పశ్చిమాసియాలో బాంబుల మోత ఆగిపోలేదు.. ఇరాన్ గడ్డపై నెత్తుటి పోరు ముగిసిపోలేదు! కానీ, శత్రువు గుండెల్లోకి చొచ్చుకెళ్లి తమ వాడిని ప్రాణాలతో దక్కించుకున్న అగ్రరాజ్యం అమెరికా ఇప్పుడు విజయగర్వంతో రొమ్ము విరుస్తోంది. హాలీవుడ్ యాక్షన్ సినిమాను తలపించేలా సాగిన ఈ రెస్క్యూ ఆపరేషన్ యావత్ ప్రపంచాన్ని ఉలిక్కిపడేలా చేసింది. ఎక్కడో ఇరాన్ పర్వతాల్లో తప్పిపోయిన ఒకే ఒక్క అమెరికన్ పైలట్ కోసం వందలాది యుద్ధ విమానాలు రంగంలోకి దిగాయి! ఏ సైనికుడిని ఒంటరిగా వదిలే ప్రసక్తే లేదని అమెరికా ఇచ్చిన వాగ్దానం ఎలా నెరవేరిందో కళ్లకు కట్టే సాహసోపేతమైన కథ ఇది.
ఇరాన్ గడ్డపై అమెరికా అద్భుత విజయం!
US Completes Daring Rescue Operation Of Missing Pilot In Iran : ఇరాన్తో జరుగుతున్న ఈ భీకర యుద్ధంలో అమెరికా రక్షణ దళాలు ఎన్నడూ లేని విధంగా ఒక చారిత్రక, అద్భుత విజయాన్ని నమోదు చేశాయి. గత శుక్రవారం నాడు ఇరాన్ దళాలు అత్యంత దారుణంగా నేలకూల్చిన 'F-15E స్ట్రైక్ ఈగల్' యుద్ధ విమానానికి సంబంధించి గల్లంతైన రెండో పైలట్ను అమెరికా సైన్యం ఎట్టకేలకు సురక్షితంగా రక్షించింది. ఈ సంచలన వార్తను సాక్షాత్తూ అమెరికా అధ్యక్షుడు డొనాల్డ్ ట్రంప్ స్వయంగా ధృవీకరించారు. అమెరికా చరిత్రలోనే ఇది అత్యంత సాహసోపేతమైన, శ్వాసగండం లాంటి రెస్క్యూ ఆపరేషన్ అని ఆయన సగర్వంగా అభివర్ణించారు.
డేగ కళ్లతో నిఘా.. 48 గంటల ఉత్కంఠ
విమానం కుప్పకూలిపోయిన వెంటనే ఒక పైలట్ను అమెరికా బలగాలు ప్రాణాలతో కాపాడుకోగా.. రెండో పైలట్ ఆచూకీ కోసం గత రెండు రోజులుగా కంటిమీద కునుకులేని తీవ్ర ఉత్కంఠ నెలకొంది. ఇరాన్లోని అత్యంత ప్రమాదకరమైన, మంచుతో కప్పబడిన పర్వత ప్రాంతంలో ఆ పైలట్ ఒంటరిగా చిక్కుకుపోయాడు.
ఒకవైపు ఇరాన్ సైన్యం, అత్యంత కిరాతకమైన స్థానిక గిరిజన తెగలు అతడిని ప్రాణాలతో పట్టుకునేందుకు అడవుల్లో జల్లెడ పడుతుంటే.. మరోవైపు అమెరికా తన అత్యాధునిక శాటిలైట్ సాంకేతికతతో అతడి లోకేషన్ను నిరంతరం కంటికి రెప్పలా పర్యవేక్షించింది. కమాండర్ ఇన్ చీఫ్ ట్రంప్ నుంచి మొదలుపెడితే జాయింట్ చీఫ్స్ ఆఫ్ స్టాఫ్ వరకు ప్రతి ఒక్క అమెరికన్ అధికారి అక్షరాలా 24 గంటల పాటు ఈ డెడ్లీ ఆపరేషన్ను నిశితంగా గమనిస్తూనే ఉన్నారని ట్రంప్ వెల్లడించారు.
డజన్ల కొద్దీ విమానాలు.. సైనికుడికి ఇచ్చిన మాటే శాసనం!
ఈ ఒక్క పైలట్ ప్రాణాలు కాపాడే ఆపరేషన్ కోసం ట్రంప్ ఏకంగా డజన్ల కొద్దీ భయంకరమైన యుద్ధ విమానాలను రంగంలోకి దించారు. శత్రువుల నుంచి ఏ చిన్న ఆటంకం కలగకుండా ఉండేందుకు.. ఆ పైలట్ ఇరాన్ సరిహద్దులు దాటి సురక్షితంగా బయటపడే వరకు ఈ ఆపరేషన్ విషయాన్ని ప్రపంచానికి తెలియకుండా అత్యంత రహస్యంగా ఉంచారు.
