మీ రక్తనాళాల్లో నిశ్శబ్దంగా ప్రవహిస్తూ, అత్యంత పదునైన గాజు పెంకులుగా మారి మీ కీళ్లను నిలువునా పొడిచే ఓ భయంకరమైన శత్రువు దాగుందని మీకు తెలుసా? నేటి ఉరుకుల పరుగుల జీవితంలో లక్షలాది మందిని పీడిస్తున్న అతిపెద్ద ఆరోగ్య మహమ్మారి.. యూరిక్ యాసిడ్! మనం రోజూ తినే ఆహారంలోని 'ప్యూరిన్లు' అనే ప్రోటీన్లను శరీరం విచ్ఛిన్నం చేసినప్పుడు సహజంగా పుట్టుకొచ్చే వ్యర్థ పదార్థమే ఈ యూరిక్ యాసిడ్. ఆరోగ్యవంతమైన శరీరంలో ఇది రక్తంలో కలిసి మూత్రపిండాల ద్వారా వడపోతకు గురై, మూత్రం రూపంలో బయటకు వెళ్లిపోతుంది. కానీ, ఆ రక్షణ వలయం బద్దలైతేనే అసలు ప్రాణసంకటం మొదలవుతుంది!
కీళ్లలో దాక్కునే రాక్షసుడు.. హైపర్ యూరిసెమియా!
మన కిడ్నీలు ఆ వ్యర్థాలను బయటకు పంపడంలో విఫలమైనప్పుడు లేదా శరీరంలో దాని ఉత్పత్తి అమాంతం పెరిగిపోయినప్పుడు.. రక్తంలో యూరిక్ యాసిడ్ స్థాయిలు ప్రమాదకరంగా పెరుగుతాయి. ఈ భయంకరమైన స్థితినే 'హైపర్ యూరిసెమియా' అంటారు. అలా రక్తంలో పేరుకుపోయిన ఈ యాసిడ్, కాలక్రమేణా స్పటికాలుగా (క్రిస్టల్స్) మారి కీళ్ల మధ్య మకాం వేస్తుంది. అప్పుడు మొదలవుతుంది నరకం! కీళ్ల నొప్పులు, భయంకరమైన వాపు, కనీసం అడుగు తీసి అడుగు వేయలేని దుస్థితి కలుగుతుంది. దీనినే వైద్య పరిభాషలో 'గౌట్' వ్యాధి అంటారు.
చెడు ఆహారపు అలవాట్లు, అధిక బరువు, వ్యాయామం లేకపోవడం, కొన్ని రకాల ప్రోటీన్ ఆహారాలే ఈ మహా విపత్తుకు ఆజ్యం పోస్తాయి. దీనిని తొలిదశలోనే గుర్తించకపోతే కిడ్నీల్లో రాళ్లు ఏర్పడి, చివరకు మూత్రపిండాలు పూర్తిగా పాడైపోయే ముప్పు ఉంది. రక్తంలో యూరిక్ యాసిడ్ పెరిగితే కనిపించే కళ్లు చెదిరే లక్షణాలు ఎలా ఉంటాయో ప్రతి ఒక్కరూ కచ్చితంగా తెలుసుకోవాలి.
కీళ్లను రంపపు కోత కోసే 'గౌట్'
శరీరంలో యూరిక్ యాసిడ్ పెరిగిందనడానికి మొట్టమొదటి, అత్యంత భయంకరమైన సంకేతం.. కీళ్ల నొప్పులు! ముఖ్యంగా కాలి బొటనవేలు, చీలమండలు, మోకాళ్లు, మణికట్లు, వేళ్ల కీళ్లు, మోచేతుల్లో ఆకస్మికంగా, ప్రాణం పోయేంత తీవ్రమైన నొప్పి పుడుతుంది. నడుస్తున్నప్పుడు లేదా కీళ్లను కొద్దిగా కదిలించినా సరే.. వేల సూదులతో ఒకేసారి గుచ్చినట్లు విలవిలలాడిపోతారు. నొప్పి ఉన్న ప్రాంతమంతా నిప్పులా ఎర్రగా కందిపోయి, దారుణంగా వాచిపోతుంది.
