ఒకప్పుడు ఐటీ జాబ్ అంటే ఏసీ క్యాబిన్, లక్షల్లో జీతం, లైఫ్ సెటిల్డ్! కానీ ఇప్పుడు ఆ పదం వింటేనే వణుకు పుడుతోంది. మనిషి తన మేధస్సుతో సృష్టించిన 'ఆర్టిఫిషియల్ ఇంటెలిజెన్స్' (AI) ఇప్పుడు మనిషి పొట్టే కొడుతోంది. ఈ టెక్ సునామీలో ఏ క్షణాన ఎవరికి పింక్ స్లిప్ వస్తుందో తెలియక టెకీలు బిక్కుబిక్కుమంటున్నారు. ఈ భయంకరమైన నిజం సామాన్యుడిని ఎందుకు కలవరపెడుతోందో చెప్పే ఒక కన్నీటి గాథ ఇప్పుడు సోషల్ మీడియాను కుదిపేస్తోంది!
పదిహేనేళ్ల అనుభవం.. మెక్డొనాల్డ్స్లో ఊడిగం!
పదిహేనేళ్ల పాటు కోడింగ్తో కుస్తీ పట్టి, తన అనుభవంతో కంపెనీకి లాభాలు తెచ్చిపెట్టిన ఓ సీనియర్ సాఫ్ట్వేర్ డెవలపర్ ఆవేదన ఇప్పుడు ఎక్స్ (X) వేదికగా గుండెలను పిండేస్తోంది. 8 నెలల క్రితం ఏఐ రూపంలో వచ్చిన ఓ విపత్తు అతని నిండు ఉద్యోగాన్ని బలితీసుకుంది. ఏకంగా 12 మంది సీనియర్ ఐటీ నిపుణులు ఉన్న ఆ టీమ్ మొత్తాన్ని కంపెనీ నిర్దాక్షిణ్యంగా రోడ్డున పడేసింది. వారి స్థానంలో కేవలం ఇద్దరు ఏఐ నిపుణులను మాత్రమే కుర్చీలో కూర్చోబెట్టింది!
వందకు పైగా రిజెక్షన్స్.. ఆకలి తీర్చని కోడింగ్
ఉద్యోగం పోయిన తర్వాత ఆ సీనియర్ ఇంజినీర్ పడ్డ నరకం అంతా ఇంతా కాదు. కోటి ఆశలతో వందకు పైగా కంపెనీల తలుపులు తట్టాడు. కానీ, ఏఐ కమ్మేసిన టెక్ ప్రపంచంలో అతనికి ఒక్క అవకాశం కూడా దక్కలేదు. చివరకు కుటుంబ పోషణ కోసం, తన పిల్లల ఆకలి తీర్చడం కోసం.. ఏసీ రూమ్లో కోడింగ్ రాసిన ఆ చేతులతోనే మెక్ డొనాల్డ్స్ (McDonald's) లో క్లీనింగ్ పనుల్లో చేరాడు. తనలాగే ఎంతోమంది సీనియర్ ఇంజినీర్లు ఐటీకి ఏమాత్రం సంబంధం లేని పనుల్లో చేరుతూ బతుకులీడుస్తున్నారని అతడు పెట్టిన పోస్టు ఇప్పుడు నెట్టింట దావానలంలా మండుతోంది.
రెండుగా చీలిన నెటిజన్లు.. మారుతున్న ట్రెండ్
ఈ హృదయ విదారకమైన పోస్టుపై సోషల్ మీడియా రెండు వర్గాలుగా విడిపోయి తీవ్ర చర్చకు తెరతీసింది. కొందరు నెటిజన్లు ఆ ఇంజినీర్ ఆవేదనను చూసి కంటతడి పెట్టుకుంటూ సానుభూతి వ్యక్తపరుస్తున్నారు. మరికొందరు మాత్రం పరిస్థితులను తప్పుబడుతూ వ్యతిరేక కామెంట్లు పెడుతున్నారు. అయితే, "కాలంతో పాటు మారాలి, కొత్త ఏఐ సాధనాలను నేర్చుకుంటే డిమాండ్ మీ వెంటే పరుగులు తీస్తుంది" అని ఇంకొందరు అనుభవజ్ఞులు తమ విలువైన సలహాలు ఇస్తున్నారు.
