వారం రోజులు లేట్ అయినా.. 'అఖండ' సౌండ్ మాత్రం గట్టిగానే వినిపిస్తోంది! ఆర్థిక ఇబ్బందులతో గత వారం వాయిదా పడిన బాలయ్య మాస్ జాతర, ఎట్టకేలకు ఈరోజు (డిసెంబర్ 12) థియేటర్లలోకి వచ్చేసింది. మరి మొదటి పార్ట్ రేంజ్లో 'తాండవం' ఆడిందా? లేక నిరాశపరిచిందా?
కథేంటంటే?
టిబెటన్ ఆర్మీ ఇండియాపై బయో వార్ (జీవాయుధ దాడి) ప్రకటిస్తుంది. మహా కుంభమేళా వేదికగా దేశాన్ని అల్లకల్లోలం చేయాలనుకుంటారు. ఈ క్లిష్ట సమయంలో ప్రధాని ఆదేశాల మేరకు డీఆర్డీఓ రంగంలోకి దిగుతుంది. సైంటిస్ట్ జనని (హర్షాలీ మల్హోత్రా) ఈ వైరస్కు విరుగుడు మందును కనిపెడుతుంది. కానీ శత్రువులు ఆమెను అంతం చేయడానికి వెంటపడతారు. సరిగ్గా అప్పుడే.. జననికి ఆపద వస్తే తిరిగి వస్తానని మాట ఇచ్చిన అఖండ (బాలకృష్ణ) మళ్లీ వస్తాడు. అఖండ తిరిగి వచ్చి జననిని, దేశాన్ని ఎలా కాపాడాడు? బయో వార్ను అడ్డుకుని ధర్మాన్ని ఎలా నిలబెట్టాడు? అన్నదే మిగతా కథ.
విశ్లేషణ: మాస్ జాతర.. లాజిక్ లేని రాత!
బాలకృష్ణ అఘోరా పాత్రలో మరోసారి విశ్వరూపం చూపించారు. అఖండగా ఆయన స్క్రీన్ ప్రెజెన్స్, డైలాగ్ డెలివరీ సినిమాకు ప్రధాన బలం. ముఖ్యంగా సెకండాఫ్లో శివుడు కనిపించే ఎమోషనల్ ఎపిసోడ్, యాక్షన్ సీక్వెన్సులు మాస్ ఆడియన్స్కు పూనకాలు తెప్పిస్తాయి. తమన్ బ్యాక్ గ్రౌండ్ స్కోర్ సినిమాకు ప్రాణం పోసింది. సీన్లు రొటీన్గా ఉన్నా తన మ్యూజిక్తో ఎలివేట్ చేశాడు. హర్షాలీ మల్హోత్రా తన పాత్రలో చక్కగా నటించింది.
అయితే, దర్శకుడు బోయపాటి శ్రీను కథపై పెద్దగా కసరత్తు చేసినట్లు అనిపించదు. కథనం చాలా ఊహాజనితంగా, మొదటి భాగాన్నే పోలి ఉంటుంది. బాలకృష్ణను కేవలం హీరోయిజం కోణంలో చూపించడానికే ప్రాధాన్యత ఇచ్చారు తప్ప, కథలో లాజిక్ గురించి పట్టించుకోలేదు. బాల మురళీకృష్ణ పాత్రకు తక్కువ స్క్రీన్ స్పేస్ ఉండటం, విలన్ పాత్రలు బలంగా లేకపోవడం మైనస్. సంయుక్త మీనన్ పాత్రకు ప్రాధాన్యత లేదు. మొత్తంగా చూస్తే, బాలయ్య వన్ మ్యాన్ షో, తమన్ మ్యూజిక్ కోసం ఈ డివోషనల్ యాక్షన్ డ్రామాను ఒకసారి చూడొచ్చు. కానీ 'అఖండ 1'లో ఉన్న ఇంటెన్సిటీ ఇందులో కాస్త తగ్గిందనే చెప్పాలి.
రేటింగ్: 3/5