మూత్రపిండాలపై మారణహోమం
యూరిక్ యాసిడ్ స్థాయిలు హద్దులు దాటినప్పుడు, వాటిని వడబోసి బయటకు పంపడానికి కిడ్నీలు నరకం చూస్తాయి. ఈ యాసిడ్ స్పటికాలు కిడ్నీల్లో పేరుకుపోయి క్రమంగా కఠినమైన రాళ్లుగా రూపాంతరం చెందుతాయి. దీని ఫలితంగా మూత్రంలో రక్తం పడటం, మూత్ర విసర్జన సమయంలో ప్రాణం పోయేంత మంట, మూత్రం ధారగా కాకుండా కొంచెం కొంచెంగా రావడం లాంటి భయంకరమైన సమస్యలు మొదలవుతాయి.
ఈ స్పటికాలకు ఆమ్ల గుణం ఉండటం వల్ల, అవి మూత్ర నాళాల గుండా వెళ్లేటప్పుడు లోపలి పొరను రాసుకుంటూ పోయి తీవ్రమైన మంటను కలిగిస్తాయి. మూత్రం మబ్బుగా, ముదురు పసుపు లేదా ఎరుపు రంగులోకి మారుతుంది. వ్యర్థాల శాతం పెరగడంతో భరించలేని ఘాటైన దుర్వాసన వస్తుంది. పదే పదే మూత్రానికి వెళ్లాలన్న కోరిక కలుగుతుంది.
నడుమును విరిచేసే ప్రాణాంతక నొప్పి
ఈ వ్యాధి తీసుకొచ్చే నడుము నొప్పి సాధారణమైనది కాదు. ఇది నడుముకు ఒకవైపున లేదా వెనుక భాగంలో పక్కటెముకల కింద అత్యంత పదునుగా మొదలవుతుంది. కిడ్నీల్లో రాళ్లు కదిలిన ప్రతిసారీ కత్తితో పొడిచినంత షార్ప్గా, భరించలేనంతగా ఉంటుంది. ఈ నొప్పి క్రమంగా కింది భాగానికి, పొత్తి కడుపు వైపునకు పాకుతూ ప్రాణాలు తోడేస్తుంది. ఒక నిమిషం తీవ్రంగా ఉండి, మరో నిమిషం తగ్గినట్లుగా సైకో ఆట ఆడుతుంది. ఇది ఇలాగే ఎక్కువ రోజులు కొనసాగితే కిడ్నీల వడపోత సామర్థ్యం పూర్తిగా పడిపోయి, కిడ్నీ ఫెయిల్యూర్కు దారితీస్తుంది.
కరిగే శరీరంలో కదలని కొవ్వు
రక్తంలో యూరిక్ యాసిడ్ పెరిగినప్పుడు అది శరీరంలో ఇన్సులిన్ ప్రతినిరోధకతను పెంచుతుంది. దీనివల్ల శరీరం తీసుకునే చక్కెర అంతా మొండి కొవ్వుగా మారి పొత్తి కడుపు భాగంలో పేరుకుపోతుంది. శరీర కణాలు సరిగా పనిచేయక కొవ్వు కణాలు ఇబ్బడిముబ్బడిగా పెరుగుతాయి. మనం ఎంత తక్కువ తిన్నా సరే బరువు అమాంతం పెరుగుతున్నట్లు అనిపిస్తుంది. కీళ్ల నొప్పుల భయంతో శారీరక శ్రమకు దూరమవ్వడం వల్ల బరువు మరింత వేగంగా పెరుగుతారు. కిడ్నీల పనితీరు మందగించి శరీరంలో వ్యర్థాలు పేరుకుపోవడం కూడా ఈ బరువుకు మరో ప్రధాన కారణం.