దిగ్గజాల ఉక్కుపాదం.. ఆగని లేఆఫ్స్ కార్చిచ్చు
ఇది కేవలం ఒక్క ఇంజినీర్ కథ మాత్రమే కాదు, ఐటీ సామ్రాజ్యంలో రగులుతున్న కార్చిచ్చు! కోవిడ్ మహమ్మారి సమయంలో మొదలైన లేఆఫ్స్ (Layoffs) భూతం.. ఇప్పుడు ఏఐ రూపంలో మరింత ఉగ్రరూపం దాల్చి కొనసాగుతూనే ఉంది. నిన్నమొన్నటి వరకు టెక్ దిగ్గజాలుగా వెలుగొందుతున్న గూగుల్, మైక్రోసాఫ్ట్, మెటా, అమెజాన్ లాంటి సంస్థలు ఇప్పటికే వేలాది మందిని నిర్దాక్షిణ్యంగా ఇంటికి పంపేశాయి. భవిష్యత్తులో ఈ కోతలు మరింత తీవ్రంగా ఉంటాయని పరోక్ష సంకేతాలు కూడా ఇచ్చాయి.
వణికిస్తున్న ఒరాకిల్.. దేశీయ కంపెనీల బాట
తాజాగా ప్రముఖ టెక్ సంస్థ ఒరాకిల్ (Oracle) ఏకంగా 30 వేల మంది ఉద్యోగులకు ఉద్వాసన పలుకుతున్నట్లు ప్రకటించడం ఐటీ లోకాన్ని బెంబేలెత్తిస్తోంది. ఇక మన దేశీయ ఐటీ కంపెనీలు సైతం ఇదే బాటలో నడుస్తూ ఖర్చు తగ్గింపు పేరుతో ఉద్యోగుల మెడపై కత్తి వేలాడదీస్తున్నాయి. దీంతో రేపు ఉదయం ఆఫీస్కు వెళ్లేసరికి తమ కుర్చీ ఉంటుందో ఊడుతుందో తెలియని భయంతో సాఫ్ట్వేర్ ఉద్యోగులు తీవ్ర మానసిక ఒత్తిడికి లోనవుతున్నారు.
ఏఐ అనేది ఉద్యోగాలు మింగేసే మాయదారి రాక్షసి కాదు, అదొక పదునైన ఆయుధం. ఏఐ వల్ల ఏ ఒక్కరి ఉద్యోగం పోదు.. కానీ, "ఏఐ వాడటం తెలిసిన వాడి చేతిలో, ఏఐ వాడటం తెలియని వాడి ఉద్యోగం" కచ్చితంగా పోతుంది! 15 ఏళ్ల అనుభవం ఉన్నా సరే, కొత్త టెక్నాలజీతో అప్స్కిల్ (Upskill) కాకపోతే కాలగర్భంలో కలిసిపోక తప్పదు. టెక్ ప్రపంచంలో ఇక సర్వైవల్ ఆఫ్ ద ఫిట్టెస్ట్ కాదు, 'సర్వైవల్ ఆఫ్ ద అప్డేటెడ్'! మీ స్కిల్స్కి పదును పెట్టండి, లేదంటే మీ కెరీర్కి ఏఐ ఎండ్ కార్డ్ వేస్తుంది!
Also Read:
స్టాక్ మార్కెట్లో సైలెంట్ అయిన కుర్రకారు.. వెనకున్న భయం ఇదే!RBI ECL Norms: నష్టం రాకముందే నిధులు దాచాలి.. ఆర్బీఐ కొత్త ఈసీఎల్ విధానం అంటే ఏంటి?
పేటీఎంకు ఆర్బీఐ ఊహించని షాక్.. లైసెన్స్ రద్దు, యూపీఐ ఆగిపోతుందా?
IT Jobs Hiring : టీసీఎస్, ఇన్ఫోసిస్, విప్రో శుభవార్త.. కానీ ఆ స్కిల్స్ మస్ట్
Reliance Q4 Results: క్వార్టర్ 4లో లాభాలు డౌన్.. కానీ ఇన్వెస్టర్లకు డివిడెండ్ ప్రకటించిన రిలయన్స్
