ఆకాశంలో నక్షత్రాలకు బదులు నిప్పులు కురుస్తుంటే.. కింద భూమిపై ఉన్న మనుషుల పరిస్థితి ఏంటి? గల్ఫ్ దేశాల్లో ఇప్పుడు సరిగ్గా అదే జరుగుతోంది. ఫిబ్రవరి 28న రగులుకున్న ఇరాన్ యుద్ధ జ్వాలలు నెల రోజులు గడుస్తున్నా చల్లారకపోగా.. మరింత భీకరంగా మారుతున్నాయి. నిన్నటి దాకా ఒక దేశానికే పరిమితమైన దాడులు, ఇప్పుడు పొరుగు దేశాలకు వ్యాపిస్తూ ప్రపంచాన్ని వణికిస్తున్నాయి. ఏ క్షణంలో ఎక్కడ బాంబు పేలుతుందో తెలియని ఆ భయానక వాతావరణం మన పెట్రోల్ ధరలను, ప్రపంచ ఆర్థిక వ్యవస్థను ఎలా దెబ్బతీయబోతోందో ప్రతి ఒక్కరూ తెలుసుకోవాల్సిన తరుణమిది.
అర్థరాత్రి ఎయిర్పోర్ట్లో టెర్రర్.. మంటల్లో కువైట్ ఇంధన ట్యాంకులు
మంగళవారం అర్థరాత్రి కువైట్ అంతర్జాతీయ విమానాశ్రయం ఒక్కసారిగా దద్దరిల్లింది. ఇరాన్ పంపిన డ్రోన్లు నేరుగా విమానాశ్రయం ఆవరణలోని ఇంధన ట్యాంకులను ఢీకొట్టడంతో భారీగా మంటలు చెలరేగి, పెద్ద ఎత్తున పొగలు కమ్ముకున్నాయి. కువైట్ సివిల్ ఏవియేషన్ అథారిటీ ఈ భయంకర దృశ్యాలను వెల్లడించింది. అదృష్టవశాత్తూ ఈ దాడుల్లో ఆస్తి నష్టం మాత్రమే జరిగిందని, ఎలాంటి ప్రాణనష్టం లేదని అధికారులు ధృవీకరించారు.
శత్రువుపై కువైట్ ప్రతీకారం.. ఆరు డ్రోన్ల కూల్చివేత!
తమ గడ్డపై పడుతున్న డ్రోన్లను చూస్తూ కువైట్ సైన్యం సైలెంట్గా కూర్చోలేదు. "శత్రువుల క్షిపణి, డ్రోన్ దాడులను మా వైమానిక దళం అత్యంత సమర్థవంతంగా తిప్పికొడుతోంది" అని కువైట్ ఆర్మీ 'ఎక్స్' (ట్విట్టర్) వేదికగా గర్జించింది. ముఖ్యంగా కువైట్ నేషనల్ గార్డ్ బలగాలు ఆకాశంలోకి దూసుకెళ్లి ఏకంగా ఆరు డ్రోన్లను కూల్చివేసినట్లు గర్వంగా ప్రకటించాయి.
ఈ యుద్ధం మొదలైనప్పటి నుంచి కువైట్ ఎయిర్పోర్ట్ను టార్గెట్ చేయడం ఇది వరుసగా నాలుగోసారి. ఇంతకుముందు మార్చి 8న ఇంధన ట్యాంకులపై, ఆ తర్వాత మార్చి 14న ఏకంగా రాడార్ వ్యవస్థల పైనే ఇరాన్ దాడులకు తెగబడింది. మరోవైపు సౌదీ అరేబియా కూడా రంగంలోకి దిగి తమ తూర్పు ప్రాంతంలో నాలుగు డ్రోన్లను అడ్డుకున్నట్లు ప్రకటించడం గల్ఫ్లో నెలకొన్న హై-టెన్షన్కు అద్దం పడుతోంది.
