కృత్రిమ మేధస్సు (AI) భయం ప్రపంచాన్ని వణికిస్తోంది! రేపు మన ఉద్యోగం ఉంటుందో, ఊడుతుందో తెలియని గందరగోళం. ఇలాంటి భయానక పరిస్థితుల్లో సామాన్యులకు, మధ్యతరగతి ప్రజలకు రక్షణ కవచంలాంటి ఒక సంచలన ప్రతిపాదనను తెరపైకి తెచ్చారు ప్రముఖ వెంచర్ క్యాపిటలిస్ట్, ఓపెన్ ఏఐ (OpenAI) తొలి పెట్టుబడిదారుల్లో ఒకరైన వినోద్ ఖోస్లా.
పన్నుల రద్దు.. 12.5 కోట్ల మందికి విముక్తి!
అమెరికా పన్నుల వ్యవస్థను పూర్తిగా ప్రక్షాళన చేయాలని ఖోస్లా గర్జించారు. ఏఐ కారణంగా ఉద్యోగాలు కోల్పోయే ప్రమాదం ఉన్నందున, ఏడాదికి లక్ష డాలర్ల కంటే తక్కువ ఆదాయం ఉన్న అమెరికన్లకు ఫెడరల్ ఇన్కమ్ ట్యాక్స్ (ఆదాయపు పన్ను) పూర్తిగా రద్దు చేయాలని ఆయన డిమాండ్ చేశారు. మరి ఆ ఆదాయ లోటును ఎలా భర్తీ చేస్తారు? అక్కడే ఆయన తన మాస్టర్ స్ట్రోక్ ఇచ్చారు.
క్యాపిటల్ గెయిన్స్పై పన్నులు పెంచాలని, ఆదాయపు పన్నుతో సమానంగా దాన్ని వసూలు చేయాలని ఆయన సూచించారు. దీనివల్ల ప్రభుత్వ ఖజానాకు ఎలాంటి గండి పడకుండానే.. సుమారు 12.5 కోట్ల మంది అల్పాదాయ, మధ్యతరగతి అమెరికన్లకు పన్నుల భారం నుంచి శాశ్వత విముక్తి లభిస్తుందని ఆయన విశ్లేషించారు. ఏఐ ఆర్థిక వ్యవస్థను పూర్తిగా మార్చేస్తున్న ఈ తరుణంలో పన్నుల విధానాన్ని పునరాలోచించాల్సిన ఆవశ్యకతను విధానకర్తలకు ఆయన తేల్చి చెప్పారు.
2028 ఎన్నికల బ్రహ్మాస్త్రం ఏఐ!
వాషింగ్టన్లో జరిగిన ఒక కీలక ఫోరమ్లో 'ఫైనాన్షియల్ టైమ్స్' (FT) తో మాట్లాడిన ఖోస్లా.. "నేను ఎవరితో మాట్లాడినా, వాళ్లందరిలో ఉన్న అతిపెద్ద భయం ఒక్కటే.. ఏఐ తమ ఉద్యోగాలను ఎక్కడ లాగేసుకుంటుందో అని!" అంటూ కుండబద్దలు కొట్టారు. రాబోయే 2028 అమెరికా అధ్యక్ష ఎన్నికల సైకిల్లో ఇదే "అతిపెద్ద సింగిల్ ఇష్యూ" కాబోతోందని ఆయన జోస్యం చెప్పారు.
ఈ ఏడాది ఓటర్ల ఆందోళనల జాబితాలో ఏఐ అగ్రస్థానానికి చేరుకుంది. ఉద్యోగాలు, ఆర్థిక వ్యవస్థ, మానసిక ఆరోగ్యం, యుద్ధ పరిణామాలు.. ఇలా ప్రతి రంగంపైనా ఏఐ చూపుతున్న ప్రభావం ఇప్పుడు కళ్లకు కడుతోంది. ఏఐపై రాష్ట్రాలు కఠినమైన నిబంధనలు తీసుకురావడాన్ని ట్రంప్ పరిపాలన వ్యతిరేకిస్తోంది. కానీ, స్వయంగా ట్రంప్ మద్దతుదారుల్లోనే కొందరు ఏఐపై కఠిన నియంత్రణలు కావాలని డిమాండ్ చేస్తుండటంతో అంతర్గత విభేదాలు స్పష్టంగా కనిపిస్తున్నాయి.
ట్రంప్ విధానాలకు సై.. కానీ విలువలపై ఫైర్!
ఇటీవలి ఎన్నికల్లో డెమోక్రాట్లకు భారీగా విరాళాలు ఇచ్చిన వినోద్ ఖోస్లా.. ఏఐ విధానాల విషయంలో మాత్రం ట్రంప్ ప్రభుత్వం చాలా అద్భుతమైన పని చేసింది అని కితాబిచ్చారు. ఏఐ మరియు క్రిప్టో జార్గా పేరొందిన డేవిడ్ శాక్స్, అలాగే 'హిల్ అండ్ వ్యాలీ ఫోరమ్' కో-హోస్ట్, సీనియర్ స్టేట్ డిపార్ట్మెంట్ అధికారి జాకబ్ హెల్బర్గ్ల పనితీరును ఆయన ఎత్తిచూపారు. ఆసక్తికరమైన విషయం ఏంటంటే.. ఖోస్లా సంస్థలో మేనేజింగ్ డైరెక్టర్గా ఉన్న కీత్ రాబోయిస్ భర్తే ఈ జాకబ్ హెల్బర్గ్!
