పశ్చిమాసియాలో రగులుతున్న యుద్ధం కేవలం రెండు దేశాల మధ్య ఆధిపత్య పోరు కాదు, ఇది సామాన్యుడి జేబుకు చిల్లులు పొడిచే, ప్రపంచ ఆర్థిక వ్యవస్థను కుదిపేసే మహా సంగ్రామం! చమురు ధరలు మండిపోతున్న ఈ విపత్కర పరిస్థితుల్లో.. ఈ యుద్ధం ఏ మలుపు తిరుగుతుందనేది ప్రతి ఒక్కరినీ తీవ్రంగా కలవరపెడుతున్న అంశం. ఒకవైపు ఇరాన్ సైనిక శక్తిని సర్వనాశనం చేశామని డొనాల్డ్ ట్రంప్ బాంబు పేల్చగా.. దానికి ఏమాత్రం వెనక్కి తగ్గకుండా, అమెరికా సైనికుడు ఒక్కడు కూడా ప్రాణాలతో తిరిగి వెళ్లకూడదంటూ ఇరాన్ ఆర్మీ చీఫ్ మేజర్ జనరల్ అమీర్ హతామీ చేసిన భయంకరమైన ప్రకటన ఇప్పుడు యావత్ ప్రపంచాన్ని వణికిస్తోంది!
భూతల దాడులకు దిగితే.. ఒక్కడు కూడా మిగలడు!
అమెరికా అధ్యక్షుడు డొనాల్డ్ ట్రంప్ చేసిన ప్రకటన వెలువడిన కొన్ని గంటల్లోనే ఇరాన్ నుంచి ఊహించని కౌంటర్ అటాక్ మొదలైంది. అమెరికా సైన్యం గనక నేరుగా భూతల దాడులకు (గ్రౌండ్ అటాక్స్) దిగితే.. ఒక్క అమెరికా సైనికుడు కూడా ప్రాణాలతో మిగలకూడదని ఇరాన్ ఆర్మీ కమాండర్ ఇన్ చీఫ్ మేజర్ జనరల్ అమీర్ హతామీ తన దళాలకు అత్యంత కఠినమైన ఆదేశాలు జారీ చేశారు. సైనిక కమాండర్లతో ఏర్పాటు చేసిన ప్రత్యేక వీడియో కాన్ఫరెన్స్లో ఆయన ఈ సంచలన వ్యాఖ్యలు చేశారు.
ప్రజల భద్రతకు ఢోకా లేదు.. పక్కా నిఘా
శత్రువుల కదలికలపై డేగ కన్ను వేయాలని, వారు వేసే ప్రతి అడుగును క్షణక్షణం గమనించాలని హతామీ సైన్యానికి దిశానిర్దేశం చేశారు. శత్రు దేశాల అటాక్ ప్లాన్స్ను తిప్పికొట్టేందుకు సరైన సమయంలో మన వ్యూహాలను పకడ్బందీగా అమలు చేయాలని ఆయన పిలుపునిచ్చారు. ఇరాన్ ప్రజల భద్రత విషయంలో రాజీ పడే ప్రసక్తే లేదని ఆయన స్పష్టం చేశారు. దేశంపై అలుముకున్న ఈ యుద్ధ ఛాయలను శాశ్వతంగా తొలగిస్తామని ఆయన ఉద్వేగంగా ప్రతిజ్ఞ చేశారు. దేశంలో కొన్ని ప్రాంతాలు సురక్షితంగా ఉండి, మరికొన్ని ప్రాంతాల ప్రజలు బిక్కుబిక్కుమంటూ బతికే దయనీయ పరిస్థితిని మేం ఏమాత్రం సహించబోమని ఆయన కుండబద్దలు కొట్టారు. ప్రజలంతా ఎలాంటి భయం లేకుండా, పూర్తి భద్రతతో బతికేలా రక్షణ వలయం ఏర్పాటు చేస్తామన్నారు.
