భారాస (BRS) అధినేత, మాజీ ముఖ్యమంత్రి కే. చంద్రశేఖర్ రావు (కేసీఆర్)కు పార్టీ ఎమ్మెల్సీ కవిత లేఖ రాయడంపై భారాస కార్యనిర్వాహక అధ్యక్షుడు కేటీఆర్ స్పందించారు. పార్టీలో ప్రజాస్వామ్యం ఉందని, అధినేతకు సూచనలు చేసేందుకు లేఖలు రాయడం తప్పు కాదని ఆయన పేర్కొన్నారు.
"అంతర్గత విషయాలను అంతర్గతంగానే చర్చించుకుంటే మంచిది. అన్ని పార్టీలలోనూ కోవర్టులు ఉంటారు, సరైన సమయం వచ్చినప్పుడు వారే బయటపడతారు" అని కేటీఆర్ వ్యాఖ్యానించారు. తెలంగాణ భవన్‌లో నిర్వహించిన మీడియా సమావేశంలో ఆయన ముఖ్యమంత్రి రేవంత్‌రెడ్డిపై తీవ్రస్థాయిలో ధ్వజమెత్తారు.
రేవంత్‌రెడ్డిపై కేటీఆర్ విమర్శల పదును
సీఎం రేవంత్‌రెడ్డి తన పదవిని కాపాడుకునేందుకు దిల్లీలోని అధిష్ఠానానికి డబ్బులు ఇస్తున్నారని కేటీఆర్ ఆరోపించారు. రేవంత్‌రెడ్డి 'మాటల సీఎం' కాదని, 'మూటల సీఎం' అని విమర్శించారు. "రేవంత్‌రెడ్డికి దిల్లీలో ఇద్దరు బాస్‌లున్నారు. ఒకరు రాహుల్‌ గాంధీ, మరొకరు మోదీ" అని కేటీఆర్ దుయ్యబట్టారు.
ఈడీ ఛార్జిషీట్‌లో సీఎం రేవంత్‌రెడ్డి పేరు ఉన్నప్పటికీ, దీనిపై రేవంత్‌రెడ్డి, రాహుల్‌గాంధీ ఎందుకు స్పందించడం లేదని కేటీఆర్ ప్రశ్నించారు. ఈడీ ఛార్జ్‌షీట్‌లో పేరున్న రేవంత్‌రెడ్డి తన పదవికి రాజీనామా చేయాలని డిమాండ్ చేశారు. గతంలో ఆరోపణలు వచ్చిన సీఎంలు, కేంద్రమంత్రులు తమ పదవుల నుంచి తప్పుకున్న సందర్భాలను గుర్తుచేశారు.
గత మే నెలలో ప్రధాని మోదీ తెలంగాణలో ఆర్‌ఆర్‌ఆర్‌ ట్యాక్స్‌ (RRR Tax) నడుస్తోందని అన్నారని, మరి దానిపై ఎందుకు విచారణ జరపడం లేదని కేటీఆర్ కేంద్రాన్ని ప్రశ్నించారు. సీఎం రేవంత్‌రెడ్డిని కేంద్ర ప్రభుత్వమే కాపాడుతోందని ఆరోపించారు. "సంక్షేమ పథకాలు అమలు చేయకుండా చేసిన అప్పులు ఎక్కడికి వెళ్తున్నాయి?" అని కేటీఆర్ నిలదీశారు.
