20 నిమిషాల్లో 840 కోట్లు.. ట్రంప్ ప్రకటనకు ముందే మార్కెట్లో జరిగిన ఆ 'మ్యాజిక్' వెనుక ఎవరున్నారు?
స్టాక్ మార్కెట్ అంటేనే ఒక మహా సముద్రం. అందులో ఎప్పుడు ఏ అల ఎగసిపడుతుందో, ఎవరిని ముంచేస్తుందో అంచనా వేయడం సామాన్యుల వల్ల కాదు. కానీ, కొందరికి మాత్రం రేపు ఏం జరగబోతోందో ముందే తెలిసిపోతుంది. అమెరికా అధ్యక్షుడు డొనాల్డ్ ట్రంప్ సంచలన ప్రకటన చేయడానికి సరిగ్గా కొన్ని నిమిషాల ముందు.. మార్కెట్లో జరిగిన ఒక 'మాయాజాలం' ఇప్పుడు ప్రపంచ ఆర్థిక వర్గాలను ఉలిక్కిపడేలా చేస్తోంది. కేవలం 20 నిమిషాల్లో వందల కోట్లు కొల్లగొట్టిన ఆ తెరవెనుక 'తిమింగలాలు' ఎవరు? ఈ స్కామ్ లాంటి భారీ ట్రేడింగ్ సామాన్య ఇన్వెస్టర్ల గుండెల్లో ఎందుకు రైళ్లు పరిగెత్తిస్తోందో తెలుసుకోవాల్సిన సమయమిది.
అనుమానాస్పద ట్రేడింగ్.. ట్రంప్ ప్రకటనకు ముందే స్కెచ్!
అమెరికా స్థానిక కాలమానం ప్రకారం సోమవారం ఉదయం 6.50 గంటలు. సాధారణంగా ఆ సమయంలో (ప్రీ-మార్కెట్ అవర్స్) ట్రేడింగ్ చాలా నెమ్మదిగా, తక్కువగా ఉండాలి. కానీ, ఎస్ అండ్ పీ (S&P) 500 ఈ-మినీ ఫ్యూచర్స్లో ఒక్కసారిగా అసాధారణమైన భారీ ట్రేడింగ్ నమోదైంది. సరిగ్గా అదే సమయంలో చమురు మార్కెట్లు కూడా అనుమానాస్పదంగా కదిలాయి.
అసలు ట్విస్ట్ ఏంటంటే.. ఈ భారీ కుదుపు జరిగిన సరిగ్గా పదిహేను నిమిషాల తర్వాత, డొనాల్డ్ ట్రంప్ తన సొంత సోషల్ మీడియా ప్లాట్ఫామ్ 'ట్రూత్ సోషల్'లో ఒక బాంబు పేల్చారు. ఇరాన్ విద్యుత్ కేంద్రాలు, ఇంధన మౌలిక సౌకర్యాలపై దాడులను ఐదు రోజుల పాటు తాత్కాలికంగా ఆపుతున్నట్లు ప్రకటించారు. ఇరాన్ యుద్ధం కారణంగా గత 24 రోజులుగా కుదేలైన మార్కెట్లకు ఇదొక ఊరట. కానీ, ట్రంప్ పోస్ట్ పెట్టకముందే.. ఆ రహస్యం ఎవరికో లీక్ అయ్యింది. వాళ్లు పక్కా స్కెచ్తో మార్కెట్లోకి ఎంటరై ట్రేడింగ్ పూర్తి చేసేశారు!
వ్యూహాత్మక ఎత్తుగడ.. నిమిషాల్లో వేల కోట్ల మార్పిడి
ఈ భారీ ట్రేడింగ్ వ్యవహారంపై 'అన్యూజువల్ వేల్స్' అనే ట్రేడింగ్ ప్లాట్ఫామ్ దిగ్భ్రాంతికర నిజాలు బయటపెట్టింది. ఈ వ్యవహారం నడిపిన వ్యక్తులు అత్యంత పకడ్బందీగా, సమన్వయంతో నిర్ణయాలు తీసుకున్నారు. దాడులు ఆగిపోయి ఉద్రిక్తతలు తగ్గితే స్టాక్ మార్కెట్ ఆకాశాన్ని తాకుతుందని వాళ్లు ముందే పసిగట్టారు. అందుకే ఏకంగా 1.5 బిలియన్ డాలర్లు (దాదాపు రూ.12,600 కోట్లు) విలువైన ఎస్ అండ్ పీ 500 ఫ్యూచర్స్ను గుట్టుచప్పుడు కాకుండా కొనుగోలు చేశారు.
