గ్రౌండ్లో సిక్సర్లు కొట్టాల్సిన చేతులు.. ఇప్పుడు స్మార్ట్ఫోన్ పట్టుకుని 'రీల్స్' చేస్తున్నాయా? క్రికెట్ దేవుళ్లుగా కొలిచే అభిమానులకు ఈ కొత్త ట్రెండ్ ఒక చేదు వాస్తవాన్ని చూపిస్తోంది. అభిమానులు తమ విలువైన సమయాన్ని వెచ్చించి ఎంతో భావోద్వేగంతో మ్యాచ్లు చూస్తుంటే, కొందరు ఆటగాళ్లు మాత్రం వ్యూస్ కోసం, లైకుల కోసం సోషల్ మీడియాలో వెంపర్లాడటం తీవ్ర చర్చనీయాంశంగా మారింది. ఈ నేపథ్యంలోనే ఐపీఎల్ 2026 సీజన్లో ఆటగాళ్ల ప్రవర్తనపై స్వయంగా ఐపీఎల్ ఛైర్మన్ అరుణ్ ధుమాల్ సంచలన వ్యాఖ్యలు చేశారు.
రీల్స్ కాదు.. రియాలిటీ ముఖ్యం!
క్రికెటర్లు తమ దృష్టిని స్మార్ట్ఫోన్ స్క్రీన్పై కాకుండా, మైదానంలోని రియాలిటీపై పెట్టాలని అరుణ్ ధుమాల్ గట్టిగా సూచించారు. ఐఏఎన్ఎస్కు ఇచ్చిన ఓ ప్రత్యేక ఇంటర్వ్యూలో ఆయన స్టార్ బ్యాటర్ విరాట్ కోహ్లీని పర్ఫెక్ట్ ఉదాహరణగా చూపించారు.
విరాట్ కోహ్లీకి ప్రపంచవ్యాప్తంగా కోట్ల కొద్దీ సోషల్ మీడియా ఫాలోయింగ్ ఉన్నా, మైదానంలో అడుగుపెడితే అతని ఫోకస్ నూటికి నూరుపాళ్లు ఆట మీదే ఉంటుందని గుర్తుచేశారు. కోహ్లీ ఆ రేంజ్ ఫాలోయింగ్ సంపాదించుకుంది రీల్స్ చేయడం వల్ల కాదని, తన అద్భుతమైన ప్రదర్శన వల్లే అని ఆయన స్పష్టం చేశారు. టోర్నీ జరుగుతున్న అత్యంత కీలక సమయంలో ఆటగాళ్లు సోషల్ మీడియా మాయలో పడిపోకూడదని హెచ్చరించారు.
వ్లాగ్స్ తెచ్చిన తలనొప్పి.. వివాదాల సుడిగుండం
ఇటీవల వెలుగుచూసిన కొన్ని సోషల్ మీడియా వివాదాలే అరుణ్ ధుమాల్ తీవ్ర వ్యాఖ్యలకు దారితీశాయి. ముఖ్యంగా భారత పేసర్ అర్ష్దీప్ సింగ్ అత్యుత్సాహంతో చేసిన ట్రావెల్ వ్లాగ్స్ పెద్ద దుమారమే రేపాయి.
ఒక వీడియోలో మణికట్టు స్పిన్నర్ యుజ్వేంద్ర చాహల్ విమాన ప్రయాణంలో 'వేపింగ్' (ఈ-సిగరెట్) చేస్తున్నట్లు కనిపించడం తీవ్ర విమర్శలకు దారితీసింది. ఆ వీడియో వైరల్ అవ్వగానే హడావిడిగా దాన్ని ఎడిట్ చేసి మళ్లీ అప్లోడ్ చేశారు.
దీనికి తోడు మరో వీడియోలో సహచర ఆటగాడు తిలక్ వర్మను ఉద్దేశించి అర్ష్దీప్ చేసిన వ్యాఖ్యలు వివాదాస్పదంగా మారాయి. తిలక్ను చూసి 'అంధేరే' (చీకటి) అని కామెంట్ చేయడం, సన్స్క్రీన్ వాడాలని సలహా ఇవ్వడాన్ని చాలామంది నెటిజన్లు జాత్యహంకార వ్యాఖ్యలుగా పరిగణించి తీవ్రంగా మండిపడ్డారు.
రంగంలోకి బీసీసీఐ.. ఫ్రాంచైజీలకు డెడ్ లైన్
ఆటగాళ్ల ఆన్లైన్ ప్రవర్తన శృతి మించుతుండటంతో భారత క్రికెట్ నియంత్రణ మండలి (BCCI) సీరియస్ యాక్షన్ తీసుకుంది. ఐపీఎల్ ఫ్రాంచైజీలన్నింటికీ కఠినమైన కొత్త మార్గదర్శకాలను జారీ చేసింది.
సోషల్ మీడియాలో ఎలా ప్రవర్తించాలి, యాంటీ కరప్షన్ నిబంధనలు ఏంటి, స్మోకింగ్-వేపింగ్ నియంత్రణలపై స్పష్టమైన రూల్స్ పాస్ చేసింది. ప్రపంచంలోనే అత్యంత ఖరీదైన ఈ లీగ్ ప్రతిష్టను దిగజార్చేలా ప్రవర్తిస్తే ఊరుకునేది లేదని తేల్చి చెప్పింది. ఈ నిబంధనలను ఎవరైనా అతిక్రమిస్తే భారీ జరిమానాతో పాటు టోర్నీ నుంచి శాశ్వత నిషేధం కూడా ఎదుర్కోవాల్సి వస్తుందని బీసీసీఐ వార్నింగ్ ఇచ్చింది.
ఐపీఎల్ అనేది కేవలం రెండు నెలల ఎంటర్టైన్మెంట్ మాత్రమే కాదు, వేలాది మంది యువ ఆటగాళ్లు దేశం కోసం ఆడే అవకాశం దక్కించుకునే ఒక పవిత్రమైన వేదిక. సోషల్ మీడియాలో వచ్చే నాలుగు లైకుల కోసం తోటి ఆటగాళ్ల పరువు తీయడం, నిషేధిత వస్తువులు వాడుతూ అడ్డంగా దొరికిపోవడం వారి కెరీర్కే కాదు, వారిని ఆదర్శంగా తీసుకునే యువతకు కూడా చేటు చేస్తుంది. కోహ్లీ లాంటి లెజెండ్స్ సాధించిన విజయాల వెనుక ఉన్న 'చెమట'ను చూడకుండా, వారి 'గ్లామర్'ను మాత్రమే ఫాలో అయితే రేపు ఈ యువ క్రికెటర్ల కెరీర్ కూడా ఒక 'షార్ట్ వీడియో' లాగానే త్వరగా ముగిసిపోవడం ఖాయం!
Also Read:
Virat Kohli: ఐపీఎల్ కంటెంట్ కల్చర్పై కోహ్లీ అసహనం!ICC WTC Points Table: పాకిస్థాన్కు ఐసీసీ భారీ షాక్
India vs Bangladesh : బీసీబీ పశ్చాత్తాపం.. త్వరలో సిరీస్!
Virat Kohli Manjrekar : విరాట్ కోహ్లీ మనస్తత్వంపై మంజ్రేకర్ షాకింగ్ కామెంట్స్
ఒకప్పుడు 150 గగనం.. ఇప్పుడు 280 దాటుతున్న స్కోర్లు, మారిన ఐపీఎల్ తీరు!