హరించే శక్తి.. రగిలే జ్వరం
అదనపు యూరిక్ యాసిడ్ను వడపోయడానికి కిడ్నీలు తమ శక్తినంతా ధారపోయాల్సి వస్తుంది. దీనివల్ల మీరు ఎంత విశ్రాంతి తీసుకున్నా సరే.. రోజంతా నీరసంగా, నిస్సత్తువగా శరీరంలో ప్రాణం లేనట్లుగా అనిపిస్తుంది. భయంకరమైన కీళ్ల నొప్పుల వల్ల రాత్రుళ్లు నిద్ర కరువై విపరీతమైన అలసట ఆవహిస్తుంది. కీళ్లలో చేరిన యాసిడ్ స్పటికాలను చూసి మన శరీర రోగనిరోధక వ్యవస్థ తీవ్రంగా స్పందించడం వల్ల అకస్మాత్తుగా జ్వరాలు కూడా వస్తాయి.
చర్మం కింద భయపెట్టే గడ్డలు.. 'టోఫీ'
ఈ రాక్షస స్పటికాలు కేవలం కీళ్లకే పరిమితం కావు. అవి చర్మం కింద చిన్న చిన్న గడ్డలుగా సైతం ఏర్పడతాయి. వైద్య పరిభాషలో వీటిని 'టోఫీ' అని పిలుస్తారు. ఇవి సాధారణంగా మన చేతి వేళ్లు, చెవులు, మణికట్టు, మడమలు, మోచేతులపై అసహ్యంగా కనిపిస్తాయి. చర్మం ఎక్కడైతే పలుచగా ఉంటుందో, అక్కడ ఈ గడ్డలు స్పష్టంగా బయటకు ఉబ్బి భయపెడుతుంటాయి.
ప్రాణాలను నిలబెట్టే సంజీవని మార్గాలు
ఈ నిశ్శబ్ద హంతకుడిని జయించాలంటే ఆహార నియమాలే అసలైన బ్రహ్మాస్త్రం! ప్రతిరోజూ నీళ్లు అమృతంలా భావించి బాగా తాగాలి. ప్యూరిన్లు ఎక్కువగా ఉండే మటన్, పోర్క్, లివర్, రొయ్యలు, పీతలు లాంటి మాంసాహారానికి శాశ్వతంగా దూరంగా ఉండాలి. సోడాలు, కూల్డ్రింక్స్, ప్యాక్ చేసిన ఫ్రూట్ జ్యూస్లు, మద్యం, బీర్లు, కాఫీలు లాంటివి దరిచేరనీయకూడదు.
ఫైబర్ (పీచు పదార్థం) పుష్కలంగా ఉండే గింజలు, బ్రౌన్ రైస్, ఓట్స్, చెర్రీలు మీ డైట్లో చేర్చుకోవాలి. విటమిన్-సి అందించే నిమ్మ, నారింజ, ఉసిరి లాంటి సిట్రస్ ఫలాలను బతికినంత కాలం వదలకూడదు. అన్నింటికీ మించి బరువును కఠినంగా నియంత్రణలో ఉంచుకోవాలి. చక్కెర పదార్థాలు, బేకరీ ఫుడ్స్ను విషంగా భావించి వదిలేయాలి.
వ్యాధి వచ్చాక ఆసుపత్రుల చుట్టూ తిరగడం కన్నా.. అది రాకముందే మనం తినే తిండిని మందులా మార్చుకోవడమే నిజమైన ఆరోగ్యం!
Also Read:
Fat Loss Tips: బరువు తగ్గాలంటే భోజన సమయాలివేPumpkin vs Sunflower Seeds: ఆరోగ్యానికి ఏది మేలు?
జపాన్ నుంచి అమెరికా వరకు హాహాకారాలు.. మళ్లీ వణికిస్తున్న పాత రోగాలు
Pre Workout Foods: వ్యాయామానికి ముందు తినే పండ్లు
Summer Cold or Allergies: ఎర్రటి ఎండల్లో ఆగని తుమ్ములు.. ఇది జలుబా? లేక భయంకరమైన అలర్జీనా?
