సోషల్ మీడియాలో పోస్టులు పెడితే ఐటీ శాఖ ఇంటికి వస్తుందా? మీ వాట్సాప్ చాటింగ్, పర్సనల్ మెయిల్స్ కూడా ఆఫీసర్లు చెక్ చేస్తారా? గత కొద్ది రోజులుగా ఇంటర్నెట్లో చక్కర్లు కొడుతున్న ఈ వార్త సామాన్యుల గుండెల్లో రైళ్లు పరిగెత్తిస్తోంది. అసలు ఈ ప్రచారంలో నిజమెంత? ప్రభుత్వం ఏం చెబుతోంది?
మన దేశంలో ఆదాయపు పన్ను (Income Tax) నిబంధనలు మారుతున్నాయన్నది వాస్తవమే. కానీ, సోషల్ మీడియాలో జరుగుతున్న ప్రచారం మాత్రం ప్రజలను తప్పుదోవ పట్టించేలా ఉంది. పన్ను ఎగవేతదారుల భరతం పట్టేందుకు ఐటీ శాఖ మీ ఫేస్బుక్, ఇన్స్టాగ్రామ్ ఖాతాలను జల్లెడ పడుతుందని వస్తున్న వార్తలపై కేంద్రం క్లారిటీ ఇచ్చింది.
వైరల్ అవుతున్న వార్త ఏంటి?
ట్విట్టర్లో @Indiantechguide అనే హ్యాండిల్ చేసిన ఒక పోస్ట్ ఇప్పుడు హాట్ టాపిక్గా మారింది.
ఆరోపణ: "కొత్త ఆదాయ పన్ను చట్టం ప్రకారం.. 2026, ఏప్రిల్ 1 నుంచి ఐటీ శాఖకు విశేషాధికారాలు రాబోతున్నాయి. పన్ను ఎగ్గొట్టే వారిని పట్టుకునేందుకు మీ వాట్సాప్, ఫేస్బుక్, పర్సనల్ ఇ-మెయిల్స్ను తనిఖీ చేసే పూర్తి అధికారం అధికారులకు ఉంటుంది."
భయం: ఈ వార్త చూసి.. ప్రభుత్వం మన వ్యక్తిగత స్వేచ్ఛలోకి (Privacy) చొరబడుతోందని చాలామంది ఆందోళన చెందుతున్నారు.
పీఐబీ ఫ్యాక్ట్ చెక్: అసలు నిజం ఇదే!
ఈ ప్రచారంపై కేంద్ర ప్రభుత్వానికి చెందిన పీఐబీ ఫ్యాక్ట్ చెక్ (PIB Fact Check) విభాగం స్పందించింది. ఇది పూర్తిగా అవాస్తవం అని, ప్రజలను భయపెట్టేందుకు సృష్టించిన తప్పుడు వార్త అని కొట్టిపారేసింది.
సెక్షన్ 247: కొత్త ఆదాయ పన్ను చట్టంలో 'సెక్షన్ 247'ను చేర్చిన మాట వాస్తవమే. కానీ ఇది సామాన్య ప్రజల సోషల్ మీడియా ఖాతాలను నిత్యం పర్యవేక్షించడానికి కాదు. దీనికి కొన్ని కఠినమైన పరిమితులు ఉన్నాయి.
మీ ఖాతాలను ఎప్పుడు చెక్ చేస్తారంటే?
బ్లాక్ మనీని, భారీ ఎత్తున పన్ను ఎగవేతలను అరికట్టడమే దీని ప్రధాన ఉద్దేశం.
కేవలం దాడుల సమయంలోనే: ఎవరైనా వ్యక్తి కోట్లాది రూపాయల పన్ను ఎగ్గొట్టినట్లు పక్కా ఆధారాలు ఉండి, ఐటీ శాఖ వారిపై 'సెర్చ్ అండ్ సర్వే' (Raid) నిర్వహించినప్పుడు మాత్రమే.. వారి డిజిటల్ డేటాను సేకరించే అధికారం అధికారులకు ఉంటుంది.
సామాన్యులకు సేఫ్: మీరు నిజాయితీగా పన్నులు కడుతుంటే, మీ సోషల్ మీడియా జోలికి ఎవరూ రారు. సాధారణ వెరిఫికేషన్ కోసం లేదా స్క్రుటినీ కోసం ఈ అధికారాన్ని వాడకూడదని చట్టం స్పష్టంగా చెబుతోంది.
పత్రాల స్థానంలో డిజిటల్ డేటా..
గతంలో ఐటీ దాడులు జరిగినప్పుడు అధికారులు కాగితపు పత్రాలను, ఫైళ్లను సీజ్ చేసేవారు. ఇప్పుడు అంతా ఆన్లైన్ కావడంతో.. దానికి ప్రత్యామ్నాయంగా క్లౌడ్ స్టోరేజీ, హార్డ్ డిస్కులు, ఇ-మెయిల్స్ వంటి డిజిటల్ సాక్ష్యాలను సేకరించే అధికారాన్ని ప్రభుత్వం చట్టబద్ధం చేసింది. ఇది కేవలం నేరస్థులను పట్టుకోవడానికే తప్ప, సామాన్యుల వ్యక్తిగత విషయాలను తెలుసుకోవడానికి కాదని గమనించాలి.
