అమ్మయ్య.. ఆ తుఫాను గండం తప్పిందని ఊపిరి పీల్చుకునే లోపే.. బంగాళాఖాతంలో మరో ముప్పు పొంచి ఉంది! ఈసారి టార్గెట్ ఏపీ, తమిళనాడు తీరాలేనని వాతావరణ శాఖ హెచ్చరిస్తోంది.
రైతులకు కంటి మీద కునుకు లేకుండా చేసిన ‘సెన్యార్’ తుఫాను ఎట్టకేలకు శాంతించింది. అండమాన్ జలాల్లోకి రాకముందే తన దిశ మార్చుకుని ఈశాన్య ఇండోనేషియా దగ్గర తీరం దాటి బలహీనపడింది. దీంతో పెను ప్రమాదం తప్పిందని అంతా భావించారు. కానీ, ఈ ఆనందం ఎంతోసేపు నిలవలేదు. ఇప్పుడు నైరుతి బంగాళాఖాతంలో మరో తీవ్ర అల్పపీడనం వేగంగా బలపడుతుండటం అధికారులను, రైతులను కలవరపెడుతోంది.
తమిళనాడు, పుదుచ్చేరి వైపు వాయుగుండం?
సముద్ర మట్టానికి 7.6 కిలోమీటర్ల ఎత్తులో ఆవరించి ఉన్న ఉపరితల ఆవర్తనం ప్రభావంతో, రాగల 24 గంటల్లో ఇది వాయుగుండంగా మారే అవకాశం ఉంది. ఇది ఉత్తర-వాయువ్య దిశగా కదులుతూ.. ఉత్తర తమిళనాడు, పుదుచ్చేరి మధ్య తీరం దాటవచ్చని ఐఎండీ (IMD) అంచనా వేస్తోంది. కొన్ని వాతావరణ మోడల్స్ అయితే ఇది మరింత బలపడి తుఫానుగా మారే ఛాన్స్ కూడా ఉందని హెచ్చరిస్తున్నాయి.
ఏపీపై 'రెయిన్ బ్యాండ్స్' ప్రభావం
ఈ వాయుగుండం ప్రభావం ఆంధ్రప్రదేశ్‌పై గట్టిగానే ఉండనుంది. ముఖ్యంగా ఈ నెల 29 నుంచి వాతావరణంలో అనూహ్య మార్పులు చోటుచేసుకోనున్నాయి:
భారీ వర్షాలు: ఈ నెల 29వ తేదీ నుంచి దక్షిణ కోస్తా జిల్లాల్లో ఒక మోస్తరు నుంచి భారీ వర్షాలు కురుస్తాయి.
ఈదురు గాలులు: తీర ప్రాంతాల్లో గంటకు 35-45 కిలోమీటర్ల వేగంతో, గరిష్టంగా 55 కిలోమీటర్ల వేగంతో గాలులు వీచే అవకాశం ఉంది.
మత్స్యకారులకు హెచ్చరిక: దక్షిణ కోస్తాంధ్ర నుంచి వేటకు వెళ్ళిన మత్స్యకారులు వెంటనే సురక్షితంగా ఒడ్డుకు చేరుకోవాలని అధికారులు ఆదేశించారు.
వాయుగుండం తీరానికి సమీపించే కొద్దీ గాలుల ఉధృతి, వర్షాల తీవ్రత పెరుగుతుందని విశాఖ తుఫాన్ హెచ్చరికల కేంద్రం స్పష్టం చేసింది. ఇప్పటికే రుతుపవన ప్రభావంతో రాయలసీమ, దక్షిణ కోస్తాలో జల్లులు పడుతున్నాయి. చేతికి వచ్చిన పంట నష్టపోకుండా రైతులు తగిన ముందస్తు జాగ్రత్తలు తీసుకోవాలని అధికారులు సూచించారు.
