అమెరికా, ఇరాన్ మధ్య కుదిరిన రెండు వారాల శాంతి ఒప్పందం.. సరిగ్గా పట్టాలెక్కకముందే కుప్పకూలే ప్రమాదంలో పడింది. ఒకవైపు శాంతి మంత్రం పఠిస్తూనే.. మరోవైపు లెబనాన్పై దాడులు చేస్తుండటంతో అగ్రరాజ్యానికి ఇరాన్ కౌంట్ డౌన్ స్టార్ట్ చేసింది. అసలు మీ లక్ష్యం శాంతా? లేక ఇజ్రాయెల్ భుజం మీద తుపాకీ పెట్టి యుద్ధం చేయడమా? అని నిలదీస్తోంది. ఈ పరిణామాలు గ్లోబల్ మార్కెట్లను, రేపటి మన జీవితాలను ఎలా తలకిందులు చేయబోతున్నాయో తెలుసుకోండి!
శాంతా? సమరమా? అమెరికాకు ఇరాన్ అల్టిమేటం!
ఎక్కడో పశ్చిమాసియాలో కమ్ముకున్న యుద్ధ మేఘాలు విడిపోయాయని భావిస్తున్న తరుణంలో.. అమెరికా, ఇరాన్ మధ్య కుదిరిన ఆ రెండు వారాల కాల్పుల విరమణ ఒప్పందం ఇప్పుడు పేకమేడలా కూలిపోయే దిశగా పయనిస్తోంది. లెబనాన్పై ఇజ్రాయెల్ దాడులు ఏమాత్రం ఆగకపోవడంతో ఇరాన్ అగ్గిమీద గుగ్గిలమవుతోంది.
అమెరికాకు సూటిగా ఒక కఠినమైన హెచ్చరిక జారీ చేసింది. "మీకు నిజంగా శాంతి కావాలా? లేక ఇజ్రాయెల్ ముసుగులో యుద్ధాన్ని ఇలాగే కొనసాగించాలనుకుంటున్నారా? ఏదో ఒకటి వెంటనే తేల్చుకోండి" అంటూ ఇరాన్ విదేశాంగ మంత్రి అబ్బాస్ అరాగ్చీ అగ్రరాజ్యానికి ఫైనల్ అల్టిమేటం ఇచ్చారు.
సోషల్ మీడియాలో వార్.. హార్మూజ్లో మళ్లీ మంటలు!
ఇరాన్ విదేశాంగ మంత్రి అరాగ్చీ సోషల్ మీడియా వేదికగా అమెరికా ద్వంద్వ వైఖరిని చీల్చిచెండాడారు. "అమెరికా, ఇరాన్ సంధి నిబంధనలు అద్దంలా స్పష్టంగా ఉన్నాయి. ఒకవైపు శాంతి కావాలని కోరుకుంటూనే.. మరోవైపు వెన్నుపోటు పొడుస్తూ ఇజ్రాయెల్ ద్వారా యుద్ధాన్ని ప్రోత్సహించడం ఎంతమాత్రం కుదరదు" అని ఆయన ఘాటుగా స్పందించారు.
"లెబనాన్లో ఇజ్రాయెల్ సృష్టిస్తున్న ఈ మారణకాండను యావత్ ప్రపంచం గమనిస్తోంది. అమెరికా తన మాట మీద నిలబడుతుందో లేదో ఇప్పుడు తేలిపోతుంది" అని ఆయన కుండబద్దలు కొట్టారు. ఒకవేళ లెబనాన్పై దాడులు ఆగకపోతే ఈ సున్నితమైన ఒప్పందం కుప్పకూలడమే కాకుండా.. ప్రపంచ వాణిజ్యానికి గుండెకాయ లాంటి హార్మూజ్ జలసంధిలో మళ్లీ భయంకరమైన ఉద్రిక్తతలు మొదలవుతాయని ఇరాన్ అధికారిక మీడియా స్ట్రాంగ్ వార్నింగ్ ఇచ్చింది.
లెబనాన్కు నో ఎంట్రీ.. తేల్చి చెప్పిన వైట్హౌస్!
ఇరాన్ చేస్తున్న ఈ తీవ్ర హెచ్చరికలపై వైట్హౌస్ ప్రెస్ సెక్రటరీ కరోలిన్ లీవిట్ ఏమాత్రం వెనక్కి తగ్గకుండా సంచలన వ్యాఖ్యలు చేశారు. అసలు ఈ కాల్పుల విరమణ ఒప్పందంలో లెబనాన్ భాగమే కాదని ఆమె తేల్చి చెప్పారు. "లెబనాన్ అంశం ఈ డీల్లో లేదన్న విషయం ఇప్పటికే అన్ని పక్షాలకు క్లియర్గా వివరించాం. హిజ్బుల్లాపై ఇజ్రాయెల్ చేస్తున్న సైనిక చర్యలకు మా సంపూర్ణ మద్దతు ఉంటుంది" అని ఆమె కుండబద్దలు కొట్టారు.
