అమెరికా ఆర్మీ కనిపిస్తే కాల్చేయండి! డెన్మార్క్ 'షూట్ ఎట్ సైట్' వార్నింగ్.. గ్రీన్లాండ్ కోసం యుద్ధం తప్పదా?
వెనిజులా ఆపరేషన్ తర్వాత అగ్రరాజ్యం అమెరికా దూకుడు ప్రపంచాన్ని భయపెడుతోంది. ఇప్పుడు అమెరికా అధ్యక్షుడు డొనాల్డ్ ట్రంప్ చూపు మంచు ఖండం 'గ్రీన్లాండ్'పై పడింది. దాన్ని ఎలాగైనా దక్కించుకుంటామని ట్రంప్ పదే పదే హెచ్చరిస్తుండటంతో.. గ్రీన్లాండ్ను పాలిస్తున్న డెన్మార్క్ ప్రభుత్వం సంచలన నిర్ణయం తీసుకుంది.
అమెరికా సైన్యం గనక గ్రీన్లాండ్లోకి చొరబడితే.. "ముందు కాల్చండి, తర్వాతే ప్రశ్నలు అడగండి" (Shoot first, ask questions later) అని తమ సైనికులకు ఆదేశాలు జారీ చేసింది. సొంత మిత్రదేశమైన (NATO Ally) అమెరికాపై కాల్పులు జరపడానికి డెన్మార్క్ సిద్ధపడటం అంతర్జాతీయంగా పెను కలకలం రేపుతోంది.
డెన్మార్క్ రక్షణ శాఖ స్థానిక పత్రిక 'బెర్లింగ్స్కే'కి ఈ విషయాన్ని వెల్లడించింది. ఒకవేళ గ్రీన్లాండ్పై ఆక్రమణకు ప్రయత్నిస్తే.. పైనుంచి ఆదేశాల కోసం ఎదురుచూడకుండా, వెంటనే ఎదురుదాడి చేయాలని సైనికులకు స్పష్టమైన ఆదేశాలు వెళ్లాయి. దీనికోసం 1952 నాటి 'ప్రచ్ఛన్న యుద్ధం' (Cold War) నిబంధనను డెన్మార్క్ తెరపైకి తెచ్చింది.
1940లో నాజీ జర్మనీ డెన్మార్క్పై దాడి చేసినప్పుడు.. ఆదేశాల కోసం ఎదురుచూస్తూ డానిష్ సైన్యం ఓడిపోయింది. మళ్లీ అలాంటి తప్పు జరగకూడదనే ఉద్దేశంతో.. "కమాండర్లకు యుద్ధం గురించి తెలియకపోయినా సరే.. విదేశీ సైన్యం కనిపిస్తే వెంటనే పోరాటం మొదలుపెట్టాలి" అనే రూల్ను అప్పట్లో తెచ్చారు. ఇప్పుడు అమెరికా భయంతో ఆ రూల్ను మళ్లీ అమల్లోకి తెచ్చారు.
ట్రంప్ గ్రీన్లాండ్ను ఎందుకు కోరుకుంటున్నారంటే.. అది వ్యూహాత్మకంగా చాలా కీలకమైన ప్రదేశం. "జాతీయ భద్రతా దృష్ట్యా మాకు గ్రీన్లాండ్ కావాలి. అక్కడ రష్యా, చైనా నౌకలు తిరుగుతున్నాయి" అని ట్రంప్ వాదిస్తున్నారు. నాటో కూటమిని కాపాడుకుంటారా? లేక గ్రీన్లాండ్ను తీసుకుంటారా? అని న్యూయార్క్ టైమ్స్ ప్రశ్నిస్తే.. "బహుశా ఏదో ఒకటే ఎంచుకోవాలి" అని చెప్పడం ద్వారా నాటో బంధాన్ని కూడా పణంగా పెట్టడానికి ట్రంప్ సిద్ధమయ్యారని అర్థమవుతోంది.
ఈ ఉద్రిక్తతల మధ్య గురువారం వైట్ హౌస్లో డెన్మార్క్ రాయబారి, గ్రీన్లాండ్ ప్రతినిధితో ట్రంప్ సలహాదారులు సమావేశమయ్యారు. అమెరికా విదేశాంగ మంత్రి మార్కో రూబియో కూడా డెన్మార్క్ అధికారులతో చర్చించనున్నారు. అయితే గ్రీన్లాండ్ ప్రధాని జెన్స్-ఫ్రెడరిక్ నీల్సెన్ మాత్రం అమెరికా తీరుపై మండిపడ్డారు. వెనిజులాతో పోల్చుతూ, సైనిక చర్య గురించి మాట్లాడటం తమను అవమానించడమేనని తేల్చిచెప్పారు.
బాటమ్ లైన్..
మిత్రదేశాల మధ్యే తుపాకులు పేలే పరిస్థితి రావడం ప్రపంచ రాజకీయాల్లో అరుదు.
నాటో సంక్షోభం: అమెరికా, డెన్మార్క్ రెండూ నాటో సభ్య దేశాలే. "ఒకరిపై దాడి అందరిపై దాడి" అనేది నాటో సూత్రం. కానీ ఇక్కడ ఒక నాటో దేశంపై మరొక నాటో దేశం దాడికి సిద్ధపడటం కూటమి మనుగడకే ప్రమాదం.
చరిత్ర గుణపాఠం: 1940లో నాజీల చేతిలో దెబ్బతిన్న డెన్మార్క్.. ఈసారి ఎవరినీ నమ్మే పరిస్థితిలో లేదు. అగ్రరాజ్యం అయినా సరే, తమ సార్వభౌమాధికారం జోలికొస్తే ఊరుకోమని గట్టి సందేశం పంపింది.
ట్రంప్ మొండితనం: వెనిజులా ఆపరేషన్ సక్సెస్ ఇచ్చిన కాన్ఫిడెన్స్తో.. గ్రీన్లాండ్ విషయంలోనూ ట్రంప్ మొండిగా వెళ్తున్నారు. ఇది యూరప్తో అమెరికా సంబంధాలను శాశ్వతంగా దెబ్బతీసే అవకాశం ఉంది.
