పాకిస్థాన్ నిఘా సంస్థలకు భారతీయ రహస్య సమాచారం చేరవేస్తున్నారనే ఆరోపణలపై అరెస్టయిన యూట్యూబర్ జ్యోతి మల్హోత్రాతో పూరీకి చెందిన మరో యూట్యూబర్‌కు ఉన్న సంబంధాలపై ఒడిశా పోలీసులు దర్యాప్తు చేస్తున్నారు. గతేడాది సెప్టెంబర్‌లో జ్యోతి మల్హోత్రా పూరీని సందర్శించినప్పుడు ఈ ఇద్దరు మహిళా యూట్యూబర్‌లు కలిశారని పోలీసులు గుర్తించారు.
పూరీ యూట్యూబర్ పాకిస్థాన్ సందర్శన
పూరీకి చెందిన సదరు యూట్యూబర్ ఇటీవల పాకిస్థాన్‌లోని కర్తార్‌పూర్ సాహిబ్ గురుద్వారాను సందర్శించినట్లు పూరీ ఎస్పీ వినీత్ అగర్వాల్ తెలిపారు. ఈ మేరకు ఆయన మీడియాతో మాట్లాడుతూ, జ్యోతి మల్హోత్రా పూరీ సందర్శనపై విచారణ జరుపుతున్నామని, వివరాలు ధ్రువీకరించిన తర్వాత వెల్లడిస్తామని చెప్పారు.
సమాచారం పంచుకున్నారా అనే కోణంలో దర్యాప్తు
జ్యోతి మల్హోత్రాతో పూరీకి చెందిన ఒక మహిళ ఇంటెలిజెన్స్ సమాచారం పంచుకున్నారా అనే ప్రశ్నకు స్పందించిన ఎస్పీ, ఈ కేసుకు సంబంధించిన దర్యాప్తు హర్యానా పోలీసులు నిర్వహిస్తున్నారని, వారికి అన్ని విధాల సహకారం అందిస్తున్నామని తెలిపారు. జ్యోతి మల్హోత్రా పూరీ సందర్శన వెనుక ఉన్న ఉద్దేశం, ఆమె ఎవరిని కలిసింది, ఏవైనా అనుమానాస్పద కార్యకలాపాలు ఉన్నాయా అనే కోణాల్లో దర్యాప్తు కొనసాగుతోందని ఆయన వెల్లడించారు. పలు కేంద్ర దర్యాప్తు సంస్థలు, హర్యానా పోలీసులతో నిరంతరం సంప్రదింపులు జరుపుతున్నామని ఆయన పేర్కొన్నారు. అయితే, పూరీకి చెందిన యూట్యూబర్ గుర్తింపును పోలీసులు అధికారికంగా వెల్లడించలేదు.
పూరీ యూట్యూబర్ తండ్రి వివరణ
ఈ విషయంపై పూరీకి చెందిన యూట్యూబర్ తండ్రి మాట్లాడుతూ, పోలీసులు తన కుమార్తెను విచారించి కొంత సమాచారం సేకరించారని తెలిపారు. ఇద్దరూ యూట్యూబర్‌లు కావడంతో వారి మధ్య పరిచయం ఏర్పడిందని, స్నేహం కారణంగా జ్యోతి మల్హోత్రా పూరీని సందర్శించిందని ఆయన చెప్పారు. ఇది దేశ భద్రతకు సంబంధించిన అంశం కాబట్టి సరైన దర్యాప్తు జరగాలని, పోలీసులకు తాము పూర్తిగా సహకరిస్తామని ఆయన అన్నారు. తన కుమార్తె మూడు నాలుగు నెలల క్రితం తీర్థయాత్రలో భాగంగా మరో స్నేహితురాలితో కలిసి కర్తార్‌పూర్ వెళ్లారని, మల్హోత్రాతో కాదని ఆయన స్పష్టం చేశారు. తన కుమార్తె దేశ వ్యతిరేక కార్యకలాపాల్లో పాల్గొనలేదని, మల్హోత్రా గూఢచర్యం చేస్తున్నారనే విషయం కూడా ఆమెకు తెలియదని ఆయన తెలిపారు.
పూరీ యూట్యూబర్ ఇన్‌స్టాగ్రామ్ ద్వారా స్పందన
మరోవైపు, పూరీ యూట్యూబర్ ఈ అంశంపై ఇన్‌స్టాగ్రామ్ వేదికగా స్పందించారు. జ్యోతి మల్హోత్రా తనకు స్నేహితురాలు మాత్రమేనని, యూట్యూబ్ ద్వారా వారి పరిచయం ఏర్పడిందని ఆమె తెలిపారు. మల్హోత్రాపై ఆరోపణలు ఉన్న విషయం తనకు తెలియదని, ఆమె శత్రు దేశం కోసం గూఢచర్యం చేస్తుందని తెలిస్తే ఆమెతో సంబంధం పెట్టుకునేది కాదని ఆమె స్పష్టం చేశారు. ఏదైనా దర్యాప్తు సంస్థ తనను ప్రశ్నించాలనుకుంటే పూర్తి సహకారం అందిస్తానని, దేశం అన్నింటికంటే గొప్పదని ఆమె తన పోస్ట్‌లో పేర్కొన్నారు.
