Telangana Liquor And Beer Prices Set To Hike Due To Global Crisis : పెట్రోల్, గ్యాస్ ధరల మంట ఇప్పటికే మనల్ని ఉక్కిరిబిక్కిరి చేస్తుండగా.. ఇప్పుడు ఆ యుద్ధ జ్వాలలు నేరుగా మందుబాబుల గొంతును కూడా మండించేందుకు సిద్ధమవుతున్నాయి. అవును, ఇరాన్-ఇజ్రాయెల్ యుద్ధం దెబ్బకు గ్లోబల్ సప్లై చైన్ కుప్పకూలడంతో.. తెలంగాణలో మద్యం, బీర్ల ధరలు ఆకాశాన్ని తాకేందుకు రంగం సిద్ధమైంది. సాయంత్రం వేళ కాస్త రిలాక్స్ అవుదామనుకునే సగటు మనిషి జేబుకు వచ్చే నెలలో భారీ గండి పడటం ఖాయంగా కనిపిస్తోంది. ఇది కేవలం మందుబాబుల సమస్య కాదు, ఏటా 40 వేల కోట్ల ఆదాయం తెచ్చే భారీ ఆర్థిక రంగంపై పడుతున్న అంతర్జాతీయ దెబ్బ!
యుద్ధం తెచ్చిన కష్టం.. ఖాళీ సీసాలకు కటకట!
పశ్చిమాసియాలో ఇరాన్, ఇజ్రాయెల్ మధ్య జరుగుతున్న భీకర యుద్ధం ప్రపంచ దేశాల ఆర్థిక వ్యవస్థలను అతలాకుతలం చేస్తోంది. ముడిచమురు, నాచురల్ గ్యాస్ రవాణాతో పాటు సప్లై చైన్ వ్యవస్థకు తీవ్ర అడ్డంకులు ఏర్పడ్డాయి. దీని ప్రభావంతో ఇప్పటికే దేశంలో గ్యాస్ ధరలు పెరిగిపోయాయి. ఇప్పుడు ఇదే నాచురల్ గ్యాస్ కొరత మద్యం పరిశ్రమను నిలువునా ముంచేస్తోంది.
గ్యాస్ కొరత దెబ్బకు గాజు సీసాలు తయారు చేసే పరిశ్రమలు తమ ఉత్పత్తిని భారీగా తగ్గించుకున్నాయి. కొన్ని యూనిట్లు ఏకంగా మూతపడ్డాయి. ఫలితంగా దేశంలోని ప్రధాన గాజు తయారీ కేంద్రాల్లో ఏకంగా 40 శాతం ఉత్పత్తి పడిపోయినట్లు విశ్వసనీయ వర్గాల సమాచారం. దీని దెబ్బకు ఖాళీ మద్యం సీసాల ధరలు ఏకంగా 20 శాతం మేర పెరిగిపోయాయి. పెరిగిన ఈ అదనపు భారాన్ని తాము మోయలేమని డిస్టిలరీ యాజమాన్యాలు చేతులెత్తేసి, మద్యం ధరలు పెంచాలంటూ రాష్ట్ర ప్రభుత్వానికి విజ్ఞప్తులు చేయడం మొదలుపెట్టాయి.
గడువు ముగిసింది.. 15 శాతం పెంపునకు డిమాండ్!
సాధారణంగా రాష్ట్రంలో ప్రతి రెండేళ్లకోసారి ఎక్సైజ్ శాఖ మద్యం ధరలను సమీక్షిస్తుంది. చివరిసారిగా 2023 మే నెలలో తెలంగాణలో మద్యం ధరలను పెంచారు. ఎక్సైజ్ నిబంధనల ప్రకారం 2025 మే నెలలో ఈ సమీక్ష జరగాల్సి ఉన్నా.. ఆ గడువు ఎప్పుడో దాటిపోయింది. ఇప్పుడు ఒకవైపు పెరిగిన సీసాల ఖర్చు, మరోవైపు ముగిసిన గడువు అన్నీ కలిసి ధరల పెంపుకు బాటలు వేస్తున్నాయి.
గత్యంతరం లేని పరిస్థితుల్లో మద్యం తయారీదారులు ఇటీవల ఎక్సైజ్ శాఖ అధికారులను ప్రత్యేకంగా కలిశారు. వెంటనే మద్యం ధరలను 12 శాతం నుంచి 15 శాతం వరకు పెంచాలని ఒక అధికారిక వినతిపత్రాన్ని కూడా ప్రభుత్వానికి అందజేశారు.
రంగంలోకి జ్యుడీషియల్ కమిటీ.. 5 స్లాబుల్లో వడ్డన!
