ప్రపంచ కుబేరుల జాబితాలో అగ్రస్థానంలో ఉన్న ఎలాన్ మస్క్ (Elon Musk) మరో సంచలనానికి సిద్ధమయ్యారు. ప్రపంచంలోనే మొట్టమొదటి ట్రిలియనీర్‌గా (లక్ష కోట్ల డాలర్ల అధిపతి) చరిత్ర సృష్టించే దిశగా ఆయన అడుగులు వేస్తున్నారు.
టెస్లా వాటాదారులు గురువారం (నవంబర్ 6) ఎలాన్ మస్క్ కోసం ప్రతిపాదించిన బిలియన్ డాలర్ల వేతన ప్యాకేజీని భారీ మెజారిటీతో ఆమోదించారు.
బిలియన్ డాలర్ల ప్యాకేజీకి ఆమోదం
గురువారం జరిగిన సమావేశంలో 75 శాతానికి పైగా వాటాదారులు ఈ భారీ ప్యాకేజీకి మద్దతు పలకడం విశేషం. ఈ ప్రకటన తర్వాత మస్క్ ఆనందంలో మునిగిపోయారు. ఆనందంతో ఏకంగా వేదికపైకి వచ్చి రోబోతో కలిసి డ్యాన్స్ చేశారు.
ఈ కొత్త ప్యాకేజీ ద్వారా మస్క్ కనీసం ఏడున్నర సంవత్సరాలు టెస్లాలో కొనసాగాల్సి ఉంటుంది. అలాగే కంపెనీ దీర్ఘకాలిక పనితీరు లక్ష్యాలను చేరుకోవాలి.
ప్యాకేజీ లక్ష్యం: మస్క్‌కు $1 ట్రిలియన్!
చాలా మంది సీఈఓల మాదిరిగా మస్క్ జీతం తీసుకోరు. ఆయన ఆదాయం మొత్తం స్టాక్ ఆప్షన్ల (Stock Options) నుండే వస్తుంది. ఈ కొత్త ప్యాకేజీ ద్వారా ఆయన ఏకంగా $1 ట్రిలియన్ (లక్ష కోట్ల డాలర్లు) వరకు సంపాదించే అవకాశం ఉంది.
$8.5 ట్రిలియన్ల మార్కెట్ విలువ సాధిస్తే..
ఈ కొత్త ఒప్పందం ప్రకారం, రాబోయే దశాబ్ద కాలంలో మస్క్ 423.7 మిలియన్ టెస్లా షేర్లను పొందవచ్చు. అయితే, ఇందుకు కంపెనీ మార్కెట్ విలువ $8.5 ట్రిలియన్లకు చేరుకోవాలనేది ప్రధాన షరతు.
టెస్లా బోర్డు నిర్దేశించిన ఈ పనితీరు ఆధారిత లక్ష్యాన్ని కంపెనీ సాధిస్తే, మస్క్‌కు సుమారు $1 ట్రిలియన్ విలువైన షేర్ ప్యాకేజీ అందుతుంది. ఇది కంపెనీ లాభాలను పెంచడమే కాకుండా, మస్క్ నికర విలువను ఆకాశానికి చేరుస్తుంది.
టెస్లా నెం.1 కంపెనీగా.. రోజుకు $275 మిలియన్లు!
ఈ $8.5 ట్రిలియన్ల లక్ష్యాన్ని చేరుకోవాలంటే, టెస్లా తన వాటా ధరను ప్రస్తుత స్థాయి నుండి ఏకంగా 466% పెంచాల్సి ఉంటుంది.
ఇది జరిగితే, టెస్లా.. ఎన్విడియా (Nvidia)ను అధిగమించి ప్రపంచంలోనే అత్యంత విలువైన కంపెనీగా అవతరిస్తుంది.
అంతేకాదు, ఈ ప్యాకేజీలోని 12 వాయిదాలను మస్క్ అందుకుంటే, అతని సగటు సంపాదన రోజుకు దాదాపు $275 మిలియన్లకు (US$275 million) చేరుకుంటుంది.
కార్పొరేట్ చరిత్రలోనే ఇది అతిపెద్ద వేతన ప్యాకేజీగా నిపుణులు భావిస్తున్నారు. వాటాదారుల ఆమోదంతో, ఎలాన్ మస్క్ ఇప్పుడు ప్రపంచంలోనే మొట్టమొదటి ట్రిలియనీర్‌గా అవతరించేందుకు మార్గం సుగమం చేసుకున్నారు.
