రాత్రి పడుకునే ముందు గంటల తరబడి స్మార్ట్ఫోన్ చూస్తున్నారా? నిద్ర కళ్లలోకి వస్తున్నా బలవంతంగా ఆపుకుని సోషల్ మీడియాలో స్క్రోల్ చేస్తూ గడిపేస్తున్నారా? అయితే మీకు తెలియకుండానే మీరు మీ ఆరోగ్యంతో అతిపెద్ద ప్రమాదానికి తెరలేపుతున్నారు. ఉరుకులు పరుగుల జీవితంలో డబ్బు సంపాదించడానికి ఇస్తున్న ప్రాధాన్యత, ప్రశాంతంగా నిద్రపోవడానికి ఎవరూ ఇవ్వడం లేదు. ఈ 'నిద్రలేమి' అనే సైలెంట్ కిల్లర్ సామాన్యుడి శరీరంలో ఎలాంటి విధ్వంసం సృష్టిస్తుందో ప్రతి ఒక్కరూ తెలుసుకోవాల్సిన చేదు నిజం ఇది.
శరీరానికి నిద్ర ఒక సంజీవని
మనిషి బతకడానికి ఆహారం ఎంత అవసరమో, దేహం ఆరోగ్యంగా ఉండటానికి నిద్ర కూడా అంతే ముఖ్యం. రోజంతా కష్టపడిన మన శరీరం, మెదడు తిరిగి శక్తిని పుంజుకోవడానికి నిద్ర ఒక సంజీవని లాంటిది. కానీ, నేటి కాలంలో చాలామందికి ప్రశాంతమైన నిద్ర కరువైంది. ఎంత ప్రయత్నించినా నిద్రపట్టడం లేదంటూ ఆసుపత్రుల చుట్టూ తిరుగుతున్న వారి సంఖ్య రోజురోజుకూ పెరుగుతోంది. రోజుకు ఆరు గంటల కంటే తక్కువ నిద్రపోతే అది నేరుగా శారీరక, మానసిక ఆరోగ్యంపై తీవ్రమైన దెబ్బ కొడుతుందని వైద్య నిపుణులు తీవ్రంగా హెచ్చరిస్తున్నారు.
నిద్ర తగ్గితే పెరిగే ముప్పులివే..
నిద్ర కరువైతే శరీరంలో అనేక ప్రతికూల మార్పులు జరుగుతాయి. ప్రధానంగా మెదడు చురుకుదనం కోల్పోయి సరిగ్గా పనిచేయదు. దీని ప్రభావం నేరుగా చర్మంపై పడి, ముఖంపై ముడతలు రావడం, కళ్ల కింద నల్లటి వలయాలు ఏర్పడటం జరుగుతుంది. నిద్రలేమి కారణంగా శరీరంలో ఒత్తిడిని పెంచే 'కార్టిసాల్' అనే హార్మోన్ స్థాయిలు అమాంతం పెరుగుతాయి. దీనివల్ల ఆందోళన, చిన్న విషయాలకే చిరాకు రావడం, ఆకలిలో మార్పులు జరగడమే కాకుండా, క్రమంగా టైప్-2 డయాబెటిస్ బారిన పడే ప్రమాదం విపరీతంగా పెరుగుతుంది.
గుండెకు సైలెంట్ ఎటాక్.. హైపర్ టెన్షన్!
సాధారణంగా మనం గాఢ నిద్రలో ఉన్నప్పుడు హార్ట్ రేట్, బ్లడ్ ప్రెషర్ 10 నుంచి 20 శాతం వరకు తగ్గుతాయి. ఆ సమయంలోనే గుండె, రక్తనాళాలు పూర్తి విశ్రాంతి తీసుకుని రికవర్ అవుతాయి. కానీ, ఆరు గంటల కన్నా తక్కువ నిద్రపోయే వారిలో కార్టిసాల్, అడ్రినలిన్ హార్మోన్ల ఉత్పత్తి పెరిగిపోయి గుండె కొట్టుకునే వేగం పెరుగుతుంది. రక్తనాళాలు కూడా కుంచించుకుపోతాయి. దీంతో హైపర్ టెన్షన్ (బీపీ) వచ్చే అవకాశం 20 నుంచి 32 శాతం వరకు పెరుగుతుందని పరిశోధనలు కుండబద్దలు కొడుతున్నాయి. పైగా, నిద్రలేమి వల్ల ఇన్సులిన్ రెసిస్టెన్స్ పెరిగి శరీరంలో ఇన్ఫ్లమేషన్ మొదలవుతుంది. ఆశ్చర్యకరమైన విషయం ఏంటంటే, బీపీ బారిన పడిన సగం మందికి తమకు ఆ సమస్య ఉందన్న విషయమే తెలియదు.
ప్రశాంతమైన నిద్ర కోసం ఏం చేయాలి?
మీ బీపీ కంట్రోల్లో ఉండి, గుండె పదిలంగా ఉండాలంటే రోజుకు కచ్చితంగా 7 నుంచి 9 గంటల గాఢ నిద్ర ఉండాల్సిందే. ఏదో మగతగా పైపైన కునుకు తీస్తే శరీరానికి ఎలాంటి ప్రయోజనం ఉండదు. ప్రతిరోజూ ఒకే సమయానికి పడుకుని, ఒకే సమయానికి నిద్రలేవడం అలవాటు చేసుకోవాలి. మీకు నిద్రలేమి లేదా విపరీతమైన గురక లాంటి సమస్యలు ఉంటే నిర్లక్ష్యం చేయకుండా వెంటనే వైద్యులను సంప్రదించాలి. అన్నింటికంటే ముఖ్యంగా, నిద్రపోయే ముందు సెల్ ఫోన్ వాడకాన్ని పూర్తిగా మానుకోవాలి.
కేవలం ఆరు గంటల కంటే తక్కువ నిద్రపోవడం వల్ల గుండె జబ్బులు, స్ట్రోక్, ఊబకాయం, మధుమేహం, డిప్రెషన్ వంటి ప్రాణాంతక సమస్యలు ఉచితంగా మన తలుపు తడతాయి. అందుకే.. పనుల ఒత్తిడిలో పడి నిద్రను నిర్లక్ష్యం చేయకండి. ప్రశాంతంగా నిద్రపోయి నిండు నూరేళ్లు ఆరోగ్యంగా జీవించండి!