అమెరికా అధ్యక్షుడు డొనాల్డ్ ట్రంప్ కూడా ఇదే విషయాన్ని అధికారికంగా ధృవీకరించారు. "కేవలం హిజ్బుల్లా కారణంగానే లెబనాన్ను ఈ ఒప్పందం నుంచి ఉద్దేశపూర్వకంగా మినహాయించాం. ఆ విషయాన్ని కూడా మేము త్వరలోనే పరిష్కరిస్తాం" అని ట్రంప్ సంచలన వ్యాఖ్యలు చేశారు.
తగ్గేదే లేదన్న నెతన్యాహు.. భద్రతే ఫస్ట్!
ఈ పరిణామాల మధ్య ఇజ్రాయెల్ ప్రధాని బెంజమిన్ నెతన్యాహు సైతం తన పట్టు వీడలేదు. అమెరికా ప్రతిపాదనకు మద్దతు తెలుపుతూనే.. దక్షిణ లెబనాన్లో తమ భీకర దాడులు ఎట్టిపరిస్థితుల్లోనూ కొనసాగుతాయని ఆయన తేల్చి చెప్పారు. ఇరాన్ నుంచి ఎదురయ్యే అణు, క్షిపణి, ఉగ్రవాద ముప్పు లేకుండా చేయడానికి అమెరికా చేసే ప్రతి ప్రయత్నానికి తాము సహకరిస్తామని.. కానీ తమ దేశ భద్రత విషయంలో మాత్రం ఎవరితోనూ రాజీ పడే ప్రసక్తే లేదని ఆయన స్పష్టం చేశారు.
శుక్రవారం ఇస్లామాబాద్ చర్చలు.. బంతి ఇరాన్ కోర్టులో!
ఇదిలా ఉంటే.. ఈ శుక్రవారం రోజున పాకిస్థాన్ రాజధాని ఇస్లామాబాద్లో జరగబోయే అత్యంత కీలకమైన శాంతి చర్చల కోసం అమెరికా సర్వసన్నద్ధమైంది. అమెరికా ఉపాధ్యక్షుడు జేడీ వాన్స్ నేతృత్వంలో.. స్టీవ్ విట్కాఫ్, జారెడ్ కుష్నర్ వంటి బరువైన, కీలక ప్రతినిధులు ఈ చర్చల్లో నేరుగా పాల్గొంటారని వైట్హౌస్ ధృవీకరించింది.
ఒకవైపు బాంబుల వర్షం.. మరోవైపు శాంతి వచనాలు! లెబనాన్పై దాడులు ఆపితేనే సంధి ముందుకు వెళుతుందని ఇరాన్ మెలిక పెడుతుండటంతో.. ఈ శుక్రవారం ఇస్లామాబాద్ చర్చలు జరగడం దాదాపు అసాధ్యంగానే కనిపిస్తోంది. ఈ ఉద్రిక్తతలు ఇలాగే కొనసాగితే, హార్మూజ్ జలసంధి ఎప్పుడైనా మూసుకుపోవచ్చు. దాని ఫలితంగా రాబోయే రోజుల్లో క్రూడాయిల్ ధరలు భగ్గుమనడం, మన దేశంలో పెట్రోల్, డీజిల్ రేట్లు ఆకాశాన్ని తాకడం గ్యారెంటీ! యుద్ధం ఎక్కడో జరుగుతుందని లైట్ తీసుకోవద్దు, సామాన్యుడి జేబుకు కన్నం పడే ప్రమాదం ముంగిట్లోనే ఉంది!
Also Read:
US Iran Ceasefire: గ్లోబల్ లీడర్ల హర్షంగాల్లో కలిసిన శాంతి ఒప్పందం.. 24 గంటల్లోనే మూతపడిన హర్మూజ్ జలసంధి!
Strait of Hormuz: హర్మూజ్ టోల్ ఫీజుపై ఇరాన్, ఒమన్ వార్
ఇంటర్వ్యూల్లో అడ్డంగా దొరికిపోతున్న ఉత్తర కొరియా సైబర్ దొంగలు
Donald Trump Impeachment | ఇరాన్ ఎఫెక్ట్: అమెరికా అధ్యక్ష పదవి నుంచి ట్రంప్ ఔట్?
