పశ్చిమాసియా రణరంగంలో నిమిష నిమిషానికీ మారుతున్న పరిణామాలు ప్రపంచ దేశాలను ఉక్కిరిబిక్కిరి చేస్తున్నాయి. ఆకాశం నుంచి బాంబుల వర్షం కురుస్తుందని, ఏ క్షణమైనా ఇరాన్ పవర్ ప్లాంట్లు పేలిపోయి గల్ఫ్ అంధకారంలోకి కూరుకుపోతుందని యావత్ ప్రపంచం భయంతో వణికిపోతున్న వేళ.. వాషింగ్టన్ నుంచి ఒక అనూహ్యమైన, ఆశ్చర్యకరమైన ప్రకటన వెలువడింది.
రక్తం పారుతున్న ఆ ఎడారి నేలపై శాంతి మంత్రం జపిస్తూ అమెరికా అధ్యక్షుడు డొనాల్డ్ ట్రంప్ సోమవారం ఒక సంచలన నిర్ణయం తీసుకున్నారు. ఇరాన్పై దాడులను తాత్కాలికంగా నిలిపివేస్తున్నట్లు, రాబోయే ఐదు రోజుల పాటు ఎలాంటి సైనిక చర్యలకు దిగబోమని ఆయన ప్రకటించారు.
హార్ముజ్ జలసంధిని తెరవాలంటూ ఇరాన్కు 48 గంటల డెడ్లైన్ విధించి, సైన్యాన్ని ఉరుకులు పరుగులు పెట్టించిన ట్రంప్.. ఆ గడువు ముగియకముందే ఇలా అనూహ్యంగా యుద్ధానికి బ్రేక్ వేయడం అంతర్జాతీయ దౌత్య వర్గాల్లో పెను ప్రకంపనలు సృష్టిస్తోంది.
48 గంటల డెడ్లైన్ ముంగిట.. ఐదు రోజుల శాంతి మంత్రం
గత కొద్ది రోజులుగా ఇరాన్, అమెరికా అధికారుల మధ్య తెరవెనుక అత్యంత కీలకమైన మంతనాలు సాగుతున్నట్లు ట్రంప్ స్వయంగా తన సొంత సామాజిక మాధ్యమం 'ట్రూత్ సోషల్' వేదికగా వెల్లడించారు. పశ్చిమాసియాలో రెండు దేశాల మధ్య రగులుతున్న శత్రుత్వానికి సంపూర్ణ పరిష్కారం దిశగా.. గత రెండు రోజులుగా ఇరాన్తో చాలా ఫలవంతమైన, నిర్మాణాత్మకమైన చర్చలు జరుగుతున్నాయని ఆయన సంతోషం వ్యక్తం చేశారు.
ఈ వారం పొడవునా అత్యంత లోతైన, వివరమైన సంభాషణలు కొనసాగనున్నాయని తెలిపారు. ఈ సహృద్భావ వాతావరణాన్ని కాపాడే ఉద్దేశ్యంతోనే, ఇరాన్ విద్యుత్ కేంద్రాలు, ఇంధన మౌలిక సదుపాయాలపై ఎలాంటి సైనిక దాడులనైనా రాబోయే ఐదు రోజుల పాటు తక్షణమే వాయిదా వేయాలని తన రక్షణ విభాగాన్ని (పెంటగాన్) ఆదేశించినట్లు ట్రంప్ గంభీరంగా ప్రకటించారు. మంగళవారం ఉదయం 5 గంటలతో హార్ముజ్ జలసంధి డెడ్లైన్ ముగియనున్న తరుణంలో ట్రంప్ తీసుకున్న ఈ నిర్ణయం ఒక మాస్టర్ స్ట్రోక్ అని విశ్లేషకులు భావిస్తున్నారు.
భయపడి వెనక్కి తగ్గారు.. అమెరికాకు ఇరాన్ కౌంటర్!
అగ్రరాజ్యం అమెరికా అధ్యక్షుడు డొనాల్డ్ ట్రంప్ శాంతి పావురం ఎగురవేస్తుంటే, ఇరాన్ మాత్రం తనదైన శైలిలో భీకరమైన కౌంటర్ ఎటాక్కు దిగింది. ట్రంప్ యుద్ధంపై మరోసారి వెనక్కి తగ్గారని టెహ్రాన్ అధికారిక వర్గాలు ఎగతాళి చేశాయి. కాబూల్లోని ఇరాన్ రాయబార కార్యాలయం ఈ వ్యవహారంపై ఒక సంచలన ప్రకటన విడుదల చేసింది.
ఇరాన్ ఇంధన మౌలిక సదుపాయాలను లక్ష్యంగా చేసుకుని దాడులకు దిగితే సముద్రంలో పాతరలు (సీ-మైన్స్) పెడతామని తాము ఇచ్చిన గట్టి హెచ్చరికలకు భయపడే డొనాల్డ్ ట్రంప్ తన ప్రణాళికల నుంచి వెనక్కి తగ్గారని, అందులో భాగమే ఈ ఐదు రోజుల దాడుల వాయిదా నాటకమని ఇరాన్ కుండబద్దలు కొట్టింది.
ఏదేమైనా.. ఒకవైపు శాంతి చర్చలు జరుగుతున్నాయన్న వార్తలు గ్లోబల్ ఎనర్జీ మార్కెట్లకు, ఆకాశాన్నంటుతున్న చమురు ధరలకు ఒక పెద్ద ఊరటనిచ్చాయి. ఈ ఐదు రోజుల తాత్కాలిక విరామం.. శాశ్వత శాంతికి పునాది వేస్తుందా? లేక ఒక పెను విధ్వంసానికి ముందున్న నిశ్శబ్దమా? అన్నది కాలమే తేల్చాలి.
Also Read:
Middle East War: అమెరికాకు ఇరాన్ సీ-మైన్స్ వార్నింగ్Iran 6 Demands to US Israel : అగ్నిగుండంలో అగ్రరాజ్యాలు.. యుద్ధం ఆగాలంటే ఇరాన్ విధించిన ఆరు బ్రహ్మాస్త్రాలు ఇవే!
Leon Panetta on Trump: ట్రంప్ చిన్నపిల్లాడిలా వ్యవహరిస్తున్నారు.. ఇరాన్ యుద్ధంపై మాజీ సీఐఏ చీఫ్ ఫైర్
WHO Chief Tedros Adhanom: రాబోయే తరాలకు ద్వేషం వద్దు.. 13 దేశాల్లో ఎమర్జెన్సీ ఫోర్స్ ని దించిన డబ్ల్యూహెచ్ఓ
Iran Nuclear Crisis : శిథిలాల కింద సజీవంగా అణు భూతం.. ఇరాన్పై ఐక్యరాజ్యసమితి సంచలన హెచ్చరిక!
