ఈ మధ్య కాలంలో చాలా మంది తమ ఇళ్లలో తాబేళ్లను పెంచుకోవడం లేదా తాబేలు ప్రతిమలను ఉంచడం చూస్తున్నాం. వాస్తు శాస్త్రం ప్రకారం, ఇలా చేయడం వల్ల ఇంట్లోని వాస్తు దోషాలు మరియు నెగటివ్ ఎనర్జీ తొలగిపోతాయని నమ్ముతారు. అయితే, తాబేలు ప్రతిమను ఇంట్లో సరైన దిశలో ఉంచడం కూడా చాలా ముఖ్యం అంటున్నారు నిపుణులు. ఆ నియమాలు ఏమిటో తెలుసుకుందాం.
తాబేలును ఇంట్లో ఉంచడానికి వాస్తు నియమాలు:
స్థానం: వాస్తు మరియు జ్యోతిష్య శాస్త్రం ప్రకారం, తాబేలు విగ్రహాన్ని పూజ గదిలో ఒక ప్లేట్‌లో ఉంచాలి. నిజమైన తాబేలును కూడా దేవుడి గదికి దగ్గరగా, గాలి మరియు వెలుతురు ఉండే ప్రదేశంలో ఉంచాలి.
నీరు: తాబేలును ఉంచిన ప్లేట్‌లో తప్పకుండా నీరు పోయాలి మరియు ఆ నీటిని ప్రతిరోజూ మారుస్తూ ఉండాలి. ఇలా చేయడం వల్ల ఇంట్లోకి ధనం వస్తుందని మరియు పనులు సజావుగా సాగుతాయని నమ్ముతారు.
తెచ్చుకోవడానికి సరైన రోజు: వాస్తు శాస్త్రం ప్రకారం, ఇంట్లో సానుకూల శక్తి పెరగాలంటే సరైన రోజున తాబేలును తీసుకురావాలి. ముఖ్యంగా పౌర్ణమి రోజున తాబేలును ఇంటికి తీసుకురావడం శుభప్రదంగా చెబుతారు.
పౌర్ణమి నాడు చేయవలసిన విధానం: పౌర్ణమి రోజున తాబేలును కాసేపు పాలలో ఉంచి, అభిజిత్ ముహుర్తంలో దానిని పాల నుండి తీసి, నీటితో శుభ్రం చేయాలి. తర్వాత ఒక పాత్రలో కొద్దిగా నీరు తీసుకుని తాబేలును అందులో ఉంచాలి. ఇలా చేయడం వల్ల ఇంట్లో సానుకూల శక్తి ప్రసరిస్తుందని నిపుణులు చెబుతున్నారు.
