రాజకీయాల్లో విమర్శలు ఉండటం సహజం. కానీ ఈ మధ్యకాలంలో తెలంగాణ పాలిటిక్స్ విమర్శల స్థాయిని దాటి, వ్యక్తిగత దూషణల స్థాయికి, అక్కడి నుంచి బూతుల స్థాయికి దిగజారిపోయాయి. మైకు దొరికితే చాలు.. సీఎం, మాజీ సీఎం అనే తేడా లేకుండా బూతు పురాణం విప్పుతున్నారని సామాన్యులు అసహ్యించుకుంటున్న పరిస్థితి.
సరిగ్గా ఇదే పాయింట్ను పట్టుకుని బీజేపీ ఎంపీ రఘునందన్ రావు ఇద్దరు అగ్రనేతలను ఏకిపారేశారు. "మీ దగ్గర సబ్జెక్ట్ ఉంటే సమస్యల మీద మాట్లాడండి.. లేకపోతే మౌనంగా ఉండండి కానీ, ఈ బూతులేంటి?" అని ఆయన వేసిన ప్రశ్నలు ఇప్పుడు రాజకీయ వర్గాల్లో హాట్ టాపిక్గా మారాయి.
రాష్ట్ర ముఖ్యమంత్రి రేవంత్ రెడ్డి, మాజీ ముఖ్యమంత్రి కేసీఆర్ ఇద్దరూ సబ్జెక్ట్ లేకే బూతులు మాట్లాడుతున్నారని మెదక్ ఎంపీ రఘునందన్ రావు తీవ్రస్థాయిలో ధ్వజమెత్తారు. అసలు బాధ్యతాయుతమైన పదవుల్లో ఉన్నవారు మాట్లాడాల్సిన భాష అదేనా అని ఆయన ప్రశ్నించారు. వీరిద్దరి వ్యవహార శైలి వల్ల రాజకీయ నాయకులంటేనే ప్రజలకు గౌరవం పోతోందని ఆవేదన వ్యక్తం చేశారు. ఇక కాంగ్రెస్ పార్టీ పరిస్థితి దేశవ్యాప్తంగా దారుణంగా ఉందని, ప్రజలు ఆ పార్టీని పట్టించుకోవడం మానేశారని ఎద్దేవా చేశారు.
ఎక్కడ ఎన్నికలు జరిగినా కాంగ్రెస్ ఒక్కో రాష్ట్రాన్ని కోల్పోతూ వస్తోందని, ఆ ఫ్రస్ట్రేషన్లోనే నేతలు ఇలా మాట్లాడుతున్నారని విశ్లేషించారు. నిర్మాణాత్మక ఆలోచనతోనే ఉపాధి హామీ పథకం పేరు మారుస్తున్నామని చెబుతూనే.. కాంగ్రెస్ హయాంలో పథకాలకు కేవలం ఇందిరా గాంధీ, రాజీవ్ గాంధీ పేర్లు మాత్రమే పెట్టారని, మహాత్మా గాంధీ పేరు ఎందుకు పెట్టలేదని నిలదీశారు.
అదే సమయంలో బీఆర్ఎస్ అధినేత కేసీఆర్ రీ-ఎంట్రీపై కూడా రఘునందన్ రావు ఆసక్తికర వ్యాఖ్యలు చేశారు. కొడుకు కేటీఆర్, అల్లుడు హరీశ్ రావు వల్ల కావడం లేదనే.. కేసీఆర్ మళ్లీ బయటకు వచ్చారని సెటైర్లు వేశారు. ఎక్కడ ఎన్నికలు జరిగినా బీఆర్ఎస్ ఓడిపోతోందని, ఆ పార్టీ ఇక ముగిసిన అధ్యాయమని తేల్చిచెప్పారు.
చాలా రోజుల తర్వాత బయటకు వచ్చారు కాబట్టి, ఉనికి కోసం ఏదో ఒకటి మాట్లాడాలని కేసీఆర్ మాట్లాడుతున్నారని విమర్శించారు. కేసీఆర్ సొంత కూతురు కవితనే పార్టీ నుంచి బయటకు వచ్చి తండ్రి చేసిన తప్పులను ఎత్తిచూపుతోందని, దీనికి ముందు బీఆర్ఎస్ నేతలు సమాధానం చెప్పాలని డిమాండ్ చేశారు.
తమ పార్టీలో ఎలాంటి గ్రూపులు లేవని, అందరం మోదీ నాయకత్వంలో పనిచేసి తెలంగాణలో బీజేపీని అధికారంలోకి తెస్తామని స్పష్టం చేశారు. ఇక నటుడు శివాజీ డ్రెస్సింగ్ కామెంట్స్ వివాదంపై స్పందిస్తూ.. ఆయన క్షమాపణ చెప్పారు కాబట్టి అది ముగిసిన అధ్యాయమని, దానిపై తాను మాట్లాడనని క్లారిటీ ఇచ్చారు.
బాటమ్ లైన్..
రఘునందన్ రావు వ్యాఖ్యలు కేవలం రాజకీయ విమర్శలు మాత్రమే కాదు, అవి ప్రస్తుత రాజకీయ దిగజారుడుతనానికి అద్దం పడుతున్నాయి.
సీఎం స్థాయి వ్యక్తులు బూతులు మాట్లాడితే.. కింది స్థాయి కార్యకర్తలు కత్తులు దూసుకుంటారు. ఇది ప్రజాస్వామ్యానికి చాలా ప్రమాదం. "సబ్జెక్ట్ లేకే బూతులు" అని రఘునందన్ అనడంలో వంద శాతం వాస్తవం ఉంది. వాదనలో పస ఉన్నవాడు గొంతు పెంచడు, బూతులు తిట్టడు.
కవిత ఎపిసోడ్ను బీజేపీ బాగా వాడుకుంటోంది. సొంత కూతురే తండ్రి తప్పులను ఎత్తిచూపుతోందని బీజేపీ చేస్తున్న ప్రచారం.. రాబోయే రోజుల్లో బీఆర్ఎస్కు పెద్ద తలనొప్పిగా మారనుంది.
కాంగ్రెస్, బీఆర్ఎస్ రెండూ ఒక్కటే అని, ప్రత్యామ్నాయం బీజేపీ మాత్రమే అని చెప్పడానికి రఘునందన్ ప్రయత్నిస్తున్నారు. శివాజీ ఇష్యూను లైట్ తీసుకోవడం ద్వారా.. తాము అనవసర విషయాలపై కాకుండా, రాజకీయాలపైనే ఫోకస్ పెట్టామని చెప్పకనే చెప్పారు.
