Bermuda Island Mystery : అట్లాంటిక్ మహాసముద్రం మధ్యలో ఉన్న బెర్ముడా దీవి గురించి వినగానే మనకు ముందుగా గుర్తొచ్చేది 'బెర్ముడా ట్రయాంగిల్' మిస్టరీ. కానీ ఆ దీవి అట్టడుగున అంతకంటే భయంకరమైన, ఆశ్చర్యకరమైన మరో మహా రహస్యం దాగి ఉందన్న నిజం ఇప్పుడు ప్రపంచాన్ని ఉలిక్కిపడేలా చేస్తోంది. మన పాదాల కింద ఉన్న భూమి ఎప్పుడు, ఎలా మారుతుందో, ప్రకృతి తన గర్భంలో ఎలాంటి వింతలను దాచుకుందో తెలిస్తే.. ఒక సామాన్యుడిగా భూమి గురించి మీరు ఇప్పటిదాకా చదువుకున్న సైన్స్ అంతా తలకిందులవ్వడం ఖాయం! అసలు భూగర్భ శాస్త్రవేత్తలనే వణికిస్తున్న ఆ బెర్ముడా అసలు కథేంటో ఇక్కడ తెలుసుకోండి.
నిద్రపోతున్న అగ్నిపర్వతాలు.. అయినా సముద్రంపైనే!
బెర్ముడా దీవిలోని అగ్నిపర్వతాలు బద్దలవడం ఆగిపోయి దాదాపు 3 కోట్ల ఏళ్లు గడిచిపోయింది. సాధారణంగా ఇలా అగ్నిపర్వతాలు చల్లబడితే, కాలక్రమేణా ఆ దీవులు బరువుకు సముద్రంలోకి కుంగిపోవాలి.
కానీ విచిత్రంగా బెర్ముడా దీవి మాత్రం చుట్టుపక్కల ఉన్న సముద్రగర్భం కంటే ఏకంగా 1,600 అడుగుల ఎత్తులో సగర్వంగా నిలబడి ఉంది. దశాబ్దాలుగా భూగర్భ శాస్త్రవేత్తల బుర్రలను తొలిచేస్తున్న ఈ అతిపెద్ద మిస్టరీని అమెరికన్ సైంటిస్టులు ఎట్టకేలకు ఛేదించారు.
భూకంపాల తరంగాలతో వేట..
కార్నెగీ సైన్స్ సంస్థకు చెందిన సీస్మోలజిస్ట్ విలియం ఫ్రేజర్, యేల్ యూనివర్సిటీకి చెందిన జెఫ్రీ పార్క్ కలిసి ఈ అంతుచిక్కని రహస్యాన్ని బయటపెట్టారు. ప్రపంచవ్యాప్తంగా వచ్చిన భారీ భూకంపాల తరంగాలను వీరు తమ పరిశోధనకు ఆయుధంగా వాడుకున్నారు.
ధ్వని తరంగాలు మారినట్లే, భూకంప తరంగాలు కూడా భూమి పొరల్లోకి వెళ్లినప్పుడు వాటి వేగం మారుతుంటుంది. ఆ లెక్కల ఆధారంగా బెర్ముడా దీవి కింద సుమారు 20 మైళ్ల లోతు వరకు అసలేం ఉందో వీరు అత్యంత స్పష్టమైన చిత్రాన్ని ఆవిష్కరించారు.
భూమి కింద 12 మైళ్ల 'రాతి పడవ'!
హవాయి లాంటి దీవులు భూమి లోపలి నుంచి ఉబికి వచ్చే వేడి లావా (మ్యాంటిల్ ప్లూమ్) వల్ల ఏర్పడతాయి. ఆ లావా చల్లబడ్డాక అవి సహజంగానే సముద్రంలోకి కుంగిపోతాయి. కానీ బెర్ముడా కింద శాస్త్రవేత్తలు ఏకంగా 12 మైళ్ల మందంతో ఉన్న ఒక విచిత్రమైన రాతి పొరను గుర్తించారు.
చుట్టూ ఉన్న పొరల కంటే ఇది చాలా తేలికగా ఉండటంతో, అది సముద్రం కింద ఒక అతిపెద్ద 'పడవ' (Raft) లాగా పనిచేస్తోంది. అదే బెర్ముడా దీవిని మునిగిపోకుండా వేలాది ఏళ్లుగా పైకి ఎత్తి పట్టుకుంటోంది. దీన్నే భూగర్భ పరిభాషలో 'అండర్ప్లేటింగ్' అని పిలుస్తారు.
పాంజియా కాలం నాటి పురాతన బంధం..
కోట్లాది సంవత్సరాల క్రితం భూమిపై ఉన్న ఖండాలన్నీ కలిసి 'పాంజియా' అనే ఒకే మహాఖండంగా ఉండేవి. ఆ సమయంలోనే కార్బన్తో నిండిన ద్రవ శిలలు పైకి వచ్చి చల్లబడి ఈ అండర్ప్లేటింగ్గా మారి ఉంటాయని శాస్త్రవేత్తలు భావిస్తున్నారు.
ఈ సరికొత్త ఆవిష్కరణ గురించి విలియం ఫ్రేజర్ మాట్లాడుతూ.. "భూమి లోపలి పదార్థాలు పైకి వచ్చే దారి గురించి మనం ఇప్పటివరకు నమ్మిన సిద్ధాంతాలకు బెర్ముడా పూర్తిగా భిన్నంగా ఉంది. భూగర్భంలో మనకు ఇంకా అర్థంకాని ఎన్నో ప్రక్రియలు జరుగుతున్నాయి" అని స్పష్టం చేశారు.
శాస్త్రసాంకేతిక రంగాల్లో మనం ఎంత ఎదిగినా, మన పాదాల కింద ఉన్న భూగర్భం ఇంకా ఒక అంతుచిక్కని అద్భుతమే. కేవలం భూకంపాలు, అగ్నిపర్వతాలు మాత్రమే కాదు, భూమి లోపల ఇలాంటి అదృశ్య 'రాతి పడవలు' ఖండాలను, దీవులను మోస్తున్నాయన్న నిజం రేపటి తరాలకు సరికొత్త పాఠం. ఒక బెర్ముడాయే ఇలా ఉంటే, భూమి మీద ఇంకెన్ని దీవుల కింద ఇలాంటి రహస్యాలు దాగి ఉన్నాయో త్వరలోనే ప్రపంచం ముందు బయటపడటం ఖాయం!
