లండన్లో రూ. 1.3 కోట్లు వద్దు.. బెంగళూరులో రూ. 45 లక్షలే ముద్దు! గూగుల్ టెక్కీ లాజిక్ చూస్తే మైండ్ బ్లాక్ అవ్వాల్సిందే!
విదేశాలకు వెళ్లి కోట్లు సంపాదించాలనేది చాలామంది యువత కల. లండన్, అమెరికాలో జాబ్ అంటే లైఫ్ సెటిల్ అయినట్టే అని మన వాళ్లు భావిస్తుంటారు. కానీ, ఆ కోటి రూపాయల జీతం కంటే.. మన బెంగళూరులో వచ్చే రూ. 45 లక్షల జీతమే ఎంతో విలాసవంతమైనదని ఒక గూగుల్ ఇంజనీర్ సాక్ష్యాలతో సహా నిరూపించారు.
లింక్డ్ఇన్ (LinkedIn) వేదికగా వైభవ్ అగర్వాల్ అనే టెక్కీ పెట్టిన పోస్ట్ ఇప్పుడు సోషల్ మీడియాలో పెద్ద చర్చకు దారితీసింది. పౌండ్లను రూపాయల్లోకి మార్చుకుని సంబరపడొద్దు.. అక్కడి ఖర్చులు, ఇక్కడి సౌకర్యాలను బేరీజు వేసుకోవాలంటూ ఆయన చెప్పిన 'పర్చేసింగ్ పవర్ పారిటీ' (PPP) పాఠం విదేశీ మోజులో ఉన్నవారిని ఆలోచింపజేస్తోంది.
వైభవ్ అగర్వాల్ విశ్లేషణ ప్రకారం.. బెంగళూరులో ఏడాదికి రూ. 45 లక్షల ప్యాకేజీ ఉందంటే.. పన్నులు పోను చేతికి నెలకు రూ. 2.7 లక్షలు వస్తాయి. ఈ డబ్బుతో బెంగళూరులో ఒక విలాసవంతమైన ఫ్లాట్లో ఉండొచ్చు. నెలకు రూ. 5 వేలకు వంట మనిషిని, రూ. 3 వేలకు పని మనిషిని పెట్టుకోవచ్చు. బ్లింకిట్, జొమాటో వంటి యాప్స్ ద్వారా సకల సౌకర్యాలు ఇంటికే వస్తాయి. వీకెండ్స్ పార్టీలు, ట్రావెలింగ్, సేవింగ్స్ అన్నీ ఎంజాయ్ చేస్తూ 'కింగ్ సైజ్' లైఫ్ గడపవచ్చు.
అదే లండన్లో రూ. 1.32 కోట్లు (1,08,000 పౌండ్లు) జీతం అనుకుందాం. వినడానికి గొప్పగా ఉన్నా.. అక్కడ పన్నులు పోను చేతికి వచ్చేది నెలకు 6,100 పౌండ్లు మాత్రమే. అందులోనూ ఒక సాధారణ సింగిల్ బెడ్రూమ్ ఫ్లాట్ అద్దెకే 2,200 పౌండ్లు (దాదాపు రూ. 2.4 లక్షలు) ఎగిరిపోతుంది.
ఇక అక్కడ వంట మనిషిని, పని మనిషిని పెట్టుకోవడం సామాన్యుడి వల్ల అయ్యే పని కాదు. అంట్లు తోముకోవడం, వండుకోవడం, బట్టలు ఉతుక్కోవడం అన్నీ మనమే చేసుకోవాలి. కారు మెయింటైన్ చేయడం కష్టం కాబట్టి పబ్లిక్ ట్రాన్స్పోర్ట్లోనే వెళ్లాలి. అంటే కోటిన్నర జీతం ఉన్నా.. అక్కడ మధ్యతరగతి జీవితమే గడపాల్సి ఉంటుందని వైభవ్ తేల్చిచెప్పారు.
అయితే, లండన్లో ఉండే లాభాలను కూడా ఆయన ప్రస్తావించారు. కాలుష్యం లేని గాలి, గ్లోబల్ ఎక్స్పోజర్, బలమైన కరెన్సీ వంటివి అక్కడ ప్లస్ పాయింట్లు. "మీకు లగ్జరీ, కంఫర్ట్ కావాలంటే బెంగళూరును ఎంచుకోండి.. క్వాలిటీ లైఫ్, క్లీన్ ఎయిర్ కావాలంటే లండన్ వెళ్లండి. అంతేకానీ పౌండ్లను రూపాయల్లోకి మార్చకండి.. లైఫ్స్టైల్ను బట్టి నిర్ణయం తీసుకోండి" అని ఆయన ముగించారు.
ఈ పోస్ట్పై నెటిజన్ల నుంచి మిశ్రమ స్పందన వస్తోంది. కొంతమంది ఇది నిజమేనని అంటుంటే, మరికొందరు మాత్రం ఇండియాలో ట్రాఫిక్ నరకం, లేట్ నైట్ కాల్స్, కాలుష్యం వంటివి మర్చిపోకూడదని కౌంటర్ ఇస్తున్నారు.
బాటమ్ లైన్ (విశ్లేషణ)..
డబ్బును కేవలం సంఖ్యల్లో కాకుండా, అది మనకు ఇచ్చే 'సమయం, స్వేచ్ఛ' కోణంలో చూడాలి.
సౌకర్యం vs స్వయం సమృద్ధి: ఇండియాలో డబ్బుంటే పనులన్నీ ఇతరులతో చేయించుకుని మన సమయాన్ని కొనుక్కోవచ్చు. అదే విదేశాల్లో ఎంత డబ్బున్నా పనులన్నీ మనమే చేసుకోవాలి, అది స్వయం సమృద్ధిని నేర్పుతుంది కానీ సమయాన్ని హరిస్తుంది.
క్వాలిటీ ఆఫ్ లైఫ్: బెంగళూరులో లగ్జరీ ఇల్లు దొరకొచ్చు కానీ, రోడ్డు మీదకు వస్తే ట్రాఫిక్, దుమ్ము తప్పవు. లండన్లో చిన్న ఇంట్లో ఉన్నా.. బయటకు వస్తే స్వచ్ఛమైన గాలి, మంచి పార్కులు, మెరుగైన పౌర సౌకర్యాలు దొరుకుతాయి.
కెరీర్ గ్రోత్: కేవలం జీతమే కాకుండా.. చేసే పనిలో సంతృప్తి, అంతర్జాతీయ అనుభవం కావాలనుకునే వారికి విదేశాలే కరెక్ట్. కానీ ఫ్యామిలీ, పండగలు, బంధువులు, ఇంటి భోజనం కావాలనుకునే వారికి ఇండియానే స్వర్గం.
