గల్ఫ్ మంటలు.. కేరళ ఎలక్షన్స్! ఒకవైపు బాంబుల మోత.. ఇంకోవైపు ఓట్ల వేట: ఆ 22 లక్షల మంది పరిస్థితి ఏంటి?
ఒకవైపు మిసైళ్లు ఆకాశాన్ని చీల్చుకుంటూ వెళ్తుంటే, ఇంకోవైపు బ్యాలెట్ బాక్సులు ఎలక్షన్ కోసం సిద్ధమవుతున్నాయి. దాదాపు నెల రోజులుగా ఇజ్రాయెల్-అమెరికా మరియు ఇరాన్ మధ్య రగులుతున్న మహా యుద్ధం, కేవలం ప్రపంచ ఇంధన మార్కెట్లను భయపెట్టడమే కాదు.. ఏకంగా మన ఇండియాలో జరగబోయే ఎన్నికల తలరాతను మార్చే దిశగా వెళ్తోంది.
వింటే ఆశ్చర్యంగా ఉన్నా.. ఎక్కడో పశ్చిమాసియాలో పడుతున్న బాంబుల ఎఫెక్ట్ వచ్చే నెల (ఏప్రిల్) మన దేశంలో జరగనున్న ఐదు రాష్ట్రాల అసెంబ్లీ ఎన్నికలపై, అందులోనూ ముఖ్యంగా కేరళ గెలుపోటములపై భారీగా పడబోతోందన్న నిజం ఇప్పుడు పొలిటికల్ సర్కిల్స్ను షేక్ చేస్తోంది!
ఏప్రిల్ 9 రణరంగం.. 22 లక్షల ప్రవాసీ ఓటర్లు!
మొత్తం 140 అసెంబ్లీ స్థానాలున్న కేరళ రాష్ట్రంలో ఏప్రిల్ 9న ఒకే దశలో ఎన్నికల పోలింగ్ జరగనుంది. అయితే కేరళ పాలిటిక్స్లో ఉన్న అతిపెద్ద ట్విస్ట్ ఏమిటంటే.. గల్ఫ్ దేశాలకు ఉపాధి కోసం వలస వెళ్లే భారతీయుల్లో కేరళ వాసులే అత్యధికం. కేరళ మైగ్రేషన్ సర్వే లెక్కల ప్రకారం పశ్చిమాసియాలో అక్షరాలా 22 లక్షల మంది కేరళ ప్రజలు జీవిస్తున్నారు.
వీరంతా ఎన్నికల సమయం వచ్చిందంటే చాలు.. తమ ఓటు హక్కును వినియోగించుకోవడానికి సౌదీ అరేబియా, యూఏఈ, కువైట్ లాంటి గల్ఫ్ దేశాల నుంచి సొంత గడ్డకు వాలిపోతుంటారు. కొన్ని ప్రవాసీ గ్రూపులైతే వీళ్ల కోసం ఏకంగా స్పెషల్ ఛార్టర్డ్ విమానాలు నడుపుతుంటాయి. ఈసారి ఎన్నికల సమయంలోనే 'ఈస్టర్', ఇతర పండగలు కూడా కలిసి రావడంతో, ఆ దేశాల నుంచి ఓటెయ్యడానికి వచ్చేవారి సంఖ్య రికార్డు స్థాయిలో ఉంటుందని అందరూ ఆశపడ్డారు.
కలసిరాని కాలం.. ఆగిపోయిన ఛార్టర్డ్ విమానాలు!
కానీ, గల్ఫ్లో నెలకొన్న భీకర యుద్ధం వల్ల ఆ ప్రవాసులు ఇప్పుడు తమ స్వదేశానికి వచ్చేందుకు కనీస అనుకూలమైన పరిస్థితి లేకుండా పోయింది. జాతీయ మీడియా కథనాల ప్రకారం ఇప్పటి వరకూ కేవలం వేలల్లోనే కేరళకు చేరుకున్నారు. ఈసారి గల్ఫ్ నుంచి ఓటెయ్యడానికి వచ్చే వారి సంఖ్య ఏకంగా సగానికి పైగా పడిపోవచ్చని భారీ అంచనాలు వేస్తున్నారు.
యూఏఈ కేరళ ముస్లిం కల్చరల్ సెంటర్ అధ్యక్షుడు పుథుర్ రెహమాన్ ఈ పరిస్థితిపై తీవ్ర ఆవేదన వ్యక్తం చేశారు. "ఎలక్షన్స్ వచ్చాయంటే మేము యూఏఈ నుంచి ఏకంగా 8 ఛార్టర్డ్ విమానాలు ఏర్పాటు చేసేవాళ్ళం. కానీ, ఈసారి యుద్ధం కారణంగా ఆ పరిస్థితి అస్సలు లేదు" అని ఆయన కుండబద్దలు కొట్టారు. ఆకాశంలో ఆంక్షల వల్ల విమాన ప్రయాణాలు తీవ్రంగా దెబ్బతిన్నాయి. వేలాది విమానాలు రద్దు కావడమే కాకుండా, దుబాయ్, అబుధాబి, దోహా వంటి మహా నగరాల్లో విమానాశ్రయాలను కూడా తాత్కాలికంగా మూసివేయడం వీళ్ల కొంపముంచింది.