తయారీదారుల నుంచి వస్తున్న తీవ్ర ఒత్తిడి, అంతర్జాతీయంగా నెలకొన్న ప్రతికూల పరిస్థితుల దృష్ట్యా.. రాష్ట్ర ప్రభుత్వం కూడా మద్యం ధరల పెంపునకే మొగ్గుచూపుతున్నట్లు స్పష్టమవుతోంది. ఈ పెంపుపై పక్కా కసరత్తు చేసేందుకు సర్కార్ ఏకంగా ఒక రిటైర్డ్ జడ్జితో కూడిన 'జ్యుడీషియల్ కమిటీ'ని ఏర్పాటు చేసింది. ప్రస్తుతం ఈ కమిటీ ధరల పెంపు అంశాన్ని చాలా సీరియస్గా పరిశీలిస్తోంది.
అయితే, అందరిపైనా ఒకేలా భారం వేయకుండా.. ఈ పెంపును ఐదు స్లాబులుగా విభజించి అమలు చేసే అవకాశం ఉంది. బాటిల్ సైజు (90 ఎంఎల్, క్వార్టర్, హాఫ్, ఫుల్ బాటిల్), బ్రాండ్ కేటగిరీ (తక్కువ ధర మద్యం, మీడియం, ప్రీమియం బ్రాండ్స్), అలాగే ట్యాక్స్ స్లాబ్ స్ట్రక్చర్ను ఆధారంగా చేసుకుని కొత్త రేట్లను ఫిక్స్ చేయనున్నారు. రిటైర్డ్ జడ్జి కమిటీ ఇచ్చే ఫైనల్ రిపోర్టు ఆధారంగా వచ్చే మే నెలలో రాష్ట్ర ప్రభుత్వం కొత్త ధరలను అధికారికంగా ప్రకటించనున్నట్లు తెలుస్తోంది.
ఎండాకాలంలో బీర్ల కొరత.. అధికారుల్లో కలవరం!
మందుబాబులకు అత్యంత ప్రీతిపాత్రమైన బీర్ల పరిస్థితి మరీ దారుణంగా మారబోతోంది. గతేడాది ఫిబ్రవరిలోనే రాష్ట్ర ప్రభుత్వం బీర్ల ధరలను 15 శాతం అమాంతం పెంచింది. కానీ, ఇప్పుడు గాజు సీసాలతో పాటు అల్యూమినియం క్యాన్ల ధరలు కూడా విపరీతంగా పెరిగిపోవడంతో మళ్లీ బీర్ల ధరలు పెంచాల్సిందేనని కంపెనీలు పట్టుబడుతున్నాయి.
మండే వేసవి కాలంలో సహజంగానే బీర్లకు 30 శాతం వరకు అదనపు డిమాండ్ ఉంటుంది. కానీ, సీసాల కొరత వల్ల సరఫరా 20 శాతం మేర పడిపోయింది. ప్రస్తుతం బంకుల్లో కొరత పైకి స్పష్టంగా కనిపించకపోయినా, లోపల సరఫరా మాత్రం దారుణంగా మందగిస్తున్నట్లు తెలుస్తోంది. ఇది రాబోయే రోజుల్లో మార్కెట్లో తీవ్రమైన బీర్ల కొరతకు దారితీయడం ఖాయం. ఏటా రాష్ట్ర ఖజానాకు 40 వేల కోట్ల రూపాయలకు పైగా భారీ ఆదాయాన్ని సమకూర్చే ఈ మద్యం రంగంపై.. పశ్చిమాసియా యుద్ధ ప్రభావం పడటం ఎక్సైజ్ అధికారులను సైతం తీవ్ర కలవరపాటుకు గురిచేస్తోంది.
గ్లోబలైజేషన్ పుణ్యమా అని ప్రపంచంలో ఏ మూల ఏం జరిగినా.. దాని భారం సామాన్యుడి జేబుపైనే పడుతుందనడానికి ఈ మద్యం ధరల పెంపే అతిపెద్ద ఉదాహరణ. రాబోయే మే నెలలో మద్యం రేట్లు పెరగడం దాదాపు ఖరారైపోయింది. సీసాల కొరత సాకుతో కంపెనీలు వేస్తున్న ఈ భారం.. అంతిమంగా వేసవి వినోదాన్ని ఆస్వాదించాలనుకునే వారి బడ్జెట్ను తలకిందులు చేయనుంది. ఇది కేవలం కిక్ ఇచ్చే వార్త కాదు, ఖజానాను నింపేందుకు ప్రభుత్వానికి దొరికిన పర్ఫెక్ట్ టైమింగ్!
Also Read:
Hyderabad Land Scam: పేదోళ్ల ఇళ్లే కూలుస్తారా? పెద్దోళ్ల కబ్జాలు కనపడవా? హైడ్రాపై హరీష్ రావు ఫైర్!Basara Temple Master Plan: బాసరకు రూ.225 కోట్లతో మహర్దశ!
Cyber Crime Hyderabad: టెకీకి 2.36 కోట్ల కుచ్చుటోపీ
Bhadrachalam Villages: భద్రాచలం ఆ ఐదు గ్రామాలు తెలంగాణకే.. అమిత్ షాకు తుమ్మల లేఖ!
Etela Rajender News: పార్టీ మార్పుపై ఈటల రాజేందర్ క్లారిటీ!
