సముద్రాలు జీవ వైవిధ్యానికి నిలయాలు మరియు వాతావరణ మార్పులలో కీలక పాత్ర పోషిస్తాయి. శాస్త్రవేత్తలు సముద్రాల గురించి నిరంతరం పరిశోధనలు చేస్తూనే ఉంటారు. ఈ క్రమంలో, పసిఫిక్ మహాసముద్రంలో అన్వేషణ చేస్తున్న శాస్త్రవేత్తలకు నీటి అడుగున కనిపించిన ఒక వింతైన దృశ్యం వారిని ఆశ్చర్యానికి గురిచేసింది.
సముద్ర గర్భంలో అన్వేషణ
సముద్ర గర్భంలో ఏమి ఉంది? అక్కడి వాతావరణం ఎలా మారుతోంది? సముద్ర గర్భంలో వింత పరిణామాలు ఏమైనా జరుగుతున్నాయా? అనే విషయాలను తెలుసుకోవడానికి ఓషన్ ఎక్స్‌ప్లోరేషన్ ట్రస్ట్ నిర్వహించే ఎక్స్‌ప్లోరేషన్ వెసెల్ నాటిలస్‌లోని పరిశోధకుల బృందం పసిఫిక్ మహాసముద్రంలోకి వెళ్లింది.
లిలియుకలని రిడ్జ్ వద్ద వింత దృశ్యం
పరిశోధనలో భాగంగా, శాస్త్రవేత్తలు సముద్రంలోని లోతైన ప్రాంతమైన 'లిలియుకలని రిడ్జ్' వద్ద ఒక వింతైన దృశ్యాన్ని చూశారు. అది పసుపు రంగు రాళ్లతో నిండి ఉండటంతో, దూరం నుండి చూసిన శాస్త్రవేత్తలు అది బంగారు గని అయి ఉంటుందా అని అనుమానించారు. దీంతో వారు దగ్గరికి వెళ్లి చూడగా అసలు విషయం తెలిసి షాక్ అయ్యారు.
బంగారు గని కాదు.. లావా రహదారి!
శాస్త్రవేత్తలు బంగారు గనిగా అనుమానించిన దృశ్యం నిజానికి పసుపు రంగు రాళ్లతో చక్కగా అమర్చబడిన దారిలా ఉంది. ఆ రాళ్లు పగుళ్లతో ఇటుకల ఆకారంలో ఉన్నాయి. అందుకే అవి దూరం నుండి బంగారు కడ్డీల్లా కనిపించాయి. అయితే, పరిశోధించి చూడగా అవి సముద్ర గర్భంలో సంభవించే పరిణామాల వల్ల ఏర్పడిన పురాతన లావా కార్యకలాపాల కారణంగా ఏర్పడిన ఒక రహదారి అని గుర్తించారు. సముద్రపు నీటి అడుగున అగ్నిపర్వత విస్ఫోటనాల సమయంలో లావా పెల్లుబికి బంగారు వర్ణంలో ఇలాంటి రహదారి ఏర్పడిందని వారు కనుగొన్నారు. శాస్త్రవేత్తలు దీనిని ప్రకృతి యొక్క అద్భుతమైన దృశ్యాలలో ఒకటిగా పేర్కొన్నారు.
0 కామెంట్‌లు