ఉత్తర కేరళలో గుబులు.. లీగ్కు టెన్షన్ టెన్షన్!
ఈ గల్ఫ్ యుద్ధం దెబ్బ నేరుగా ఉత్తర (నార్త్) కేరళలోని మలప్పురం, కొజికోడ్, కాసర్గడ్, పాలక్కాడ్, త్రిశూర్ జిల్లాల్లోని అసెంబ్లీ స్థానాలపై భారీగా పడబోతోంది. ముఖ్యంగా కాంగ్రెస్ సారథ్యంలోని 'యూడీఎఫ్ కూటమి'లో కీలక పార్టీ అయిన 'ఇండియన్ యూనియన్ ముస్లిం లీగ్ (IUML)'.. గల్ఫ్ దేశాల నుంచి వచ్చే ఓటర్లతోనే అత్యధిక లబ్ధి పొందుతుంటుంది. ఈ పరిణామంపై ఆ పార్టీ ప్రధాన కార్యదర్శి సయ్యిది మునావర్ అలీ సాహిబ్ థంగల్ తీవ్ర ఆందోళన వ్యక్తం చేశారు.
యుద్ధం వల్ల ఎన్నికల కోసం చాలా మంది ఓటర్లు వచ్చే అవకాశం తక్కువగా ఉందని, అయినా సరే వారిని రప్పించేందుకు తమ ప్రయత్నాలు చివరికంటా కొనసాగుతాయని స్పష్టం చేశారు. పరిస్థితిలో ఏ మార్పు రాకుంటే మాత్రం తమ నియోజకవర్గాల్లో పోలింగ్ శాతం కచ్చితంగా తగ్గుతుందని ఆయన ఆందోళనగా చెప్పారు.
టికెట్ల ధరలు మంటలు.. ఫలితాలపై ఎఫెక్ట్ ఎంత?
అత్యధిక సంఖ్యలో కేరళ ఓటర్లు ఉన్నది యూఏఈలోనే. ఒకవేళ ఏ క్షణమైనా యుద్ధం ఆగిపోయి, పరిస్థితులు సాధారణ స్థితికి వచ్చినా సరే.. విమాన ఛార్జీలు ఆకాశాన్ని తాకుతాయని కేఎంసీసీ (KMCC) యూఏఈ నేషనల్ కమిటీ జనరల్ సెక్రటరీ అన్వర్ నాహా మరో చేదు నిజం చెప్పారు. ఇదిలా ఉండగా.. రాజకీయ విశ్లేషకులు మాత్రం మరో వాదన వినిపిస్తున్నారు.
మొత్తం పోలింగ్ శాతంపై ఈ ప్రవాసీ ఓటర్ల ప్రభావం చాలా స్వల్పంగానే ఉంటుందని వారు అంచనా వేస్తున్నారు. ఉత్తర కేరళలోని కొన్ని నియోజకవర్గాల్లో ప్రవాసీ ఓటర్లు అధిక సంఖ్యలో ఉన్నప్పటికీ, అవన్నీ భారీ మెజార్టీతో గెలిచే స్థానాలే కాబట్టి.. ఈ గల్ఫ్ గైర్హాజరీ వల్ల గెలుపోటములపై పడే ఎఫెక్ట్ చాలా పరిమితమేనని వారు కొట్టిపారేస్తున్నారు.
ఏది ఏమైనా.. ఎక్కడో పడుతున్న బాంబులు ఇక్కడ బ్యాలెట్ బాక్సులను ప్రభావితం చేయడం అంటే అది గ్లోబల్ విలేజ్లో మనం ఎలా బతుకుతున్నామో చెప్పే సజీవ సాక్ష్యం. బ్యాలెట్ వార్ గెలుస్తుందా? లేక మిసైల్ వార్ ఓటును ఆపుతుందా? కేరళ తీర్పు వచ్చేదాకా వేచి చూడాల్సిందే!
Also Read:
గ్యాస్ సిలిండర్ రూల్స్ మారాయా? అసలు నిజం బయటపెట్టిన కేంద్రం!పిల్లల సోషల్ మీడియా వాడకంపై మహారాష్ట్ర సర్కార్ సంచలన నిర్ణయం!
ఢిల్లీలో కాంగ్రెస్కు బిగ్ షాక్.. ఆ భవనాలు ఖాళీ చేయాలి!
తమిళనాడు ఎన్నికల బరి నుంచి తప్పుకున్న కమల్ హాసన్.. కారణం ఇదే!
తమిళనాడు ఎన్నికల్లో ఉచితాల సునామీ.. అన్నాడీఎంకే సంచలన హామీలు!
