క్విక్-కామర్స్ దిగ్గజం జెప్టో (Zepto) మరోసారి వార్తల్లో నిలిచింది. ఇటీవల సప్లై, స్టాఫింగ్ సమస్యల కారణంగా 44 ప్రాంతాల్లో తన 'జెప్టో కేఫ్' సేవలను నిలిపివేసిన నేపథ్యంలో, ఇప్పుడు డెలివరీ ఏజెంట్ చేసిన దాడితో ఈ సంస్థ ప్రతిష్ట దెబ్బతింటోంది.
జెప్టో డెలివరీ బాయ్ వీరంగం: వ్యాపారిపై దాడి, ఫ్రాక్చర్!
తాజాగా వెలుగులోకి వచ్చిన వివరాల ప్రకారం, బెంగళూరులోని బసవేశ్వర నగర్, జడ్జీల కాలనీలో కిరాణా సరుకులు డెలివరీ చేయడానికి వెళ్ళిన ఒక జెప్టో డెలివరీ ఏజెంట్ వీరంగం సృష్టించాడు. వ్యాపారి శశాంక్ పై డెలివరీ బాయ్ దాడి చేయడంతో ఆయన తలకు తీవ్ర గాయాలయ్యాయి. మూడు రోజుల క్రితం జరిగిన ఈ ఘటన ఆలస్యంగా వెలుగులోకి వచ్చినప్పటికీ, డెలివరీ ఏజెంట్ దాడికి సంబంధించిన వీడియో సోషల్ మీడియాలో వైరల్‌గా మారింది.
వాస్తవానికి, డెలివరీ ఏజెంట్ నుంచి సరుకులు తీసుకునేందుకు వ్యాపారి వదిన వెళ్ళింది. అయితే, డెలివరీ చిరునామాలో పొరపాటు దొర్లడంపై వివాదం మొదలైంది. డెలివరీ ఏజెంట్ అసభ్య పదజాలంతో దూషించడంతో గొడవ పెద్దదైంది. పరిస్థితిని అదుపు చేయడానికి శశాంక్ అక్కడికి వెళ్ళగా, టెంపర్ కోల్పోయిన డెలివరీ బాయ్ (విష్ణువర్ధన్) శశాంక్ పై దాడికి తెగబడ్డాడు. ఈ ఘటన అక్కడి సీసీటీవీ కెమెరాలో స్పష్టంగా రికార్డు అయింది.
దాడి సమయంలో శశాంక్ ముఖం, తల, దవడ, కన్ను భాగాల్లో డెలివరీ ఏజెంట్ పిడిగుద్దులు కురిపించడంతో ఆయన తలకు ఫ్రాక్చర్ అయ్యింది. గాయాలు వారంలో మానకపోతే తలకు శస్త్రచికిత్స చేయాల్సి ఉంటుందని వైద్యులు సూచించినట్లు శశాంక్ వెల్లడించాడు.
జెప్టో స్పందన, పోలీసుల దర్యాప్తు
ఈ ఘటనపై బాధితులు వెంటనే జెప్టో కస్టమర్ కేర్‌ను సంప్రదించారు. దీనికి స్పందించిన జెప్టో కస్టమర్ సపోర్ట్, బాధ్యులపై చర్యలు తీసుకుంటామని, జరిగిన ఘటనకు చింతిస్తున్నామని తెలిపింది. మరోవైపు, డెలివరీ బాయ్ విష్ణువర్ధన్ తనను చంపేస్తానని బెదిరించాడని కూడా శశాంక్ పేర్కొన్నాడు. ఈ ఘటనపై పోలీసులు కేసు నమోదు చేసి దర్యాప్తు కొనసాగిస్తున్నారు. ఈ పరిణామం జెప్టో యొక్క డెలివరీ సేవలు, సిబ్బంది నిర్వహణపై తీవ్ర ప్రశ్నలను లేవనెత్తుతోంది.