శత్రువు భూభాగంలోకి చావును లెక్కచేయకుండా చొచ్చుకెళ్లి.. ఒక ఎయిర్మెన్ను సజీవంగా వెలికి తీసుకురావడం బహుశా అమెరికా చరిత్రలో ఇదే మొదటిసారని ట్రంప్ గర్వంగా ప్రకటించారు. "ఏ ఒక్క అమెరికన్ యోధుడిని మేము యుద్ధభూమిలో ఎప్పటికీ ఒంటరిగా వదిలిపెట్టం. మన సైనికులకు అమెరికా ఇచ్చే ఏకైక అభయహస్తం ఇదే" అని ఆయన సింహగర్జన చేశారు. ప్రస్తుతం ఆ పైలట్ అమెరికా బలగాల పూర్తి రక్షణలో ఉన్నారని, అతడి ఆరోగ్య పరిస్థితి అత్యంత నిలకడగా ఉందని వైట్ హౌస్ వర్గాలు అధికారికంగా ప్రకటించాయి.
ఇరాన్ మైండ్ గేమ్కు.. ట్రంప్ స్ట్రాంగ్ కౌంటర్!
ఈ హై-ఓల్టేజ్ రెస్క్యూ ఆపరేషన్కు ముందు ఒక భయంకరమైన మానసిక యుద్ధం నడిచింది. గల్లంతైన ఈ పైలట్ ఆచూకీ కోసం అతడి కన్నతల్లి తీవ్ర ఆందోళన వ్యక్తం చేస్తూ.. తన కొడుకు ఏమయ్యాడో అమెరికా అధికారులు తనకు ఇప్పటి వరకు చెప్పలేదని ఎక్స్ (ట్విట్టర్) వేదికగా కన్నీరు పెట్టుకున్నారు. దీనిపై ఇరాన్ వెంటనే తన కపట బుద్ధిని ప్రదర్శించింది.
పాకిస్థాన్, దక్షిణాఫ్రికాలోని ఇరాన్ ఎంబసీలు స్పందిస్తూ.. "ట్రంప్ పర్యవేక్షణలో ఉండటం కంటే.. మా బందీలుగా ఉండటమే మీ బిడ్డలకు అత్యంత క్షేమం" అంటూ అమెరికాను రెచ్చగొట్టాయి. ముఖ్యంగా ట్రంప్ వల్లే మీ బిడ్డల ప్రాణాలకు అసలైన ముప్పు ఉందంటూ హెచ్చరికలు జారీ చేశాయి. కానీ, ఇరాన్ చేసిన ఈ మైండ్ గేమ్ హెచ్చరికలు గాలిలో కలిసిపోయేలా.. సరిగ్గా కొన్ని గంటల్లోనే డొనాల్డ్ ట్రంప్ తమ రెండో పైలట్ను ప్రాణాలతో దక్కించుకున్నట్లు ప్రకటించి ఇరాన్ నోరు మూయించారు.
ఒక సైనికుడి కోసం దేశం మొత్తం నిలబడిందంటే ఆ దేశ భద్రతా వ్యవస్థపై ప్రజలకు ఎంతటి అపారమైన నమ్మకం ఉంటుందో ఈ ఘటనే నిదర్శనం. ఇరాన్ మైండ్ గేమ్ ఆడి అమెరికాను మానసికంగా దెబ్బతీయాలని చూసినా.. ట్రంప్ ఆచరణలో చూపించిన తెగువ శత్రువుకు గుండెదడ పుట్టించింది. ఈ రెస్క్యూ ఆపరేషన్ పశ్చిమాసియా యుద్ధంలో అమెరికా పట్టును మరింత బలోపేతం చేస్తుందనడంలో ఎలాంటి సందేహం లేదు!
Also Read:
US Iran Conflict: అమెరికన్ పైలట్ తల్లికి ఇరాన్ రిప్లైIndia Pakistan War : పాకిస్థాన్ కవ్వింపులు.. కోల్కతాపై గురి!
ఇరాన్ అణు కేంద్రం వద్ద క్షిపణి దాడి.. దద్దరిల్లిన ప్రపంచం!
ప్రాణం పోతున్నా పక్కవారి కోసం పరితపించిన యువతి.. హృదయాన్ని కదిలించే కథ
ఇరాన్లో అమెరికా ఎఫ్-15 కూల్చివేత: మిస్సయిన పైలట్ కోసం వేట
