Tamil Nadu Elections 2026: బీజేపీ మా సిద్ధాంతపరమైన శత్రువు.. ఎన్డీఏతో పొత్తు ప్రసక్తే లేదన్న విజయ్ పార్టీ!
త్వరలో తమిళనాడు అసెంబ్లీ ఎన్నికలు జరగనున్న నేపథ్యంలో ఆ రాష్ట్ర రాజకీయాలు క్షణక్షణానికో మలుపు తిరుగుతున్నాయి. అధికార డీఎంకే, కాంగ్రెస్ పార్టీలు పొత్తు ఖరారు చేసుకుని కలిసి పోటీ చేస్తున్న వేళ, సినీ నటుడు విజయ్ స్థాపించిన తమిళగ వెట్రి కళగం (టీవీకే) పార్టీ ఎవరితో జట్టు కడుతుందన్న దానిపై సర్వత్రా ఆసక్తి నెలకొంది. తాజాగా విజయ్ పార్టీ బీజేపీ నేతృత్వంలోని ఎన్డీఏ కూటమితో కలిసి బరిలోకి దిగనుందంటూ పెద్ద ఎత్తున ఊహాగానాలు వెలువడ్డాయి. ఈ వార్తలపై టీవీకే పార్టీ తీవ్రంగా స్పందిస్తూ పొత్తు వార్తలకు ఫుల్ క్లారిటీ ఇచ్చేసింది.
ఎన్డీఏతో పొత్తు అంతా మీడియా సృష్టే
ఎన్డీఏతో పొత్తు పెట్టుకునే ప్రసక్తే లేదని విజయ్ నేతృత్వంలోని టీవీకే శనివారం కుండబద్దలు కొట్టింది. రాబోయే ఎన్నికల్లో ఎన్డీఏ, టీవీకే కలిసి పోటీ చేస్తాయంటూ వస్తున్న వార్తలన్నీ కేవలం మీడియా ఊహాగానాలేనని కొట్టిపారేసింది. ఈ మేరకు టీవీకే పార్టీ జాయింట్ జనరల్ సెక్రటరీ సీటీఆర్ నిర్మల్ కుమార్ మాట్లాడుతూ, ఎన్డీఏతో పొత్తుకు సంబంధించి చర్చలు జరుగుతున్నాయనేది కేవలం వదంతులు మాత్రమేనని స్పష్టం చేశారు. శుక్రవారం రోజున టీవీకే పార్టీ జిల్లా కార్యదర్శులతో జరిగిన వర్చువల్ సమావేశం ఎవరితోనో పొత్తు పెట్టుకోవడానికి కాదని, కేవలం తమ పార్టీ బలాబలాలను, క్షేత్రస్థాయిలో ఉన్న అవకాశాలను అంచనా వేయడానికే నిర్వహించామని ఆయన వివరించారు.
సీఎం అభ్యర్థిగా విజయ్ని బీజేపీ ఒప్పుకుంటుందా?
ఎన్డీఏ కూటమితో పొత్తుకు ఆస్కారమే లేదని తేల్చి చెప్పిన నిర్మల్ కుమార్, టీవీకే పార్టీకి బీజేపీ సిద్ధాంతపరమైన శత్రువు అని తాము ఇప్పటికే చాలా స్పష్టంగా ప్రకటించామని గుర్తుచేశారు. ఒకవేళ మీడియా ఊహిస్తున్నట్లుగా టీవీకే, ఎన్డీఏ కూటమి మధ్య పొత్తుకు సంబంధించి చర్చలు నిజమే అయితే, తమిళనాడు ముఖ్యమంత్రి అభ్యర్థిగా తమ నాయకుడు విజయ్ని బీజేపీ అధిష్ఠానం అంగీకరిస్తుందా అని ఆయన సూటిగా ప్రశ్నించారు. ఈ ఒక్క ప్రశ్నతో పొత్తు వార్తలకు టీవీకే గట్టి చెక్ పెట్టినట్లయింది.
దాటవేసిన బీజేపీ రాష్ట్ర అధ్యక్షుడు
టీవీకే పార్టీతో ఎన్డీఏ కూటమి పొత్తుకు సంబంధించి తెరవెనుక చర్చలు జరుగుతున్నాయా అని మీడియా ప్రతినిధులు అడిగిన ప్రశ్నకు బీజేపీ తమిళనాడు అధ్యక్షుడు నైనార్ నాగేంద్రన్ ఆసక్తికర వ్యాఖ్యలు చేశారు. ఈ పొత్తుల అంశంపై నేరుగా సమాధానం చెప్పడానికి ఆయన నిరాకరించారు. మీడియా మొత్తం ఎప్పుడూ రాజకీయ పొత్తుల గురించే ఆందోళన చెందుతోందని ఆయన ఎద్దేవా చేశారు. కానీ తాము మాత్రం తమిళనాడు ప్రజల సమస్యల గురించి, మరీ ముఖ్యంగా రాష్ట్రంలో దారుణంగా పడిపోయిన శాంతి భద్రతల వైఫల్యం, మహిళల రక్షణ వంటి కీలక అంశాల గురించి తీవ్రంగా ఆందోళన చెందుతున్నామని బదులిచ్చి అసలు విషయాన్ని దాటవేశారు.
ద్రవిడ రాజకీయాల్లో తమకంటూ ఒక ప్రత్యేక స్థానం సంపాదించుకోవాలని చూస్తున్న విజయ్, బీజేపీతో పొత్తు పెట్టుకుంటే మైనార్టీ ఓట్లు దూరమవుతాయన్న వ్యూహంతోనే 'సిద్ధాంతపరమైన శత్రువు' అనే కార్డు వాడుతున్నట్లు స్పష్టమవుతోంది. ముఖ్యమంత్రి అభ్యర్థిగా విజయ్ ని ఎవరైతే ఒప్పుకుంటారో వారితోనే టీవీకే పొత్తు పెట్టుకునే అవకాశాలు మెండుగా ఉన్నాయి. ఒకవేళ ఎవరూ ముందుకు రాకపోతే విజయ్ ఒంటరి పోరాటం చేసినా ఆశ్చర్యపోనక్కర్లేదు.
