సంక్రాంతి పండుగ వస్తుందంటే చాలు.. ఆకాశం రంగురంగుల పతంగులతో నిండిపోతుంది. పిల్లల నుంచి పెద్దల వరకు అందరూ డాబాలెక్కి, మైదానాల్లోకి వెళ్లి గాలిపటాలు ఎగరేస్తూ పోటీ పడటం మన సంప్రదాయం. కానీ, ఈ ఆనందం వెనుక ఒక తెలియని ప్రమాదం పొంచి ఉంది. సరదా కోసం ఎగరేసే పతంగులు కొన్నిసార్లు ప్రాణాలనే తీసేస్తున్నాయి. ముఖ్యంగా రైల్వే ట్రాక్ల పక్కన, విద్యుత్ తీగల దగ్గర పతంగులు ఎగరేయడం అంటే మృత్యువుతో ఆడుకోవడమేనని దక్షిణ మధ్య రైల్వే (SCR) తీవ్ర హెచ్చరికలు జారీ చేసింది. పండుగ పూట ఇళ్లలో విషాదం నిండకూడదంటే ప్రతి ఒక్కరూ ఈ విషయాలు కచ్చితంగా తెలుసుకోవాలి.
రైల్వే ట్రాక్లు, స్టేషన్ల పరిసరాల్లో గాలిపటాలు ఎగరేయడం అత్యంత ప్రమాదకరమని రైల్వే అధికారులు హెచ్చరిస్తున్నారు. రైళ్లు నడవడానికి ఉపయోగించే ఓవర్ హెడ్ ట్రాక్షన్ లైన్లలో (Overhead wires) ఏకంగా 25,000 వోల్టుల (25 KV) అధిక సామర్థ్యం గల విద్యుత్ ప్రవహిస్తూ ఉంటుంది. సాధారణంగా మన ఇళ్లలో ఉండే కరెంట్ షాక్ కొడితేనే ప్రాణాపాయం ఉంటుంది, అలాంటిది 25 వేల వోల్టుల వైర్లకు పతంగి దారం తగిలితే మనిషి బూడిదైపోవడానికి సెకను కూడా పట్టదు. చాలామంది ట్రాక్ల పక్కన ఖాళీ స్థలం ఉందని అక్కడికి వెళ్లి పతంగులు ఎగరేస్తుంటారు. పొరపాటున గాలిపటం తెగి ఆ తీగలపై పడినా, లేదా ఎగరేస్తున్నప్పుడు దారం ఆ తీగలకు తగిలినా.. ఆ దారం ద్వారా విద్యుత్ ప్రవహించి కింద ఉన్న వ్యక్తికి తీవ్రమైన షాక్ కొడుతుంది.
ముఖ్యంగా ప్రస్తుతం మార్కెట్లో దొరుకుతున్న 'చైనా మాంజా' లేదా నైలాన్ దారాలు ఈ ప్రమాదాన్ని మరింత పెంచుతున్నాయి. ఈ దారాల్లో గాజు పొడి, లోహపు రేణువులు కలుపుతారు కాబట్టి ఇవి విద్యుత్ వాహకాలుగా (Good Conductors) పనిచేస్తాయి. అంటే కరెంట్ తీగకు ఈ దారం తగలగానే.. విద్యుత్ నేరుగా ఎగరేసే వ్యక్తి చేతికి సరఫరా అవుతుంది. గతంలో ఇలాంటి ఘటనల వల్ల అనేకమంది ప్రాణాలు కోల్పోయారని, మరికొందరు తీవ్రంగా గాయపడ్డారని రైల్వే శాఖ గుర్తుచేసింది. అంతేకాకుండా, గాలిపటాలు తీగల్లో చిక్కుకోవడం వల్ల రైల్వే విద్యుత్ సరఫరాకు అంతరాయం ఏర్పడి, రైళ్లు నిలిచిపోయే ప్రమాదం కూడా ఉంది. ఇది రైల్వే చట్టం ప్రకారం నేరం కూడా. రైల్వే ఆస్తులకు నష్టం కలిగించినా, ప్రయాణికుల భద్రతకు ముప్పు తెచ్చినా కఠినమైన కేసులు నమోదు చేస్తామని, జైలు శిక్ష కూడా పడవచ్చని రైల్వే అధికారులు స్పష్టం చేశారు.
బాటమ్ లైన్..
పండుగ అంటే ఆనందం.. అది విషాదంగా మారకూడదు.
అవగాహన ముఖ్యం: పిల్లలకు తెలియదు కాబట్టి, పెద్దలే వారిని రైల్వే ట్రాక్లకు, విద్యుత్ స్తంభాలకు దూరంగా ఉంచాలి. ఖాళీగా ఉందని రైల్వే స్థలాల్లోకి వెళ్లడం నేరం మరియు ఘోరం.
మాంజా వద్దు: పతంగుల పోటీ గెలవడం ముఖ్యం కాదు, ప్రాణం ముఖ్యం. చైనా మాంజాను వాడటం ఆపేయండి. అది మనుషులకే కాదు, పక్షులకు కూడా యమపాశమే.
బాధ్యత: రైల్వే శాఖ హెచ్చరికలను సీరియస్గా తీసుకోవాలి. మీ చిన్న సరదా వందల మంది ప్రయాణికులను ఇబ్బంది పెట్టకూడదు, మీ కుటుంబాన్ని రోడ్డున పడేయకూడదు.
