"నేను సీఎం అయ్యాక.. ఒక్కొక్కరి తోలు తీస్తా!" తెలంగాణ రాజకీయాల్లో ఎమ్మెల్సీ కవిత చేసిన ఈ వ్యాఖ్యలు ఇప్పుడు పెను ప్రకంపనలు సృష్టిస్తున్నాయి. సొంత పార్టీ నేతలపైనే ఆమె ఇంత ఘాటుగా స్పందించడం చర్చనీయాంశమైంది.
తెలంగాణ జాగృతి అధ్యక్షురాలు, ఎమ్మెల్సీ కల్వకుంట్ల కవిత (Kalvakuntla Kavitha) హైదరాబాద్లోని తన కార్యాలయంలో మీడియా సమావేశం నిర్వహించి, తనపై విమర్శలు చేస్తున్న బీఆర్ఎస్, బీజేపీ నేతలకు గట్టి హెచ్చరికలు జారీ చేశారు. తనను కాంగ్రెస్తో లింక్ పెట్టి మాట్లాడే 'గుంటనక్కల' సంగతి చూస్తానని మండిపడ్డారు.
"ఇది జస్ట్ టాస్.. టెస్ట్ మ్యాచ్ ముందుంది!"
తనపై అనవసర ఆరోపణలు చేస్తే ఎవరినీ వదిలిపెట్టనని కవిత స్పష్టం చేశారు. "నాపై దాడి చేస్తే మీ అవినీతి చిట్టా మొత్తం బయటపెడతా. ఇప్పుడేదో అయిపోయిందని సంబరపడకండి.. ఇది టాస్ మాత్రమే, అసలైన టెస్ట్ మ్యాచ్ ముందుంది" అని వార్నింగ్ ఇచ్చారు.
ఫ్యూచర్ సీఎం నేనే.. విచారణ జరిపిస్తా!
ఈ సందర్భంగా కవిత సంచలన వ్యాఖ్యలు చేశారు.
ముఖ్యమంత్రిని అవుతా: ఏదో ఒకరోజు తాను కచ్చితంగా ముఖ్యమంత్రిని అవుతానని జోస్యం చెప్పారు.
తోలు తీస్తా: ఆ రోజు వచ్చాక.. 2014 నుంచి జరిగిన అన్ని విషయాలపైనా విచారణ జరిపిస్తానని, ఆడపిల్ల అని తక్కువగా చూస్తే ఒక్కొక్కరి తోలు తీస్తానని తీవ్రంగా హెచ్చరించారు.
భూముల దందా: బీఆర్ఎస్ హయాంలో పరిశ్రమల భూములను నివాస ప్లాట్లుగా మార్చారని, ఉద్యమ సమయంలో బెదిరించి డబ్బులు వసూలు చేశారని ఆరోపించారు.
తాను హరీశ్ రావును విమర్శిస్తే.. మధ్యలో బీజేపీ నేతలు ఎందుకు రియాక్ట్ అవుతున్నారని కవిత ప్రశ్నించారు. తన భర్త ఫోటోను ప్రదర్శిస్తూ మాట్లాడుతున్న బీజేపీ ఎమ్మెల్యే ఏలేటి మహేశ్వరరెడ్డి తీరును ఆమె తప్పుబట్టారు.
