ఆకాశం వైపు చూసి మనం మురిసిపోతున్నాం. సిగ్నల్స్ లేని మారుమూల ప్రాంతాలకు కూడా హైస్పీడ్ ఇంటర్నెట్ వచ్చిందని సంబరపడుతున్నాం. కానీ, అదే ఇంటర్నెట్ కోసం రోదసిలోకి దూసుకెళ్తున్న రాకెట్లు.. మన ప్రాణాధారమైన సూర్యరశ్మిని భూమికి చేరనీయకుండా అడ్డుకట్ట వేస్తున్నాయన్న భయంకరమైన నిజం మీకు తెలుసా? "నాకైతే ఫోన్లో ఇంటర్నెట్ వస్తోంది కదా, ఎక్కడో ఆకాశంలో ఏం జరిగితే నాకేంటి?" అని సామాన్యుడు తేలిగ్గా తీసుకుంటే, భవిష్యత్తులో మనకంటే ముందు మన పర్యావరణమే ఊపిరితిత్తులు పగిలి చనిపోవడం ఖాయం!
ప్రాణదాతకే ముప్పు.. అంధకారమవుతున్న ఆకాశం
మనిషి సాంకేతిక దాహానికి అంతరిక్షం బలిపీఠంగా మారుతోంది. నిరంతరాయంగా సాగుతున్న రాకెట్ ప్రయోగాలు, పాతబడిపోయిన ఉపగ్రహాల శిథిలాలు మన భూమి పైకప్పును తీవ్రంగా కలుషితం చేస్తున్నాయి. బ్రిటన్కు చెందిన ప్రఖ్యాత 'యూనివర్సిటీ కాలేజ్ లండన్' (యూసీఎల్) పరిశోధకులు చేసిన తాజా అధ్యయనం ప్రపంచ దేశాల గుండెల్లో గుబులు రేపుతోంది. మే 14న 'ఎర్త్ ఫ్యూచర్' జర్నల్లో ప్రచురితమైన ఒక కీలక పరిశోధనా పత్రం.. ఈ అంతరిక్ష కాలుష్యం వెనుక ఉన్న భయానక వాస్తవాలను కళ్లకు కట్టింది.
దశాబ్దాల పాటు వాతావరణంలో విషపు పొగ
యూసీఎల్ శాస్త్రవేత్తలు కానర్ ఆర్.బార్కర్, ప్రొఫెసర్ ఎలోయిస్ ఎ.మరైస్, ఎరిక్ వై నేతృత్వంలోని బృందం 2020 నుంచి 2022 మధ్య జరిగిన అంతరిక్ష ప్రయోగాలపై లోతైన పరిశోధన చేసింది. భూమి మీద కాలుష్యం ఉంటే వానొచ్చినప్పుడు ఆ మసి అంతా కొట్టుకుపోతుంది. కానీ, ఎగువ వాతావరణంలో గాలి ప్రసరణ చాలా నెమ్మదిగా ఉంటుంది. అక్కడ కురిసేందుకు వర్షాలు ఉండవు. దీనివల్ల రాకెట్లు వదిలేసిన విషపూరిత రసాయనాలు, నల్లటి మసి దశాబ్దాల పాటు అక్కడే తిష్ఠవేసి భూమిపైకి వచ్చే సూర్యరశ్మిని దారుణంగా అడ్డుకుంటున్నాయని ప్రధాన పరిశోధకుడు కానర్ బార్కర్ కుండబద్దలు కొట్టారు.
స్పేస్ ఎక్స్, అమెజాన్.. ఆకాశంలో కార్పొరేట్ వార్!
ఈ మహా వినాశనానికి ప్రధాన కారణం అమెరికా కుబేరుడు ఎలాన్ మస్క్కు చెందిన స్పేస్ ఎక్స్ 'స్టార్లింక్' ప్రాజెక్టే అని నివేదిక స్పష్టం చేసింది. ఇప్పటికే 12 వేల ఉపగ్రహాలను కక్ష్యలోకి పంపిన ఈ సంస్థ, ఈ దశాబ్దం ముగిసేనాటికి మరో 65 వేల శాటిలైట్లను పంపేందుకు బరిలోకి దిగుతోంది. వీరు వాడుతున్న ఫాల్కన్ 9 రాకెట్లలో కిరోసిన్ ఆధారిత ఇంధనం మండి, భారీ స్థాయిలో 'బ్లాక్ కార్బన్' లేదా మసి ఆకాశాన్ని కమ్మేస్తోంది. వీరికి పోటీగా అమెజాన్ సంస్థ తమ సొంత ఇంటర్నెట్ 'లియో' నెట్వర్క్తో, చైనా 'గువాంగ్' పేరుతో వేలాది ఉపగ్రహాలను ఆకాశంలోకి వదిలేందుకు క్యూ కట్టాయి.
రాబోయేది పర్యావరణ ప్రళయమేనా?
ఇలాగే ప్రయోగాలు కొనసాగితే 2029 నాటికి ఏటా 870 టన్నుల భయంకరమైన మసి వాతావరణంలోకి చేరుతుందని అంచనా. ఈ కాలుష్యం భూమిని కాస్త చల్లబరుస్తున్నట్లు (జియో ఇంజినీరింగ్ తరహాలో) భ్రమ కలిగించినా.. దీర్ఘకాలంలో వాతావరణ గతిని మార్చేసి ఊహించని ప్రకృతి విపత్తులకు దారి తీస్తుందని ప్రొఫెసర్ ఎలోయిస్ హెచ్చరిస్తున్నారు. దానికి తోడు రాకెట్ల నుంచి వెలువడే క్లోరిన్ రసాయనాల వల్ల భవిష్యత్తులో ప్రాణకోటిని కాపాడే ఓజోన్ పొరకు కూడా పెను ముప్పు పొంచి ఉంది.
అంతరిక్షం ఎవరి సొత్తూ కాదు.. కానీ బహుళజాతి కార్పొరేట్ సంస్థలు తమ బిలియన్ డాలర్ల వ్యాపారం కోసం ఆకాశాన్ని ఒక చెత్తబుట్టలా మార్చేస్తున్నాయి. కేవలం గ్లోబల్ ఇంటర్నెట్ వస్తుందన్న ఒకే ఒక్క కారణంతో ఈ రాకెట్ కాలుష్యాన్ని సామాన్యుడు చూసీ చూడనట్లు వదిలేస్తే.. రేపు పీల్చుకోవడానికి స్వచ్ఛమైన గాలి, బతకడానికి అవసరమైన సూర్యరశ్మి రెండూ కరువవుతాయి. ఆకాశం పూర్తిగా అంధకారంగా మారకముందే, పరిస్థితి చేజారకముందే ఈ కార్పొరేట్ స్పేస్ రేస్పై అంతర్జాతీయంగా కఠినమైన చట్టాలు తీసుకురావాల్సిన సమయం ఆసన్నమైంది!
Also Read:
Global Energy Crisis : ట్రంప్ హెచ్చరికతో నిలిచిపోయిన చమురు సరఫరా!Cuba Energy Crisis: ఇంధన లేమితో అంధకారంలో క్యూబా
స్టూడెంట్ వీసాతో వెళ్లి ఎంపీ అయ్యాడు: స్కాట్లాండ్లో మనోడి చరిత్ర!
US Iran War Updates : కువైట్పై ఇరాన్ భూతల దాడి!
Israel Iran Conflict : ఇజ్రాయెల్ ఒంటరి కాదు.. అండగా భారత్!
