భారతీయుల టాలెంట్ అంటే మస్క్ మామకు ఎంతో ఇష్టం! కానీ వీసాల విషయంలో కొన్ని కంపెనీలు చేస్తున్న పనికి మాత్రం ఆయన సీరియస్ వార్నింగ్ ఇచ్చారు.
టెస్లా, స్పేస్ఎక్స్ అధినేత ఎలాన్ మస్క్ మరోసారి భారతీయులపై ప్రశంసల వర్షం కురిపించారు. జెరోధా సహ వ్యవస్థాపకుడు నిఖిల్ కామత్తో జరిగిన పాడ్కాస్ట్లో మాట్లాడుతూ, అమెరికా అభివృద్ధిలో మనవాళ్ళ పాత్రను కొనియాడారు. అయితే, ఇదే సమయంలో వీసా విధానాల్లో జరుగుతున్న కొన్ని తప్పులను, రాజకీయాలను కూడా ఆయన ఎత్తిచూపారు.
H-1B వీసాతో 'గేమ్' ఆడుతున్నారా?
హెచ్-1బీ వీసా ప్రోగ్రామ్పై మస్క్ తన అభిప్రాయాన్ని కుండబద్దలు కొట్టినట్లు చెప్పారు. కొన్ని ఔట్సోర్సింగ్ కంపెనీలు ఈ వ్యవస్థను తమకు అనుకూలంగా మార్చుకుని (Gaming the System), దుర్వినియోగం చేస్తున్నాయని మండిపడ్డారు. ఇలాంటి చర్యల వల్లే అమెరికాలో వలస వ్యతిరేక విధానాలు పుట్టుకొస్తున్నాయని విశ్లేషించారు.
మస్క్ చెప్పిన కీలక విషయాలు ఇవే:
దుర్వినియోగం ఆగాలి: వీసా వ్యవస్థలోని లొసుగులను వాడుకునే కంపెనీలపై చర్యలు తీసుకోవాలి.
రద్దు పరిష్కారం కాదు: అంతమాత్రాన హెచ్-1బీ ప్రోగ్రామ్ను పూర్తిగా మూసివేయకూడదు, అలా చేస్తే అమెరికాకే తీవ్ర నష్టం.
టాలెంట్ కొరత: క్లిష్టమైన పనులు చేయడానికి తగినంత మంది నిపుణులు దొరకడం లేదని, ప్రతిభావంతులు ఎంతమంది వచ్చినా తమ కంపెనీలు ఆహ్వానిస్తాయని స్పష్టం చేశారు.
సరిహద్దులు లేకుంటే దేశమే కాదు!
ఇదే సమయంలో బైడెన్ ప్రభుత్వ వలస విధానాలపై మస్క్ నిప్పులు చెరిగారు. బైడెన్ హయాంలో సరిహద్దు నియంత్రణలు లేకపోవడం వల్లే అక్రమ వలసలు పెరిగాయని, "సరిహద్దులు లేకపోతే అదొక దేశమే కాద"ని ఘాటుగా వ్యాఖ్యానించారు. గతేడాది అమెరికా జారీ చేసిన హెచ్-1బీ వీసాలలో ఏకంగా 71 శాతం భారతీయులే పొందడం గమనార్హం.
