కళ్ల ముందే అధికారం చేజారిపోతుంటే.. దశాబ్దాల రాజకీయ సామ్రాజ్యం బీటలు వారుతుంటే.. ఆ ఉత్కంఠ ఎలా ఉంటుంది? తమిళనాడు రాజకీయ చరిత్రలో కనీవినీ ఎరుగని ఓ పెను ప్రకంపన ఇప్పుడు యావత్ దేశాన్ని కుదిపేస్తోంది! ఎగ్జిట్ పోల్స్ లెక్కలను చెత్తబుట్టలో వేస్తూ.. సగటు ఓటరు ఇచ్చిన తీర్పు ఏకంగా 60 ఏళ్ల ద్రావిడ రాజకీయ కోటలను బద్దలుకొడుతోంది. సినిమా గ్లామర్ కాదు.. పక్కా గ్రౌండ్ వర్క్ దెబ్బకు అధికార డీఎంకే (DMK) ఏకంగా మూడో స్థానానికి పడిపోయిందంటే ఈ ఫలితాలు సామాన్యుడి ఓటుకున్న పవర్ను ఎలా నిరూపిస్తున్నాయో అర్థం చేసుకోండి! దళపతి విజయ్ టీవీకే (TVK) పార్టీ సింగిల్ లార్జెస్ట్ పార్టీగా అవతరించినా.. 'మ్యాజిక్ ఫిగర్' దగ్గర ఏర్పడిన ఉత్కంఠ ఇప్పుడు కొత్త రాజకీయ చదరంగానికి తెరతీస్తోంది.
బద్దలైన కోటలు.. మూడో స్థానానికి పడిపోయిన డీఎంకే!
మరోసారి అధికారం మాదే అని చొక్కా కాలర్ ఎగరేసిన డీఎంకేకి తమిళ ఓటరు ఊహించని గుణపాఠం చెప్పాడు. మెజార్టీ ఎగ్జిట్ పోల్స్ అంచనాలకు భిన్నంగా విజయ్ నేతృత్వంలోని తమిళగ వెట్రి కళగం (TVK) అత్యధిక స్థానాలతో ప్రభంజనం సృష్టిస్తోంది.
అటు ప్రతిపక్ష అన్నాడీఎంకే సైతం ఊహించిన దానికంటే ఎక్కువ సీట్లను కొల్లగొట్టడంతో.. అధికార డీఎంకే పరిస్థితి కుడితిలో పడ్డ ఎలుకలా మారింది. మొన్నటి వరకు అధికార దర్పంతో ఉన్న డీఎంకే నేతలు.. హఠాత్తుగా మూడో స్థానానికి పడిపోవడంతో ఆ పార్టీ శ్రేణుల్లో తీవ్ర నైరాశ్యం, శ్మశాన వైరాగ్యం నెలకొన్నాయి.
సీఎం పీఠానికి పది అడుగుల దూరం..
కానీ, అసలు ఉత్కంఠ ఇక్కడే మొదలైంది! టీవీకే అతిపెద్ద పార్టీగా అవతరించి సునామీ సృష్టించినా.. మ్యాజిక్ ఫిగర్ (మెజార్టీ మార్కు) కు కొద్ది దూరంలో ఆగిపోయే సూచనలు బలంగా కనిపిస్తున్నాయి. 234 స్థానాలు ఉన్న తమిళనాడు అసెంబ్లీలో అధికారం చేపట్టాలంటే 118 మంది ఎమ్మెల్యేల బలం కావాలి.
కానీ, ఇప్పటివరకు అందిన ట్రెండ్స్ ప్రకారం టీవీకే అభ్యర్థులు 108 స్థానాల్లో ముందంజలో ఉన్నారు. మరి ఈ మ్యాజిక్ ఫిగర్ను విజయ్ ఎలా దాటుతాడు? సీఎం పీఠాన్ని అధిష్ఠించడానికి దళపతి ముందున్న ఆ మూడు దారులు ఏంటి?
సింగిల్ డిజిట్ పార్టీల సపోర్ట్.. కానీ తలనొప్పులే!
విజయ్ ముందున్న మొదటి ఆప్షన్.. డీఎంకే, అన్నాడీఎంకేలను పక్కనపెట్టి తమిళనాడులోని చిన్న చిన్న పార్టీలను కలుపుకుపోవడం. కాంగ్రెస్, పీఎంకే, సీపీఐ, వీసీకే లాంటి సింగిల్ డిజిట్ సీట్లు దక్కించుకున్న పార్టీలతో సంకీర్ణ ప్రభుత్వం ఏర్పాటు చేయడం.
