Iran Crisis: ఇరాన్లోని భారతీయులకు కేంద్రం హై అలర్ట్.. ఎంబసీకి చెప్పకుండా భూ సరిహద్దులు దాటితే కష్టాలే!
పశ్చిమాసియాలో రోజురోజుకూ తీవ్రమవుతున్న యుద్ధ వాతావరణం నేపథ్యంలో, ఇరాన్లో నివసిస్తున్న భారతీయులకు కేంద్ర ప్రభుత్వం మరియు స్థానిక భారత రాయబార కార్యాలయం (ఇండియన్ ఎంబసీ) మరోసారి అత్యవసర హెచ్చరికలు జారీ చేశాయి.
సమన్వయం లేకుండా సరిహద్దులు దాటొద్దు
ఇరాన్లో ఉన్న మన పౌరులు ఎవరైనా సరే, ఎంబసీకి ముందస్తు సమాచారం ఇవ్వకుండా లేదా తమతో సమన్వయం చేసుకోకుండా ఎట్టి పరిస్థితుల్లోనూ భూ సరిహద్దుల (Land Borders) ద్వారా ఇరాన్ దాటి వెళ్లే ప్రయత్నం చేయొద్దని అధికారులు తీవ్రంగా హెచ్చరించారు. ప్రస్తుత విపత్కర పరిస్థితుల్లో ఎవరికి వారు స్వతంత్రంగా సరిహద్దుల గుండా ప్రయాణిస్తే తీవ్ర పరిణామాలు ఎదుర్కోవాల్సి వస్తుందని స్పష్టం చేశారు.
ఇమ్మిగ్రేషన్, వీసా కష్టాలు తప్పవు
ఎంబసీకి తెలియకుండా సరిహద్దు ప్రాంతాలకు వెళ్లే వారు ఇమ్మిగ్రేషన్ క్లియరెన్స్, పక్క దేశాల్లో ప్రవేశించడానికి అవసరమైన డాక్యుమెంటేషన్ వంటి అనేక చట్టపరమైన సమస్యలను ఎదుర్కొనే ప్రమాదం ఉందని రాయబార కార్యాలయం విడుదల చేసిన ప్రకటనలో పేర్కొంది. ముఖ్యంగా సరిహద్దు చెక్పోస్టుల దగ్గర ఉండే కఠినమైన నియమ నిబంధనల వల్ల ప్రయాణికులు అక్కడే చిక్కుకుపోయే అవకాశం ఉందని వార్నింగ్ ఇచ్చింది. అలా తమకు ఎలాంటి సమాచారం లేకుండా వెళ్లి సరిహద్దుల్లో ఇరుక్కుపోతే, ఆ తర్వాత వారిని కాపాడటం, న్యాయపరమైన సహాయం అందించడం ఎంబసీకి కూడా చాలా కష్టమవుతుందని అధికారులు కుండబద్ధలు కొట్టారు.
ముందుగా ఎంబసీని సంప్రదించండి
విదేశాల్లో భద్రతాపరమైన ముప్పు ఉన్నప్పుడు పౌరుల ప్రాణ రక్షణ కోసమే ఇలాంటి కఠినమైన హెచ్చరికలు జారీ చేస్తారని అధికారులు గుర్తుచేశారు. కాబట్టి, ఇరాన్ విడిచి వెళ్లాలనుకునే భారతీయులు ఎవరైనా సరే.. సొంతంగా ప్రయాణ ఏర్పాట్లు చేసుకోకుండా, ముందుగా టెహ్రాన్లోని భారత రాయబార కార్యాలయాన్ని తప్పనిసరిగా సంప్రదించి, వారి సూచనలు తీసుకోవాలని విజ్ఞప్తి చేశారు. అధికారిక సమాచార మార్గాల ద్వారా ఎప్పటికప్పుడు ఎంబసీతో టచ్లో ఉండాలని, వారు ఇచ్చే తాజా మార్గదర్శకాలను తూచా తప్పకుండా పాటించాలని కోరారు.