ఇరాన్ వెన్నెముక విరిచేశాం.. ట్రంప్ సింహగర్జన
మరోవైపు డొనాల్డ్ ట్రంప్ తన ప్రసంగంలో ఇరాన్ పతనాన్ని కళ్లకు కట్టారు. ఇరాన్ వెన్నెముకను పూర్తిగా విరిచేశామని ఆయన సగర్వంగా ప్రకటించారు. ప్రస్తుతం ఇరాన్ నౌకాదళం అంతమైపోయిందని, వారి వైమానిక దళం పూర్తిగా శిథిలావస్థకు చేరుకుందని ట్రంప్ స్పష్టం చేశారు. వారి కమాండ్ అండ్ కంట్రోల్ వ్యవస్థ ముక్కలుముక్కలైందని తెలిపారు. గడిచిన ఐదేళ్లుగా అమెరికా విజయపథంలోనే నడుస్తోందని, ఇప్పుడు అంతకంటే మించిన చారిత్రక విజయాన్ని అందుకుంటున్నామని ఆయన ధీమా వ్యక్తం చేశారు. కనీసం క్షిపణులు, డ్రోన్లు ప్రయోగించే సామర్థ్యాన్ని కూడా ఇరాన్ కోల్పోయిందని ఆయన తేల్చి చెప్పారు.
నెక్స్ట్ టార్గెట్ పవర్ ప్లాంట్లు.. ముంచుకొస్తున్న ముప్పు
రాబోయే రెండు, మూడు వారాల పాటు ఇరాన్పై దాడులు మునుపెన్నడూ లేనంత తీవ్రస్థాయిలో ఉంటాయని ట్రంప్ కఠిన హెచ్చరికలు జారీ చేశారు. ఈ దాడుల్లో ముఖ్యంగా ఇరాన్ పవర్ ప్లాంట్లే తమ తదుపరి లక్ష్యాలని ఆయన బాంబు పేల్చారు. ఎన్నో ఏళ్లుగా "డెత్ టు అమెరికా" అంటూ నినదిస్తున్న ఆ కిరాతక దేశాన్ని అంతం చేయకపోతే.. కేవలం అమెరికాకే కాకుండా యావత్ ప్రపంచ భద్రతకే ముప్పు వాటిల్లే ప్రమాదం ఉందన్నారు. ఆ మహా వినాశనాన్ని అడ్డుకునేందుకే ఈ ముందస్తు దాడులు చేస్తున్నామని ఆయన స్పష్టం చేశారు. ఇదే సమయంలో, ప్రపంచ దేశాలన్నీ కాస్త ధైర్యం చేసి 'హార్మూజ్ జలసంధి' బాధ్యతలను భుజాన వేసుకోవాలని ట్రంప్ బహిరంగంగా కోరారు.
యుద్ధం ఆగదు.. ద్రవ్యోల్బణం తప్పదు!
తాజా పరిణామాలు గమనిస్తే.. అమెరికా, ఇరాన్ రెండూ ఏమాత్రం వెనక్కి తగ్గే పరిస్థితుల్లో లేవు. ట్రంప్ చెబుతున్నట్లు రాబోయే మూడు వారాల్లో పవర్ ప్లాంట్లపై దాడులు జరిగితే, పశ్చిమాసియా పూర్తిగా చీకట్లోకి వెళ్లిపోవడం ఖాయం. దీని ప్రభావం నేరుగా ఇంధన సరఫరాపై పడి, అంతర్జాతీయంగా క్రూడాయిల్ ధరలు ఆకాశాన్ని తాకుతాయి. ఈ దాడుల పరంపర ఇలాగే కొనసాగితే.. సామాన్యులు త్వరలోనే తీవ్రమైన పెట్రోల్, డీజిల్ ధరల పెరుగుదలను, ద్రవ్యోల్బణాన్ని ఎదుర్కోక తప్పని విపత్కర పరిస్థితి రాబోతోంది.