బీరుట్లో బాంబుల వర్షం.. ఇజ్రాయెల్పై ఇరాన్ ప్రతీకారం
ఒకవైపు కువైట్ కాలిపోతుంటే.. మరోవైపు ఇజ్రాయెల్ దళాలు లెబనాన్లోని బీరుట్ నగరంపై బాంబుల వర్షం కురిపిస్తున్నాయి. హిజ్బుల్లా ఉగ్రవాద స్థావరాలను తుడిచిపెట్టడమే లక్ష్యంగా ఈ దాడులు చేస్తున్నట్లు ఇజ్రాయెల్ ప్రకటించింది. దీనికి దీటుగా ఇరాన్ మంగళవారం ఇజ్రాయెల్పై ఏకంగా 12వ సారి క్షిపణుల వర్షం కురిపించి ప్రతీకారం తీర్చుకుంది. లెబనాన్ నుంచి దూసుకొచ్చిన రాకెట్ దాడుల వల్ల ఇజ్రాయెల్ ఉత్తర ప్రాంతంలో గంటల తరబడి సైరన్లు మోగుతూనే ఉన్నాయి. ఈ భీకర దాడుల్లో ఒక మహిళ ప్రాణాలు కోల్పోయినట్లు తెలుస్తోంది.
ట్రంప్ 15 పాయింట్ల ప్లాన్.. శాంతి మంత్రం, సైనిక తంత్రం!
గల్ఫ్ మంటలు ఆకాశాన్ని తాకుతున్న ఈ తరుణంలో అమెరికా అధ్యక్షుడు డొనాల్డ్ ట్రంప్ రంగంలోకి దిగారు. ఈ యుద్ధానికి ఫుల్ స్టాప్ పెట్టే దిశగా ఆయన ప్రభుత్వం పాకిస్థాన్ మధ్యవర్తుల ద్వారా ఇరాన్కు ఒక '15 పాయింట్ల కాల్పుల విరమణ ప్రతిపాదనను' (శాంతి ప్రణాళిక) పంపింది.
అయితే ఇక్కడే అమెరికా డబుల్ గేమ్ ఆడుతోంది. ఒకవైపు శాంతి చర్చలు జరుపుతూనే.. మరోవైపు తన సైనిక కండబలాన్ని అమాంతం పెంచుతోంది. ఇప్పటికే ఆ ప్రాంతంలో మోహరించిన 50,000 మంది సైనికులకు తోడుగా.. అత్యంత భయంకరమైన '82వ ఎయిర్బోర్న్ డివిజన్' నుంచి మరో 3,000 మంది ఎలైట్ కమాండో సైనికులను రంగంలోకి దింపుతోంది.
శాంతి గెలుస్తుందా? అణు యుద్ధానికి దారితీస్తుందా?
గల్ఫ్లో రగులుతున్న ఈ యుద్ధం కేవలం రెండు మూడు దేశాల సమస్య కాదు.. ఇది ముడి చమురు మార్కెట్లను శాసించి మన ఇంట్లో గ్యాస్ బండ రేటును పెంచే అతిపెద్ద ఆర్థిక విపత్తు. ట్రంప్ శాంతి ప్రతిపాదనలకు ఇరాన్ తలొగ్గుతుందా? లేక అమెరికా మోహరించిన సైన్యం రంగంలోకి దిగి అణు యుద్ధానికి దారితీస్తుందా? రాబోయే కొద్ది రోజులు ప్రపంచ భవిష్యత్తును నిర్ణయించబోతున్నాయి అనడంలో ఎలాంటి సందేహం లేదు!
Also Read:
ఇరాన్-అమెరికా యుద్ధానికి ఎండ్ కార్డ్: ట్రంప్కు ఇరాన్ సర్ప్రైజ్ గిఫ్ట్!ఇరాన్తో ఎలాంటి ఒప్పందం లేదు: నౌకల రాకపోకలపై కేంద్రం క్లారిటీ!
ఇరాన్ గుండెల్లో వణుకు.. గల్ఫ్లో దిగుతున్న అమెరికా కమాండోలు!
20 నిమిషాల్లో 840 కోట్లు.. ట్రంప్ ప్రకటనకు ముందే ట్రేడింగ్ స్కామ్!
US Iran War | దాడులకు బ్రేక్.. తెరవెనుక ఇరాన్, అమెరికా మైండ్ గేమ్!