అలాగే, యుద్ధం ఆగిపోయి చమురు సరఫరా భయాలు తగ్గితే, క్రూడ్ ఆయిల్ ధరలు కుప్పకూలుతాయని వాళ్లకు తెలుసు. అందుకే, ముందుచూపుతో 192 మిలియన్ డాలర్ల (దాదాపు రూ.1,615 కోట్లు) విలువైన ఆయిల్ ఫ్యూచర్లను తెగనమ్మేశారు. కేవలం ఒక్క నిమిషం వ్యవధిలోనే దాదాపు 6,200 బ్రెంట్, వెస్ట్ టెక్సాస్ ఇంటర్మీడియట్ (WTI) ఫ్యూచర్స్ కాంట్రాక్ట్లు చేతులు మారాయి. వీటి మొత్తం విలువ ఏకంగా రూ.4,870 కోట్లు (580 మిలియన్ డాలర్లు). ఇది సాధారణ ట్రేడింగ్ కంటే 4 నుంచి 6 రెట్లు అధికం కావడం గమనార్హం.
కోలుకున్న మార్కెట్లు.. కుప్పకూలిన చమురు ధరలు
వాళ్లు ఊహించినట్లే, ట్రంప్ పోస్ట్ బయటకు వచ్చిన వెంటనే మార్కెట్ రూపురేఖలు మారిపోయాయి. ప్రారంభ గంట మోగకముందే ఎస్ అండ్ పీ 500 ఫ్యూచర్స్ 2.5 శాతానికి పైగా లాభాలతో ఎగబాకింది. మరోవైపు చమురు ధరలు దారుణంగా పడిపోయాయి. బ్రెంట్ క్రూడ్ బ్యారెల్ ధర 109 డాలర్ల నుంచి ఏకంగా 92 డాలర్ల కనిష్ట స్థాయికి పతనమైంది. అటు వెస్ట్ టెక్సాస్ ఇంటర్మీడియట్ కూడా దాదాపు 6 శాతం క్షీణించి బ్యారెల్కు 88.70 డాలర్ల స్థాయిని తాకింది.
సామాన్యుడి ఇన్వెస్ట్మెంట్కు భద్రత ఎక్కడ?
కేవలం 20 నిమిషాల్లో ఆ అదృశ్య వ్యక్తులు జేబులో వేసుకున్న లాభం అక్షరాలా రూ.840 కోట్లు. ఈ ఉదంతం ప్రపంచ ఫైనాన్షియల్ మార్కెట్లలో ఒక అగ్నిపర్వతాన్ని బద్దలుకొట్టింది. ట్రంప్ లాంటి అగ్రరాజ్య అధినేత తీసుకునే అత్యంత రహస్యమైన నిర్ణయాలు కూడా, మార్కెట్ బ్రోకర్లకు ముందే ఎలా లీక్ అవుతున్నాయి? దీని వెనుక ఉన్న 'ఇన్సైడర్ ట్రేడింగ్' భూతం ఎవరు? ఒక సామాన్య ఇన్వెస్టర్గా మనం ఆలోచించాల్సింది ఒక్కటే.. అంతర్జాతీయ మార్కెట్లు ఎప్పుడూ పెద్దల గుప్పిట్లోనే ఉంటాయి. ఇలాంటి భౌగోళిక ఉద్రిక్తతల సమయంలో గుడ్డిగా ట్రేడింగ్ చేయడం అంటే, మన కష్టార్జితాన్ని ఆ తిమింగలాల నోట్లో వేయడమే!
Also Read:
US Iran War | దాడులకు బ్రేక్.. తెరవెనుక ఇరాన్, అమెరికా మైండ్ గేమ్!రాత్రి పూట కూడా సోలార్ విద్యుత్: చైనా శాస్త్రవేత్తల అద్భుతం
ఎయిర్ క్వాలిటీ ఇండెక్స్ 2025: భారత్, పాకిస్థాన్, చైనాలకు వార్నింగ్
ట్రంప్ సరికొత్త డ్రామా.. ఇరాన్ యుద్ధం నా ఐడియా కాదు!
ఖమేనీపై దాడికి 48 గంటల ముందు ఏం జరిగింది? ట్రంప్-నెతన్యాహు మాస్టర్ ప్లాన్!