కానీ అదే సమయంలో ట్రంప్ వ్యక్తిత్వంపై ఖోస్లా నిప్పులు చెరిగారు. ట్రంప్కు ఎలాంటి విలువలూ లేవని, విశ్వసనీయతను నాశనం చేసే నెగోషియేటింగ్ స్టైల్ (చర్చల విధానం) ఆయన సొంతం అని తీవ్రంగా విమర్శించారు.
డెమోక్రాట్లు దారి తప్పారు.. రిపబ్లికన్లకూ షాక్!
2028 అధ్యక్ష ఎన్నికల్లో ఎవరికి మద్దతు ఇవ్వాలన్నది తాను ఇంకా నిర్ణయించుకోలేదని ఖోస్లా స్పష్టం చేశారు. ట్రంప్ విలువలను సహిస్తున్నందుకు గాను రిపబ్లికన్ల ప్రముఖ రేసుగుర్రాలు.. ఉపాధ్యక్షుడు జేడీ వాన్స్, సెక్రటరీ ఆఫ్ స్టేట్ మార్కో రూబియోలను ఆయన కడిగిపారేశారు. మరోవైపు డెమోక్రాట్లను సైతం ఆయన వదల్లేదు. నవంబర్ మధ్యంతర ఎన్నికల ముందు పార్టీకి విరాళాలు తగ్గడాన్ని ఆయన ప్రస్తావించారు. పార్టీ మరీ అతిగా లెఫ్ట్ (వామపక్ష) భావజాలం వైపు వెళ్లడం వల్లే దాతల్లో తీవ్ర నిరాశ నెలకొందని విమర్శించారు.
ఆ 'సర్ప్రైజ్' కోసం ఎదురుచూపులు!
ఏఐ అంశంపై డెమోక్రాట్ నేత, కాలిఫోర్నియా గవర్నర్ గావిన్ న్యూసోమ్తో తాను మాట్లాడినట్లు ఖోస్లా వెల్లడించారు. కానీ, అధ్యక్ష రేసులో ఒక సర్ప్రైజ్ క్యాండిడేట్ తెరపైకి రావాలని తాను కోరుకుంటున్నట్లు ఆయన తన మనసులోని మాట బయటపెట్టారు.
"డెమోక్రాట్లు పూర్తిగా తప్పు మార్గంలో పయనిస్తున్నారు. వారు ఉద్యోగాలను కాపాడటంపైనే దృష్టి పెట్టారు కానీ.. ఏఐ వల్ల ఉద్యోగాలు కోల్పోయి రోడ్డున పడ్డవారికి భద్రత కల్పించడంపై కాదు. ఈ రెండూ ప్రాథమికంగా భిన్నమైనవి. అందుకే, మధ్యలో నుంచి ఎవరు పుట్టుకొస్తారో చూద్దాం. నా ఉద్దేశంలో ప్రతి ఎన్నికల సైకిల్లో మనకో సర్ప్రైజ్ ఉంటుంది. ఒబామా ఒక సర్ప్రైజ్.. ట్రంప్ ఒక సర్ప్రైజ్.. అందుకే మళ్లీ మనకో సర్ప్రైజ్ వస్తుందని నేను ఆశిస్తున్నాను" అని ఖోస్లా ముగించారు.
ఏఐ ఒక అదృశ్య సునామీలా ప్రపంచాన్ని కమ్మేస్తున్న వేళ.. సామాన్యుల పక్షాన నిలబడి వినోద్ ఖోస్లా వినిపించిన ఈ గళం, అమెరికా రాజకీయ ముఖచిత్రాన్నే మార్చేసే అసలైన టర్నింగ్ పాయింట్!
Also Read:
ఏఐ మ్యాజిక్: బ్రోకర్ల ప్రమేయం లేకుండా ఇల్లు అమ్మి లక్ష డాలర్లు లాభం!అమెరికాకు ఇరాన్ ఫైనల్ వార్నింగ్: భూతల దాడులు చేస్తే వదిలిపెట్టం!
ఏఐ దెబ్బకు ఉద్యోగాలు పోతున్నాయా? ఈ ఇద్దరికే సేఫ్!
గ్లోబల్ ఎనర్జీ క్రైసిస్: హార్మూజ్ జలసంధి మూసివేతతో దద్దరిల్లిన ప్రపంచం!
ఇరాన్పై దాడులకు అమెరికా స్కెచ్.. రంగంలోకి యూఎస్ఎస్ ట్రిపోలీ!
