YS Jagan in Ongole: వైసీపీ నా ఒక్కడి పార్టీ కాదు.. వైఎస్సార్ను ప్రేమించే ప్రతి ఒక్కరిదీ: వైఎస్ జగన్!
ఒంగోలు నియోజకవర్గ వైసీపీ శ్రేణులతో మాజీ ముఖ్యమంత్రి, వైఎస్సార్ కాంగ్రెస్ పార్టీ అధినేత వైఎస్ జగన్ మోహన్ రెడ్డి కీలక సమావేశం నిర్వహించారు. పార్టీ బలోపేతం, భవిష్యత్ కార్యాచరణ దిశగా నాయకులు, కార్యకర్తలకు ఆయన దిశానిర్దేశం చేశారు. రాష్ట్రవ్యాప్తంగా నియోజకవర్గాల వారీగా పార్టీ కేడర్తో నిర్వహిస్తున్న సమీక్షల్లో భాగంగానే ఈ భేటీ జరిగినట్లు ఆయన వెల్లడించారు. ఇదే వేదికపై నుంచి చుండూరు రవికి తన పూర్తి మద్దతు ఉంటుందని జగన్ ప్రకటించి శ్రేణుల్లో ఉత్సాహం నింపారు.
విశ్వసనీయతే వైసీపీ పునాది
వైయస్సార్ కాంగ్రెస్ పార్టీ కేవలం తన ఒక్కడి సొత్తు కాదని, మహానేత వైఎస్ రాజశేఖర్ రెడ్డిని గుండెల్లో పెట్టుకున్న ప్రతి ఒక్కరూ అహర్నిశలు శ్రమించి నిర్మించుకున్న కుటుంబం అని జగన్ ఉద్ఘాటించారు. పార్టీ కేవలం ఒక రాజకీయ వేదిక కాదని, అది విలువలు, విశ్వసనీయత అనే బలమైన పునాదుల మీద ఆవిర్భవించిందని ఆయన స్పష్టం చేశారు. గత 16 ఏళ్ల సుదీర్ఘ రాజకీయ ప్రయాణంలో ప్రజా సమస్యల పరిష్కారం కోసం ఎన్నో పోరాటాలు చేశామని గుర్తు చేసిన ఆయన.. గుండెధైర్యమే వైసీపీ అసలైన ట్రేడ్ మార్క్ అని అభివర్ణించారు.
మేనిఫెస్టో అంటే మాకు భగవద్గీత
తమ ఐదేళ్ల పాలనలో ప్రజలకు ఇచ్చిన ప్రతి హామీని తుచా తప్పకుండా అమలు చేశామని జగన్ గర్వంగా చెప్పారు. మేనిఫెస్టోను ఒక పవిత్ర గ్రంథంగా భావించి, ముందస్తుగానే క్యాలెండర్ ప్రకటించి మరీ సంక్షేమ పథకాలను ప్రజల గడప వద్దకు చేర్చిన ఘనత తమ ప్రభుత్వానిదేనని ఆయన గుర్తు చేశారు. కోవిడ్ లాంటి ఊహించని ఆరోగ్య సంక్షోభాలు, తీవ్రమైన ఆర్థిక ఇబ్బందులు ఎదురైనప్పటికీ పేదలు, మధ్యతరగతి ప్రజలకు అండగా నిలబడ్డామన్నారు. తమ హయాంలో రాష్ట్రం తెచ్చిన అప్పుల్లో సింహభాగం నేరుగా బటన్ నొక్కి లబ్ధిదారుల బ్యాంక్ ఖాతాల్లోకే జమ చేశామని ఆయన స్పష్టం చేశారు.
అప్పులు తెస్తున్నారు.. దోచుకుంటున్నారు
ప్రస్తుత కూటమి ప్రభుత్వం, ముఖ్యమంత్రి చంద్రబాబు నాయుడు తీరుపై వైఎస్ జగన్ తీవ్ర స్థాయిలో విరుచుకుపడ్డారు. ఎన్నికల ముందు ఇచ్చిన ఏ ఒక్క హామీని కూడా కూటమి సర్కార్ నిలబెట్టుకోలేకపోయిందని ఆయన ఆరోపించారు. అధికారంలోకి వచ్చిన ఈ రెండేళ్ల వ్యవధిలోనే భారీగా అప్పులు చేసినప్పటికీ, ఆ నిధులను ప్రజల ప్రయోజనాల కోసం ఏమాత్రం వినియోగించడం లేదని ఆయన విమర్శించారు. పైగా తమ ప్రభుత్వం ప్రవేశపెట్టిన ఎన్నో మంచి పథకాలను రద్దు చేసి సామాన్యులను తీవ్ర నిరాశకు గురిచేశారని మండిపడ్డారు.
అమరావతిలో అవినీతి పర్వం
రాష్ట్ర ఆర్థిక పరిస్థితి పూర్తిగా గాడితప్పిందని, ఆదాయ మార్గాలు మూసుకుపోయాయని జగన్ ఆందోళన వ్యక్తం చేశారు. అమరావతి రాజధాని అభివృద్ధి పనుల ముసుగులో భారీ ఎత్తున అవినీతి జరుగుతోందని, రాష్ట్రంలో ఎక్కడ చూసినా దోపిడీ పెరిగిపోయిందని ఆయన ఆరోపించారు. ఇలాంటి పరిస్థితుల్లో కార్యకర్తలంతా ఐకమత్యంతో పనిచేస్తూ పార్టీని బలోపేతం చేయాలని ఆయన పిలుపునిచ్చారు. రాబోయే రోజుల్లో నాయకులు ప్రజలకు మరింత దగ్గరై, వారి పక్షాన నిలబడి సమస్యల పరిష్కారానికి నిరంతరం పోరాడాలని ఆయన దిశానిర్దేశం చేశారు.
