తమిళనాట కమల్ 'హై డ్రామా': ఎన్నికల బరి నుంచి తప్పుకున్న లోకనాయకుడు.. అసలు కారణం ఏంటి?
రాజకీయాల్లో ఎప్పుడు ఏ బాంబు పేలుతుందో, ఏ సమీకరణం ఎలా మారుతుందో ఎవరూ ఊహించలేరు. తమిళనాడు అసెంబ్లీ ఎన్నికల వేళ సరిగ్గా ఇలాంటి ఒక ఊహించని రాజకీయ భూకంపమే వచ్చింది. తనదైన నటనతో వెండితెరను ఏలిన లోకనాయకుడు.. ఇప్పుడు రాజకీయ తెరపై వేసిన ఒక అడుగు యావత్ రాష్ట్రాన్ని ఉలిక్కిపడేలా చేసింది. మక్కళ్ నీది మయ్యమ్ (ఎమ్ఎన్ఎమ్) అధినేత కమల్ హాసన్ తీసుకున్న ఒక సంచలన నిర్ణయం ఇప్పుడు డీఎంకే కూటమిలో, తమిళ రాజకీయాల్లో సరికొత్త ప్రకంపనలు సృష్టిస్తోంది. అసలు కమల్ హాసన్ ఎందుకు వెనక్కి తగ్గారు? ఈ నిర్ణయం వెనుక ఉన్న అసలు కారణం ఏమిటి?
సొంత గుర్తు కాదంటే.. పోటీకి సైలెంట్: తెరవెనుక జరిగిందిదే!
2026 అసెంబ్లీ ఎన్నికల మహా సంగ్రామం నుంచి తన పార్టీ పూర్తిగా తప్పుకుంటున్నట్లు కమల్ హాసన్ మంగళవారం రాత్రి అధికారికంగా ప్రకటించి బాంబు పేల్చారు. స్వయంగా పోటీ చేయకపోవడమే కాకుండా, ముఖ్యమంత్రి ఎం.కె. స్టాలిన్ నేతృత్వంలోని డీఎంకే కూటమికి బేషరతుగా పూర్తి మద్దతు ఇస్తున్నట్లు ఆయన స్పష్టం చేశారు.
వాస్తవానికి మక్కళ్ నీది మయ్యమ్ డీఎంకే కూటమిలో ఒక భాగస్వామి. కానీ సీట్ల పంపకాల దగ్గరే అసలు పేచీ మొదలైంది. కమల్ ఆశించిన స్థాయిలో డీఎంకే సీట్లు కేటాయించలేదు. సరే, ఇచ్చిన సీట్ల వరకైనా సర్దుకుపోదామంటే.. డీఎంకే మరో పెద్ద కండిషన్ పెట్టింది. ఆ కేటాయించిన స్థానాల్లో కూడా కమల్ పార్టీ అభ్యర్థులు తమ సొంత గుర్తు మీద కాకుండా, డీఎంకే పార్టీ గుర్తు అయిన 'ఉదయించే సూర్యుడు' పైనే పోటీ చేయాలని ప్రతిపాదించింది.
సరిగ్గా ఇక్కడే కమల్ హాసన్ ఆత్మాభిమానం అడ్డుపడింది. తమ పార్టీ సొంత గుర్తును కాదని.. వేరొక పార్టీ గుర్తుపై పోటీ చేయడం అనేది తనకు, తనను నమ్ముకున్న కార్యకర్తలకు ఏమాత్రం ఆమోదయోగ్యం కాదని ఆయన ఖరాఖండీగా తేల్చిచెప్పారు. ఈ నేపథ్యంలోనే ఎవరి గుర్తు మీదా పోటీ చేయడం ఇష్టం లేక.. ఎన్నికల బరి నుంచే పూర్తిగా వైదొలగాలని ఆయన ఒక కఠినమైన నిర్ణయం తీసుకున్నారు. ఈ విషయాలన్నీ వివరిస్తూ ఆయన ఒక సుదీర్ఘమైన లేఖను విడుదల చేశారు.
ఇది త్యాగం కాదు.. రాష్ట్రం కోసం నా కర్తవ్యం!
