దక్షిణాది రాష్ట్రాల్లో తెలంగాణ కొత్త రికార్డు సృష్టించింది. అభివృద్ధిలోనో, ఐటీలోనో అనుకుంటే పొరపాటే.. ఇది మందు బాబుల రికార్డు! అవును, దక్షిణాదిలోనే అత్యధికంగా మద్యం సేవించే రాష్ట్రంగా తెలంగాణ నిలిచి 'లిక్కర్ క్యాపిటల్'గా (Liquor Capital) అవతరించింది. ఇక్కడ బీరు, విస్కీలు మంచినీళ్లలా అమ్ముడవుతున్నాయి.
తాజా గణాంకాల ప్రకారం.. తెలంగాణలో మద్యం వినియోగం దేశ సగటు కంటే ఎక్కువగా ఉంది. పొరుగున ఉన్న ఆంధ్రప్రదేశ్తో పోలిస్తే.. ఇక్కడి మందుబాబులు రెట్టింపు ఖర్చు చేస్తున్నారు.
ఏటా 4.44 లీటర్లు.. నంబర్ వన్ తెలంగాణ!
తలసరి మద్యం వినియోగంలో (Per Capita Consumption) తెలంగాణ దక్షిణాదిలోనే టాప్ ప్లేస్లో ఉంది.
తెలంగాణ: ఏడాదికి సగటున ఒక వ్యక్తి 4.44 లీటర్ల మద్యం తాగుతున్నారు.
కర్ణాటక: 4.25 లీటర్లతో రెండో స్థానంలో ఉంది.
తమిళనాడు: 3.38 లీటర్లు.
ఆంధ్రప్రదేశ్: 2.71 లీటర్లతో నాలుగో స్థానం.
కేరళ: 2.53 లీటర్లతో అందరి కంటే తక్కువగా ఉంది. ముఖ్యంగా తెలంగాణలో బీర్ల వినియోగం విపరీతంగా పెరిగింది. వేసవి అనే తేడా లేకుండా.. ఏడాది పొడవునా బీర్ బాటిళ్లు ఖాళీ అవుతున్నాయి.
మందు కోసం రూ. 11 వేల ఖర్చు!
తెలంగాణ ప్రజలు మద్యం కోసం పెడుతున్న ఖర్చు లెక్కలు చూస్తే కళ్లు బైర్లు కమ్మాల్సిందే.
తెలంగాణ: రాష్ట్రంలో ఒక్కొక్కరు ఏడాదికి సగటున రూ. 11,351 మద్యాన్ని కొనుగోలు చేసేందుకు ఖర్చు చేస్తున్నారు. దేశంలో మరే రాష్ట్రంలోనూ ఈ స్థాయిలో ఖర్చు చేయడం లేదు.
ఆంధ్రప్రదేశ్: ఏపీలో సగటు మనిషి ఏడాదికి రూ. 6,399 మాత్రమే ఖర్చు చేస్తున్నారు. ఈ భారీ విక్రయాల వల్ల తెలంగాణ ప్రభుత్వ ఖజానాకు ఏటా సుమారు రూ. 36,000 కోట్లకు పైగా ఆదాయం సమకూరుతోందని అంచనా.
పల్లెల్లోనే జోరు ఎక్కువ..
సాధారణంగా సిటీల్లోనే మందు ఎక్కువగా తాగుతారని అనుకుంటాం. కానీ తెలంగాణలో సీన్ రివర్స్. పట్టణాల కంటే గ్రామీణ ప్రాంతాల్లోనే మద్యం వినియోగం అత్యధికంగా ఉంది. పండుగలు, శుభకార్యాలు, చిన్న చిన్న దావత్ లలో మద్యం తప్పనిసరిగా మారింది.
ఆరోగ్యం గుల్ల..
ప్రభుత్వానికి ఆదాయం వస్తున్నా.. సామాజికంగా మాత్రం తీవ్ర నష్టం జరుగుతోందని నిపుణులు ఆందోళన వ్యక్తం చేస్తున్నారు.
ఆరోగ్యం: కాలేయ వ్యాధులు, బీపీ వంటి దీర్ఘకాలిక సమస్యలు పెరుగుతున్నాయి.
ఆర్థికం: పేద కుటుంబాల్లో సంపాదనలో సగభాగం వైన్ షాపులకే వెళ్తుండటంతో.. పిల్లల చదువు, పౌష్టికాహారంపై తీవ్ర ప్రభావం పడుతోంది. ఏపీలో గత ప్రభుత్వ విధానాలు, ధరల వల్ల వినియోగం తక్కువగా ఉందని, తెలంగాణలో కూడా ప్రజల ఆరోగ్యంపై దృష్టి పెట్టాల్సిన అవసరం ఉందని సామాజికవేత్తలు సూచిస్తున్నారు.