కానీ, ఇది కత్తిమీద సాము లాంటిదే! ఈ పార్టీలకు మంత్రివర్గంలో స్థానాలు కట్టబెట్టాలి, ప్రభుత్వం తీసుకునే కీలక నిర్ణయాల్లో వాళ్ల జోక్యం పెరిగిపోతుంది. తొలిసారి ఎన్నికల్లో పోటీ చేసి, ఏ రాజకీయ అనుభవం లేని విజయ్.. ఎంతో చాకచక్యం అవసరమైన ఈ సంకీర్ణ ప్రభుత్వాన్ని ఎలా నెట్టుకొస్తాడన్నది అతిపెద్ద ప్రశ్నార్థకం!
అన్నాడీఎంకేతో పొత్తు.. పళనిస్వామి అనుభవం ప్లస్ అవుతుందా?
రెండో దారి.. ప్రస్తుతం రాష్ట్రంలో రెండో అతిపెద్ద పార్టీగా అవతరించనున్న అన్నాడీఎంకేతో చేతులు కలపడం. టీవీకే, అన్నాడీఎంకే పొత్తు కుదిరితే మెజార్టీ మార్కును చిటికెలో దాటేయొచ్చు.
దానికి తోడు అన్నాడీఎంకే ప్రధాన కార్యదర్శి ఎడప్పాడి పళనిస్వామి అనుభవం.. కొత్తగా ఏర్పడే విజయ్ ప్రభుత్వానికి ఎంతో ఉపయోగపడుతుందనే వాదనలు వినిపిస్తున్నాయి. అయితే, ఇది రాజకీయంగా చాలా సున్నితమైన అంశం. గత కొన్నేళ్లుగా బీజేపీతో కలిసి నడిచిన అన్నాడీఎంకేతో విజయ్ పొత్తు కుదుర్చుకుంటాడా అన్నది పెద్ద సందేహమే.
డీఎంకేతో రాజీ?.. జనానికి ఏం సమాధానం చెప్తారు?
ఇక విజయ్ ముందున్న చివరి, అతి తక్కువ ప్రాధాన్యం ఉన్న మూడో దారి.. అధికార డీఎంకే కూటమి వైపు చూడటం! కాంగ్రెస్తో ఒప్పందం చేసుకుని, డీఎంకేను కూడా కలుపుకుని పోయి జాతీయ స్థాయిలో బీజేపీకి వ్యతిరేకంగా ఒక పెద్ద కూటమిగా నిలబడొచ్చు.
కానీ, ఇది దాదాపు అసాధ్యం! ఎందుకంటే.. ఎన్నికల ప్రచారం ఆసాంతం విజయ్.. బీజేపీతో పాటు ఎంకే స్టాలిన్, డీఎంకే పార్టీ టార్గెట్గానే తీవ్ర విమర్శలు గుప్పించాడు. ఇప్పుడు అధికారం కోసం అదే పార్టీతో చేతులు కలిపితే.. మార్పు కోరుకుని టీవీకేకి ఓటేసిన కోట్లాది మంది తటస్థ ఓటర్లలో తీవ్ర అసంతృప్తి రగులుతుంది. అది విజయ్ రాజకీయ భవిష్యత్తుకే ముప్పు.
సినిమాల్లో హీరో అన్నీ ఒక్కడే మేనేజ్ చేయొచ్చు, కానీ రియల్ పాలిటిక్స్లో కూటముల మద్దతు లేకుండా సింగిల్ హ్యాండ్తో పాలించడం అసాధ్యం! సగటు ఓటరుగా మనం ఆలోచించాల్సింది ఒక్కటే.. మన ఓటు మార్పును శాసించింది, కానీ ఆ మార్పు స్థిరమైన ప్రభుత్వాన్ని ఇవ్వకపోతే సంకీర్ణాల పేరుతో జరిగే బ్లాక్ మెయిల్ పాలిటిక్స్లో బలైపోయేది మళ్లీ మనమే! విజయ్ ముందున్నది కేవలం సీఎం కుర్చీ కాదు.. ఆ కుర్చీ చుట్టూ అల్లుకునే వందలాది రాజకీయ పాములను ఎలా హ్యాండిల్ చేస్తాడన్నదే అతనికి అసలైన అగ్నిపరీక్ష!
Also Read:
కేరళలో కుప్పకూలిన ఎర్రకోట.. కాంగ్రెస్ సీఎం అభ్యర్థి ఎవరు?TN Election Results : నిజమైన పీకే జోస్యం, 106 స్థానాల్లో విజయ్ టీవీకే
అమిత్ షా చాణక్యం, మోదీ ఛరిష్మా: బెంగాల్ గడ్డపై బీజేపీ జెండా
TN Election Results: తమిళనాట విజయ్ టీవీకే సునామీ
Tamil Nadu Elections 2026 : దళపతి విజయ్ టీవీకే భవితవ్యం
