హైదరాబాద్‌, మే 24, 2025: శనివారం సాయంత్రం హైదరాబాద్‌ నగరాన్ని భారీ వర్షం ముంచెత్తింది. ఈదురు గాలులతో కూడిన కుండపోత వర్షం నగరం నలుమూలలా బీభత్సం సృష్టించింది. ముఖ్యంగా మాదాపూర్‌, కొండాపూర్‌, గచ్చిబౌలి, జూబ్లీహిల్స్‌, బంజారాహిల్స్‌, ఫిలింనగర్‌ వంటి పశ్చిమ ప్రాంతాలతో పాటు, పంజాగుట్ట, అమీర్‌పేట, ఖైరతాబాద్‌, మెహదీపట్నం, టోలీచౌకీలలోనూ వాన దంచికొట్టింది.
ఈ ఆకస్మిక వర్షంతో లోతట్టు ప్రాంతాలు జలమయం అయ్యాయి. ఆఫీసులు ముగిసే సమయం కావడంతో వేలాది మంది వాహనదారులు తీవ్ర ఇబ్బందులకు గురయ్యారు. పలు ప్రధాన రహదారులపై ట్రాఫిక్‌ భారీగా జామ్‌ కావడంతో వాహనాలు నిదానంగా ముందుకు కదిలాయి. నగరవాసులు తమ గమ్యస్థానాలకు చేరుకోవడానికి నానా అవస్థలు పడ్డారు.
