పెట్రోల్, డీజిల్ ధరలు తగ్గుతాయంటే అంతకంటే మంచి వార్త ఏముంటుంది? ఇప్పుడు భారత్ వేస్తున్న ఒక అడుగు అటు దేశ ఖజానాకు, ఇటు సామాన్యుడి జేబుకు ఊరటనిచ్చేలా ఉంది. అమెరికాతో ట్రేడ్ డీల్ కుదిరిన వెంటనే భారత్ తన పెట్రో చూపును వెనెజువెలా (Venezuela) వైపు తిప్పింది. రష్యా నుంచి చమురు కొనడం తగ్గించి, వెనెజువెలా నుంచి దిగుమతి చేసుకుంటే ఏటా అక్షరాలా రూ.27,000 కోట్లు (3 బిలియన్ డాలర్లు) ఆదా అవుతాయట. ఎస్బీఐ రీసెర్చ్ (SBI Research) బయటపెట్టిన ఈ లెక్కలు ఇప్పుడు ఆసక్తికరంగా మారాయి. అసలు వెనెజువెలా ఆయిల్ అంత చౌకగా వస్తోందా? రష్యాను ఎందుకు పక్కన పెడుతున్నాం?
రూ.27 వేల కోట్లు ఎలా మిగులుతాయి?
ఎస్బీఐ రీసెర్చ్ నివేదిక ప్రకారం భారత్ చమురు కొనుగోళ్లను రష్యా నుంచి వెనెజువెలాకు మళ్లిస్తే భారీగా ఆదా అవుతుంది. వెనెజువెలా చమురు బ్యారెల్పై మనకు 10 నుంచి 12 డాలర్ల వరకు డిస్కౌంట్ లభిస్తే అది భారత్ కు లాభదాయకమే. రవాణా ఖర్చులు, ఇతర పన్నులు అన్నీ పోయినా కూడా ఏటా మన దిగుమతుల బిల్లులో 3 బిలియన్ డాలర్లు (రూ.27 వేల కోట్లు) మిగులుతాయని అంచనా. ప్రస్తుతం అంతర్జాతీయ మార్కెట్ డేటా ప్రకారం వెనెజువెలా ముడిచమురు బ్యారెల్ ధర కేవలం 51 డాలర్ల వద్దే ట్రేడ్ అవుతుండటం ఇక్కడ గమనించాల్సిన విషయం. ఇంత తక్కువ ధరకు దొరుకుతున్నప్పుడు వదులుకోవడం తెలివితక్కువ పనే అవుతుంది.
దూరం ఎక్కువ.. మరి లాభం ఉంటుందా?
లాభం మాట అటుంచితే ఇందులో కొన్ని ప్రాక్టికల్ సమస్యలు కూడా ఉన్నాయి. రష్యా లేదా పశ్చిమాసియా దేశాలతో పోలిస్తే వెనెజువెలా మనకు భౌగోళికంగా చాలా దూరంలో ఉంది. పశ్చిమాసియా దేశాల నుంచి ఆయిల్ రావడానికి పట్టే సమయంతో పోలిస్తే, వెనెజువెలా నుంచి రావడానికి ఐదు రెట్లు ఎక్కువ సమయం పడుతుంది. పోనీ రష్యాతో పోల్చినా డబుల్ టైమ్ తీసుకుంటుంది. దూరం పెరిగితే రవాణా ఖర్చులు, బీమా ప్రీమియంలు పెరుగుతాయి. షిప్పింగ్ చార్జీలు తడిసి మోపెడవుతాయి. అయితే బ్యారెల్ ధర తక్కువగా ఉండటం వల్ల ఈ రవాణా భారాన్ని తట్టుకుని కూడా లాభం పొందవచ్చని నిపుణులు లెక్కలు వేస్తున్నారు.
రష్యా డిస్కౌంట్లకు కాలం చెల్లిందా?
ఇన్నాళ్లు మనకు చౌకగా ఆయిల్ ఇచ్చిన రష్యాను కాదని, ఉన్నట్టుండి వెనెజువెలా వైపు ఎందుకు చూస్తున్నాం అనే సందేహం రావచ్చు. దీనికి కారణం భవిష్యత్తు అంచనాలే. ఉక్రెయిన్ తో యుద్ధం కారణంగానే రష్యా ఇన్నాళ్లు మనకు భారీ డిస్కౌంట్లు ఇచ్చింది. కానీ యుద్ధ పరిస్థితులు సద్దుమణిగితే ఆ ఆఫర్లు ఆగిపోవచ్చు. రష్యా నుంచి డిస్కౌంట్లు సుదీర్ఘకాలం అందే అవకాశం లేదు. అందుకే ముందుగానే ప్రత్యామ్నాయ మార్గాలను వెతుక్కోవడమే ఉత్తమం. ఈ వ్యూహంలో భాగంగానే భారత్ ఇప్పుడు వెనెజువెలా వైపు అడుగులు వేస్తోంది. అమెరికాతో డీల్ కుదరడం కూడా ఇందుకు మార్గం సుగమం చేసింది.
దూరం ఎక్కువైనా.. లాభం ముఖ్యం!
రష్యా ఆఫర్లు ఎప్పుడు ఆగిపోతాయో తెలియదు. అందుకే 'ముందుచూపు'తో వెనెజువెలా గేట్లు తెరుచుకుంది భారత్. రవాణా కష్టాలున్నా సరే.. రూ.27 వేల కోట్లు మిగులుతుంటే ఆ మాత్రం రిస్క్ చేయడంలో తప్పులేదు.
