బాలీవుడ్ స్టార్ రణ్‌వీర్ సింగ్ పుట్టినరోజు (జులై 6) సందర్భంగా, ఆయన కొత్త చిత్రం 'ధురంధర్' (Dhurandhar) నుండి సాలిడ్ అప్‌డేట్ వచ్చింది. రణ్‌వీర్ తన పోస్టర్, టీజర్‌ని పంచుకుంటూ, ‘‘ఒక భారీ అగ్ని ఎగిసే క్షణం ఆసన్నమైంది... కొందరు అపరిచితుల గురించి తెలియని వాస్తవ కథను వెలికి తీద్దాం’’ అని పేర్కొన్నారు. ఈ సినిమా డిసెంబర్ 5, 2025న ప్రపంచవ్యాప్తంగా విడుదల కానుంది. టీజర్‌లో రణ్‌వీర్ పూర్తి యాక్షన్ మోడ్‌లో కనిపించి ఆకట్టుకున్నారు.
థ్రిల్లింగ్ టీజర్, భారీ తారాగణం
'ధురంధర్' టీజర్ థ్రిల్, వయొలెన్స్, మిస్టరీ అంశాలతో ఉత్కంఠగా సాగుతుంది. ఈ చిత్రంలో రణ్‌వీర్‌తో పాటు సంజయ్ దత్, ఆర్. మాధవన్, అర్జున్ రాంపాల్, అక్షయ్ ఖన్నా, సారా అర్జున్ వంటి ప్రముఖ నటులు కీలక పాత్రల్లో నటిస్తున్నారు. రణ్‌వీర్ సింగ్ ఇందులో గ్యాంగ్‌స్టర్‌గా కనిపించబోతున్నట్లు తెలుస్తోంది.
ఈ చిత్రానికి ఆదిత్య ధర్ దర్శకత్వం వహిస్తున్నారు. 2019లో విడుదలైన తన తొలి చిత్రం 'యురి: ది సర్జికల్ స్ట్రైక్' (Uri: The Surgical Strike)తో జాతీయ అవార్డును సాధించిన ఆదిత్య ధర్‌కి ఇది రెండో సినిమా. దీంతో 'ధురంధర్'పై భారీ అంచనాలు నెలకొన్నాయి.
అజిత్ దోవల్ జీవిత కథ ఆధారంగా?
'ధురంధర్' చిత్రం వాస్తవ సంఘటనల స్ఫూర్తితో తెరకెక్కుతున్నట్లు తెలుస్తోంది. భారత నిఘా, శాంతి భద్రతల మాజీ అధికారి, ప్రస్తుత జాతీయ భద్రతా సలహాదారు అజిత్ దోవల్ జీవితం ఆధారంగా ఈ సినిమా రూపొందుతున్నట్లు సమాచారం. జియో స్టూడియోస్ సమర్పణలో బీ62 స్టూడియోస్ నిర్మిస్తున్న ఈ చిత్రానికి దర్శకుడు ఆదిత్య ధర్ ఒక నిర్మాత కాగా, జ్యోతీ దేశ్‌పాండే (జియో స్టూడియోస్ తరపున) మరియు లోకేష్ ధర్ సహనిర్మాతలుగా వ్యవహరిస్తున్నారు.
