ఐపీఎల్ 2026 మినీ వేలానికి కౌంట్డౌన్ మొదలైంది. అబుదాబి వేదికగా కాసుల వర్షం కురవనుంది. ముఖ్యంగా ఆసీస్ ఆల్రౌండర్ కామెరాన్ గ్రీన్ కోసం ఫ్రాంచైజీలు ఎగబడటం ఖాయంగా కనిపిస్తోంది.
అబుదాబిలోని ఎతిహాద్ అరీనా వేదికగా మంగళవారం ఐపీఎల్ మినీ వేలం అట్టహాసంగా జరగనుంది. మొత్తం 359 మంది ఆటగాళ్లు తమ అదృష్టాన్ని పరీక్షించుకోనుండగా, ఫ్రాంచైజీల వద్ద ఖాళీగా ఉన్నవి మాత్రం 77 స్లాట్లు మాత్రమే. ఇందులో 31 స్థానాలు విదేశీ ఆటగాళ్లకు కేటాయించారు. కామెరాన్ గ్రీన్, లియమ్ లివింగ్స్టోన్, రవి బిష్ణోయ్ వంటి స్టార్లపై అందరి కళ్లు ఉన్నాయి.
ఎవరి జేబులో ఎంత ఉంది?
గత సీజన్లో నిరాశపరిచిన జట్లు ఈసారి భారీగా ఖర్చు చేయడానికి సిద్ధమయ్యాయి.
కోల్కతా నైట్ రైడర్స్ (KKR): అత్యధికంగా రూ. 64.30 కోట్ల పర్సుతో బరిలోకి దిగుతోంది. ఆ జట్టు 13 మందిని కొనుగోలు చేయాల్సి ఉంది.
చెన్నై సూపర్ కింగ్స్ (CSK): ధోని సేన చేతిలో రూ. 43.40 కోట్లు ఉన్నాయి.
ముంబై & పంజాబ్: ముంబై ఇండియన్స్ (రూ. 2.75 కోట్లు), పంజాబ్ కింగ్స్ (రూ. 11.5 కోట్లు) వద్ద తక్కువ మొత్తం ఉండటంతో వారు వేలంలో సైలెంట్గా ఉండే అవకాశం ఉంది. హైదరాబాద్ (SRH) 10 స్లాట్లను భర్తీ చేయాల్సి ఉంది.
గ్రీన్ కోసం యుద్ధమే.. కానీ రూల్ ఇదే!
ఈ వేలంలో కామెరాన్ గ్రీన్ ఆల్ టైమ్ రికార్డు క్రియేట్ చేసే ఛాన్స్ ఉంది. అతని కోసం బిడ్డింగ్ రూ. 25 కోట్లు దాటవచ్చని అంచనా.
ట్విస్ట్: వేలంలో ధర ఎంత పలికినా, కొత్త నిబంధనల ప్రకారం విదేశీ ఆటగాడికి గరిష్ఠంగా రూ. 18 కోట్లు మాత్రమే జీతంగా అందుతుంది.
భారత స్టార్స్: వెంకటేశ్ అయ్యర్, రవి బిష్ణోయ్ రూ. 2 కోట్ల బేస్ ప్రైస్తో అందుబాటులో ఉన్నారు.
నో RTM: ఇది మినీ వేలం కాబట్టి ఫ్రాంచైజీలకు 'రైట్ టు మ్యాచ్' (RTM) కార్డు ఆప్షన్ ఉండదు.