ఈ నిర్ణయం వెనుక సీట్ల పేచీ మాత్రమే కాదు, ఒక లోతైన సైద్ధాంతిక ఉద్దేశం కూడా ఉందని కమల్ ఆ లేఖలో స్పష్టం చేశారు. "తమిళనాడు హక్కులను కేంద్రం హరిస్తోంది. రాష్ట్ర సంక్షేమాన్ని పణంగా పెడుతున్న మతవాద శక్తులు మన రాష్ట్రాన్ని హస్తగతం చేసుకోవాలని కుట్ర చేస్తున్నాయి. ఇలాంటి క్లిష్ట సమయంలో కూటమిలో కొన్ని సీట్ల కోసం పట్టుబట్టడం సరైన సోదరుడి లక్షణం కానేకాదు. ఇది నేను చేస్తున్న త్యాగం కాదు.. ఇది నా కర్తవ్యం. నా స్వలాభం కంటే రాష్ట్ర ప్రయోజనాలే నాకు ముఖ్యం" అని కమల్ హాసన్ అత్యంత భావోద్వేగంతో వ్యాఖ్యానించారు.
అంతేకాదు, తన పార్టీ ప్రత్యక్షంగా ఎన్నికల బరిలో దిగకపోయినా.. ఒక సైనికుడిలా డీఎంకే కూటమి అభ్యర్థుల గెలుపు కోసం రాష్ట్రవ్యాప్తంగా ప్రచారం చేస్తానని ఆయన మాటిచ్చారు.
కమల్ను కొనియాడిన స్టాలిన్
కమల్ హాసన్ తీసుకున్న ఈ సంచలన నిర్ణయంపై ముఖ్యమంత్రి ఎం.కె. స్టాలిన్ వెంటనే స్పందించారు. "కమల్ హాసన్ చేసిన ఈ త్యాగం చరిత్రాత్మకం. ఆయనకు ఎలా కృతజ్ఞతలు చెప్పాలో కూడా నాకు మాటలు రావడం లేదు. రాష్ట్రం కోసం ఆయన తీసుకున్న ఈ నిర్ణయాన్ని చరిత్ర ఎప్పటికీ ప్రశంసిస్తుంది" అంటూ స్టాలిన్ అత్యంత భావోద్వేగంతో ట్వీట్ చేశారు.
ఇప్పటికే డీఎంకే మద్దతుతో కమల్ హాసన్ రాజ్యసభ ఎంపీగా ఎన్నికై చట్టసభల్లో అడుగుపెట్టిన సంగతి తెలిసిందే. తాజాగా ఆయన తీసుకున్న ఈ నిర్ణయంతో, తమిళనాడు అసెంబ్లీ ఎన్నికల బరిలో ముఖాముఖి పోరు ప్రధానంగా డీఎంకే కూటమి, అన్నాడీఎంకే-బీజేపీ పార్టీల మధ్యే హోరాహోరీగా సాగబోతున్నట్లు స్పష్టమవుతోంది.
కమల్ ప్రచారం.. డీఎంకేకు శ్రీరామరక్షేనా?
సొంత పార్టీ గుర్తును వదులుకోలేక ఎన్నికల బరి నుంచి తప్పుకున్న కమల్ హాసన్.. ఇప్పుడు డీఎంకే తరపున ప్రచార బాధ్యతలు తన భుజాన వేసుకున్నారు. రాష్ట్ర హక్కుల కోసం ఆయన తీసుకున్న ఈ నిర్ణయం ఆయన వ్యక్తిత్వాన్ని మరింత ఎత్తులో నిలబెట్టింది. లోకనాయకుడి చరిష్మా, ఆయన వాగ్ధాటి ఎన్నికల ప్రచారంలో డీఎంకేకు ఏ మేరకు ఓట్లు తెచ్చిపెడతాయో, మతవాద శక్తులను నిలువరించడంలో ఏ మేరకు సఫలమవుతాయో చూడాలి. ఏదేమైనా.. 2026 తమిళనాడు ఎన్నికలు ఒక యాక్షన్ థ్రిల్లర్ను తలపించడం ఖాయం!
