అమెరికా, దాని మిత్ర దేశాల సైనిక స్థావరాలను బీజింగ్ అత్యంత సునాయాసంగా లక్ష్యంగా చేసుకునే ప్రమాదం ఉందని అగ్రరాజ్య కమాండర్ గుర్తుచేశారు.
పసిఫిక్ ఖాళీ.. ఇరాన్పైనే అమెరికా ఫోకస్!
సరిగ్గా ఇదే విచారణలో డెమోక్రటిక్ సెనెటర్ రిచర్డ్ బ్లూమెంథల్ సైతం తీవ్ర ఆందోళన వ్యక్తం చేశారు. "ఇరాన్తో యుద్ధం మన సైనిక సామర్థ్యాలపై ఊహించని స్థాయిలో తీవ్ర ప్రతికూల ప్రభావం చూపించే అవకాశం స్పష్టంగా కన్పిస్తోంది" అని ఆయన కుండబద్దలు కొట్టారు.
దానికి నిదర్శనంగా.. ఇప్పటికే జపాన్లో ఉన్న యూఎస్ మెరైన్ కోర్ (US Marine Corps) యూనిట్ను హుటాహుటిన పశ్చిమాసియాకు తరలించడాన్ని ఆయన గుర్తుచేశారు. దానికి తోడు అమెరికాకు చెందిన భారీ యుద్ధ విమానవాహక నౌక 'అబ్రహం లింకన్' కూడా ప్రస్తుతం పశ్చిమాసియాలోనే విధులు నిర్వర్తిస్తోంది. ఇవన్నీ ఇండో-పసిఫిక్ ప్రాంతంలో అమెరికా భద్రతకు తీవ్ర ఆందోళన కలిగించే భయంకరమైన అంశాలే అని ఆయన పేర్కొన్నారు.
రోజుకు బిలియన్ డాలర్ల ఖర్చు.. స్వదేశంలో సెగ!
ఆయుధాలే కాదు, అమెరికా ఆర్థిక వ్యవస్థ కూడా ఈ యుద్ధంలో దారుణంగా దెబ్బతింటోంది. ఇరాన్తో యుద్ధానికి అమెరికా సైనిక వ్యయం నానాటికీ తడిసి మోపెడవుతోంది. టెహ్రాన్ను ఎదుర్కొనేందుకు అగ్రరాజ్యం ప్రతిరోజూ ఏకంగా ఓ బిలియన్ డాలర్ మేర నీళ్లలా వెచ్చిస్తోన్నట్లు సంచలన అంచనాలు వెలువడుతున్నాయి.
ఈ విపరీతమైన ఖర్చుపై స్వదేశంలోనూ అమెరికా ప్రభుత్వంపై పెద్దఎత్తున వ్యతిరేకత ఎదురవుతోంది. అలా అని పశ్చిమాసియాలో యుద్ధం నుంచి అమెరికా ఉన్నట్టుండి వెనక్కి తగ్గే అవకాశం ఏమాత్రం కన్పించట్లేదు. దీంతో తాను సృష్టించిన యుద్ధంలో.. చివరికి తానే అత్యంత దారుణంగా ఇరుక్కొన్నట్లయ్యింది అగ్రరాజ్యం పరిస్థితి..!
ఒకప్పుడు రెండు దేశాలు కొట్టుకుంటే మధ్యలో పంచాయతీ చేసి లాభపడే అమెరికా.. ఇప్పుడు ఇరాన్ దెబ్బకు సొంత రక్షణ కవచాలనే కోల్పోతోంది. రోజుకు బిలియన్ డాలర్లు తగలేస్తూ, తన అసలు శత్రువైన చైనాకు ఇండో-పసిఫిక్ ప్రాంతాన్ని పరోక్షంగా అప్పగించేస్తోంది. ఈ పరిస్థితి ఇలాగే కొనసాగితే, రాబోయే రోజుల్లో తైవాన్పై చైనా దాడి చేయడం తథ్యం. అది గ్లోబల్ ట్రేడ్, సెమీకండక్టర్ల సరఫరాపై తీవ్ర ప్రభావం చూపి, ప్రపంచవ్యాప్తంగా ఆర్థిక మాంద్యానికి దారితీస్తుంది. అహంకారంతో అమెరికా ఆడుతున్న ఈ ఆటలో అంతిమంగా బలిపశువు అయ్యేది సామాన్యుడే!
Also Read:
US Iran Tensions: అమెరికాకు ఇరాన్ 4 రెట్ల ప్రతీకార హెచ్చరికMiddle East Conflict : అమెరికాకు ఇరాన్ 3 అంచెల వ్యూహం
Putin Iran Meeting: మాస్కోలో పుతిన్తో ఇరాన్ మంత్రి సంచలన భేటీ!
Donald Trump : పగతో అడుగుపెట్టారు.. తూటాలతో ఆగిపోయారు!
Washington Shooting : వైట్ హౌస్ కరస్పాండెంట్స్ విందులో కాల్పుల మోత!
