మనం తాగే నీళ్లలో కంటికి కనిపించని ప్లాస్టిక్ విషం దాగి ఉందని తెలిస్తే ఏమవుతుంది? ఆ భయంకరమైన సూక్ష్మ ప్లాస్టిక్ను మన పెరట్లో దొరికే 'మునగ విత్తనాలు' ఎలా అంతం చేస్తాయో తెలిస్తే మీరు కచ్చితంగా ఆశ్చర్యపోతారు!
విషంగా మారుతున్న అమృతం.. ప్రత్యామ్నాయం ఏది?
ప్రతిరోజూ మనం ప్రాణంగా భావించి తాగే గుక్కెడు నీళ్లలో.. మన ఆయువు తీసే సూక్ష్మ ప్లాస్టిక్ (మైక్రోప్లాస్టిక్స్) దాగి ఉన్నాయన్నది కఠోర వాస్తవం. ఈ మహమ్మారిని తరిమికొట్టేందుకు రసాయనాలతో కూడిన ఖరీదైన ట్రీట్మెంట్లు వాడుతున్న రోజులివి.
కానీ, ఎంతో సహజమైన, అతి తక్కువ ఖర్చుతో కూడిన ఒక అద్భుతమైన ప్రత్యామ్నాయాన్ని శాస్త్రవేత్తలు తాజాగా కనుగొన్నారు. అదే మన పెరట్లో విరివిగా దొరికే 'మునగ విత్తనాలు'!
మునగ గింజలతో తయారు చేసిన ఒక ప్రత్యేకమైన సెలైన్ ద్రావణం (Saline extract).. తాగునీటిలోని ప్లాస్టిక్ కణాలను అద్భుతంగా తొలగిస్తుందని తాజా పరిశోధనల్లో వెల్లడైంది. వాటర్ ట్రీట్మెంట్ ప్లాంట్లలో వాడే అల్యూమినియం ఆధారిత రసాయనాలకు ఏమాత్రం తీసిపోని విధంగా ఇది పనిచేస్తుండటం ప్రపంచాన్ని విస్మయానికి గురిచేస్తోంది.
ప్లాస్టిక్ను బంధించే అద్భుతమైన సైన్స్!
అసలు ఈ మునగ విత్తనాలు నీటిలోని ప్లాస్టిక్ను ఎలా మాయం చేస్తాయి? మునగ ద్రావణం ప్లాస్టిక్ను నీటిలో కరిగించేయదు.. దాని పనితీరు వెనుక ఒక అద్భుతమైన సైన్స్ దాగి ఉంది. ఈ ద్రావణంలో ఉండే పవర్ఫుల్ ప్రోటీన్లు, ప్లాస్టిక్ కణాలపై ఉండే ఎలక్ట్రికల్ ఛార్జ్ను పూర్తిగా నిర్వీర్యం (Neutralise) చేస్తాయి.
దీంతో విడివిడిగా ఉండే ఆ సూక్ష్మ ప్లాస్టిక్ కణాలన్నీ ఒకదానికొకటి అతుక్కుపోయి పెద్ద పెద్ద ముద్దలుగా (Clumps) మారిపోతాయి. ఇలా ముద్దలుగా మారిన ప్లాస్టిక్ను ఫిల్ట్రేషన్ (వడపోత) సమయంలో అత్యంత సులభంగా ట్రాప్ చేసి బయటకు విసిరేయవచ్చు. ల్యాబ్లో చేసిన పరీక్షల్లో.. కుళాయి నీళ్లలో ఉండే అత్యంత ప్రమాదకరమైన పాత పీవీసీ (PVC) మైక్రోప్లాస్టిక్స్ను ఈ మునగ ద్రావణం అత్యంత వేగంగా ఏరిపారేసింది.
రసాయనాలకే సవాల్.. మునగతో మహా అద్భుతం!
నీటి శుద్ధి కోసం ప్రపంచవ్యాప్తంగా వాడే అత్యంత సాధారణ రసాయనం 'అల్యూమినియం సల్ఫేట్' (Alum). ఈ ఖరీదైన రసాయనం ఎంత సమర్థవంతంగా ప్లాస్టిక్ను తొలగిస్తుందో.. మునగ విత్తనాల ద్రావణం కూడా అక్షరాలా అంతే అద్భుతంగా పనిచేస్తుందని ఈ అధ్యయనం తేల్చిచెప్పింది.
ఆశ్చర్యకరమైన విషయం ఏమిటంటే.. ఆల్కలీన్ (Alkaline) ఎక్కువగా ఉండే నీటిలో అల్యూమినియం కంటే మునగ ద్రావణమే బ్రహ్మాండంగా పనిచేసింది. ఇది విస్తృతమైన పీహెచ్ (pH) స్థాయిల్లో కూడా తన సత్తా చాటుతోంది.
రసాయనాలతో కూడిన ట్రీట్మెంట్లు అందుబాటులో లేని చిన్న స్థాయి లేదా గ్రామీణ నీటి శుద్ధి కేంద్రాలకు.. మునగ అనేది అత్యంత పర్యావరణ అనుకూలమైన, ఆచరణాత్మకమైన వరంగా మారబోతోందని శాస్త్రవేత్తలు స్పష్టం చేస్తున్నారు.
మన ప్రాణాలకు శ్రీరామరక్ష.. నివారణే ఆయుధం!
నేడు నదులు, రిజర్వాయర్లు, చివరకు మనం శుద్ధి చేశామనుకుంటున్న తాగునీటి సరఫరాలో సైతం ఈ సూక్ష్మ ప్లాస్టిక్ నిండిపోయి మానవ మనుగడనే ప్రశార్థకం చేస్తోంది. దీర్ఘకాలం పాటు ఈ ప్లాస్టిక్ కణాలు శరీరంలోకి వెళితే అది ఊహించని ఆరోగ్య విషాదాలకు దారితీస్తుంది.
ఒకవేళ ఈ మునగ ఆధారిత పద్ధతిని గనక ప్రపంచవ్యాప్తంగా పెద్ద ఎత్తున అందుబాటులోకి తెస్తే.. మనుషుల కడుపుల్లోకి వెళ్తున్న ప్లాస్టిక్ విషాన్ని భారీ స్థాయిలో అడ్డుకోవచ్చు. అయితే, ఇది ప్రస్తుతానికి ప్రాథమిక దశలో ఉన్న ఒక అద్భుతమైన టెక్నాలజీ మాత్రమే! దీన్ని వెంటనే ఇళ్లలో సొంత వైద్యంలా (Home remedy) ప్రయత్నించకూడదు.
కానీ, ఎంతటి భయంకరమైన కాలుష్య సమస్యలకైనా ప్రకృతిలో.. ముఖ్యంగా మొక్కల్లోనే సింపుల్ అండ్ పవర్ఫుల్ పరిష్కారాలు ఉన్నాయన్న కఠోర నిజాన్ని ఈ పరిశోధన ప్రపంచానికి చాటిచెప్పింది.
టెక్నాలజీతో మనం సృష్టిస్తున్న వినాశనానికి, ప్రకృతి తన గర్భంలో దాచుకున్న మునగ గింజలతో విరుగుడు కనిపెట్టడం.. మానవాళికి ఒక చెంపపెట్టు లాంటిది! ఆధునిక కాలుష్యానికి, అత్యంత పురాతనమైన మన పెరటి చెట్టు ఒక బ్రహ్మాస్త్రంలా మారడం రాబోయే రోజుల్లో నీటి శుద్ధి విధానాలనే పూర్తిగా మార్చేయబోతోంది.
